ماذنبي انا للكاتبة ام مصطفى

١٣

#ما_ذنبي_انا
البارت 13
#ام_مصطفى
اسمع صوت الطلق يزن زن فوكانه
كمنه نرجف من الخوف
دقائق  رعب وخوف
عبالك مو دقائق  عبالك ساعات
سكت الرمي وبده تفليش الباب
اطلع بيك خير اطلع
امي ركضت للباب تفتحه
يمه وين فدوه لا يضربوج
وخري اشوف شكو وشنو الي صار
يمه مبينه ابنج اكيد مسويله مكسوره
دعوفيني طلعت
صاحت دخيل الله ودخيلكم
احنه بس نسوان وماعدنه زلمه
لمن طلعت فتحت الباب ركضت
وراها تفاجئت الي يرمون علينا
اسامه طليق إيلاف وأخوه مروان الجبير
امي خاله استهدوا بالرحمن
وفهمونه شصار
واحنه نسايب صرنه ابنه ماخذ بنت عمكم
صاح مروان شفهمج
احنه منحجي وي نسوان طلعينه زلم
وهاي دكيناكم مره
الكم عطوه منا لليل اذا ماكو
باجر أحرك بيتكم
تجون تسلمونه مرتضى
سمعتي لولا
خاله بس كلي شمسوي
خلي صاحبتج دكلج عود
صعدو بسياره وراحوا
امي كامت تعيط وتصرخ بالشارع
دخلتها يمه طبي والله نشهرنه
الدربونه كولها طلعت تتفرج
وخالتي أم أيلاف ولا مدت رأسها
امي كالت اطيني عباتي اروح افتهم شنو السالفه
منها
يمه اروح وياج اخاف
ولج عوبه قفلي الباب منين تخافين اخاف احد يجي وراج
ماكو روحي فوتي
امي لونها مخطوف اول مره اشوفها بهيج وضعيه
تحجي وترجف
طبعا امي رغم كل المشاكل من مرتضى والي يصير بيها أبد ما تغيرت هي هي رافعه خشمها وميعجبها العجب
ودائما تشوف روحها احسن من الكل
دخلت ركض وقفلت الغرفه من الخوف
وره شويه اجتي امي
تعالي مريم افتحي الباب
اشوفها منتهيه وحلكها ابيض
ها يمه بشري
شبشر وج صخام والطام
يمه شكو خوفتيني
شدعي عليج ساميه وعلاوي طلعتوني من بيتي وجبتوني يم إيلاف ومصايبها
يمه هسه احنه بيا حال وانت ادعين ع الناس
فهميني شكو
ولج شفهمج مصيبه سوده
ساره مخابره اسامه زوج إيلاف القديم الي هو ابن عمها
وكايلتله إيلاف جانت ع علاقه وي
مرتضى من جانت وياك
وجانت أطب وتطلع وياه
وسوالف صخام والطام
والولد حتى بناته شاك مو منه
وهسه لازم نفصل وتصير كعده ولازم نسلمهم اثنينهم لعمام ايلاف ياااا يمه صدك تحجين عزه بعينج ساره والله وعدت ووفت بوعدها
يمه كله منج مو كتلج وكحه هاي لاتاخذيها لاتوافقين
ولج هو بكيفي متعرفين اخوج
اذا راد شي يسويه
غير انت دللتي هذا دلالج الزايد
انت خو بس تردين تلومين بيه وبس اني بيا حال هسه
خلصانه روحي
راح انجلط من سمعت بالسالفه
كومي خابري اخوج خلي يشوف حل
ها هسه صار اخوي
ولج كومي فوك ضيمي انت علي
صدك رحت خابرت علاوي
وحجيتله بقى مصدوم
انت شكاعد تحجين
مصيبه ولج هاي
اي والله ياخويه هذا الي صار
كال اطلعوا من البيت لاتبقون بي
تعالوا يمنا
كتله زين وتالي
كال هسه أخبر عمامي واشوف شسوي
سديته منه
حجيت لمي كالت اي خلي نطلع
بس مااروح لبيت ساميه
ترديها تشمت بيه
نروح لخاولج لحد ما الله يفرجها
اخذنه كم شغله تحتاجها وطلعنه
رحنه لخوالي امي حجت الهم الي صار
خالي احمد كال هذا متصيرله جاره ابنج
أبو المشاكل هاي سوايه يسويها
شنو قلة نسوان
خويه فدوه لالومني البيه مكفيني شوفونه حل
خالي كال انطوني رقم علاوي
انطيته اله خابره خالي
كاله نلتقي ابيتكم
حتى نروح نحول عدهم مامنها جاره
ونشوف بلكت تنحل السالفه
طلعوا خوالي راحوا لبيت خاله ساميه
هناك عمامي منتظريهم
واحنه بقينه انلووب يارب حلها بجاه الحسين
حلها
لليل اجوي خوالي كال قافلين لو نسلمهم مرتضى
لو نتبره منه
وكمنه ماطلعنه بحل
كنالهم احنه مانعرف وين وحلفنالهم دين ويمين
وكالوا مانتعرض للنسوان حلفوا دين ويمين احنه ثارنه وي مرتضى
امي كامت ادك وتلطم
وتولول شلون هيج تطلعون بله حل
كالها انت شني ماتفتهمين ليش ابنج سالفته تسولف
موزين ما كتلونه هاي قضية شرف
تعرفين شنو يعني شرف
كومن اوديجن للبيت
والله كريم
رجعنا للبيت بس بخوف ورعب عشنا ماعايشه أحد اول يوم كمت ابجي من الخوف
وخصوصا مايمنه رجال
كام تتخايلي صوت الرصاص
لسه بإذني
لو اتخايل يدخلون علينه يقتلونه
الصبح كمنا نشوف لو اسامه لو مروان واكفين بركن الدربونه
ليل نهار عبالك حراسه
مرتضى بيوم الي طلع لا تصل ولا حصلناه نخابر مغلق
معرفنه وين راح
فديوم طلعت للكلية شفت مروان
بالركن
بقه يباوع علي ويخزر بيه
كلش خفت من نظراته
رحت بخوف للكلية
حجيت لاسوا كالت خلي يولي لاتخافين مدام
كايلين كدام الناس منحجي وي النسوان
فمراح يأذوج لاتخافين مااعرف اسو ولا مرتاحه اني
دادا حقج متترتاحين
بس والله بالعشاير عيب واحد يأذي مره
ماصايره هاي عدهم
كلت الها الله كريم بس مااعرف ليش حاسه راح يصير شي
كل بالي يم اخوي علاوي
لإيروح بالرجلين من وره مرتضى
خايفه عليه كلش
واصفن وادعي ع مرتضى
وع السواه بينا
رجعت للبيت هالمره شفت اسامه طليق إيلاف بدل من اخوه مروان
من شفته كلبي كام يدك ورجلي ماعاد تعيني ع المشي
أحس البيت صار شبعده علي
كوه كمت اجر جر برجليه
ع موصلت للبيت دخلت بلا ما التفت عليه
بس كمت ارجف مثل السعفة من الخوف
اووف شيخلصها يربي
امي ها شبيج مخطوف لونج
يمه غير من مصايب ابنج
احجي عدل مابيه حيل
شكو
يمه الصبح طلعت لكيت مروان ابن عم إيلاف واكف بالركن
وكام يخزرني خزر خوفني بعيونه
وهسه رجعت لكيت اسامه
وهم واكف بالركن يراقب بيتنه
عوفيهم هاي عباله مرتضى راح يجي
لاتخافين مالهم شغل بينه
اني هم من رحت ورجعت شفتهم
تعالي اكليلج لكمه وخليها ع الله
تغديت وركضت اخابر اسو
اسو هم لكيت اسامه بالركن
كالت شبيج لا تخافين تره مثل مكتلج مالهم شغل بيج
بس انت خوافه
قابل انت موديه مرتضى ع إيلاف
سديته منها شويه طمنتني
ثاني يوم هم شفت اسامه بالركن
توقيت شويه وقريت ايات بكلبي
حتى تروح الخوف مني مااعرف ليش ممرتاحه منهم
اشو هذا كام يمشي وراي
يمه كلبي كام يدك صعدت للكلية صعد الكيه وياي
نزلت نزل وراي
ركض دخلت للكلية ولج اسو الحكي هذا هذا هذا
وج شبيج كالت
احجي هذا
يا منو هذا
زوج إيلاف أقصد طليقها وراي جاي
وج وينه  واكف اباب الكلية
يااا عزه شرايد
مااعرف
بس والله راح اموت رعب
لتخافين حبي
اني من اطلعين اطلع وياج
وللحكايه بقيه
#ام_مصطفى
ادعولي بقضاء حاجه رحم الله والديكم