ماذنبي انا للكاتبة ام مصطفى

١٨

#ما_ذنبي_انا
#ام_مصطفى
البارت 18
الدنيا فترت بيه صار غواش ع عيوني مااعرف دوخه جسمي احسه ثلج
واصابع رجلي نملت وكمت مااحس بشي
حتى صوت اسامه بعيد صار علي
وشوية شويه بده يتلاشى
شفت ابوي
يبتسم بوجهي ويسمح ع راسي
يكلي انت قويه بابا
لا تضعفين
جنت أريد احجي اكله أخذني وياك مكدرت انطقها
ابوي دار وجها وراح
ردت أصيح عليه مكدرت
لساني ثكيل
وراها حسيت أصوات يمي
هوسه وووووووووواوووواووووواوووو
دوي ماافتهم شي منها
حاولت أركز
كمت افتح عيوني اشوف مغوش
كأنما اكو مثل البياض الشفاف
ع عيوني
بديت احجي بثكل
اسامه اني ماخنتك والله
اسامه لا تضربنيييييي
الكلمه كوه اكولها
اسمع أصوات بس مااميز ولاافتهم شيحجون
اسمعهم مثل شريط الكاسيت الي يعلس
بس حسيت لمست ايد
ألزمت أيدي
وحسيت بجكة ابره
ورجعت غبت عن الوعي
كعدت سمعت صوت علاوي
اي هذا صوته واضح
فتحت عيوني بعجل
شفته فوك راسي واكف
علاوي
كلتها بتعب علاوي
كال ياروح علاوي الحمد لله على سلامتج خويه
اني وين
انت يمي وبعد مااعوفج أبد
اسامه يشك بيه علاوي
خل يولي خويه
عوفي الموضوع هسه انت تعبانه
من دكومين بالسلامه يصير خير
اجتي امي تبجي
وتبوس بيه يمه شلونج هسه
وخالتي ساميه هم
يمي
الحمد لله زينه
أحس نفسي احسن
بس ليش مااموت اني
ليش عشت أريد اموت
اسم الله عليج حبيبتي
لادكولين هيج
بس كومي بالسلامه
وشوفي شلون أخذ حقج
علاوي كال
كتله الله كريم
علاوي منو جابني هنا
كال عوفي هالحجي هسه
وإنسي
صيري زينه واحجيلج كولشي ....
وره 3 ايام طلعت من المستشفى
رحت لبيت اخوي علي
امي شكد حاولت ارجع وياها
ونرجع نعيش بالبيت مالتنه سوه
علاوي رفض
وكالها اختي تعيش عندي بعد ماأمن عليها يمج أبد
تردين تشوفيها بيتنا
مفتوح شوكت متجين هله بيج
امي سكتت محجيت بعد
أول يوم اجتني اسو
شبكتني وتبجي كالت والله عندي امتحان وحتى مجاوبت من كد ماافكر بيج
وبالي كوله يمج
شلون صرتي
شلون اسراء اني ليش عشت أريد اموت مااريد أعيش
لادكولين هيج حبيبتي
انت قويه
اسو جنت اموت الف موته من اشوفه يراقبني
من اصعد الصطح
لو ادخل الحمام
يدك الباب يكلي شكو اتاخرتي
لو تفتيش المبايل يوميه يفتش
ويبحوش بي
جنت اكول خلي بلكت يأمن ويثق بيه
من مايلكه شي
اثاري يزيد
كالت وج خلي يولي شيأمن
وج هذت مريض مو صاحي
انت غلطتي من رجعتيله
وج لو عايفته بالحبس
يعفن احسن
ليش رجعتي هسه شحصلتي
اسو أحبه مو بيدي والله أحبه
يا صخام وج شحبيتي منه
بالبدايه جنت أتصور اعطف عليه
بعدين لا عرفت أحبه
وضعيفه كلش كدامه
لج عوبه شبيج خل يولي
لاتضعفين أبد صيري قويه
وإنسي وارجعي لدراستج اي ان شاء الله راح ارجع السنه التجي
لا حتى لو أحبه
انتهت بعد وياه
علاوي رفع دعوه عليه
ووكل محامي راح اطلك
واعيش هنا بعد
والله احسن شي تسوينه
ووالله علاوي نعمه الأخ
كلولج اجيتج للمستشفى
وصارت عركه شكبرها
ليش منو تعارك
علاوي ومروان
ليش مروان اجه للمستشفى
اي ولج بكل عين صلفه
مروان وامه واسامه
اني اجيت
جان مروان يكول هاي شكو جايه
جان علاوي يكله وانت شكو جاي
وتعاركوا
وطردهم علاوي من المستشفى
صارت هوسه شكبرها
وج انوب اني شصار بيه
كلت بسببي صارت المشكله
بس والله علاوي لعب لعب بيهم
وطردهم
ريح كلبي وج والله بدي اشرب من دمهم
اسو وشفتي اسامه جان موجود
اي شفته
جان مبين عليه التعب والقهر
حتى متغير شكله مصوفر
وعيونه ذبلانات
اهه اه
ها ولج مريم كمتي تذبين حصرات
خاف بعدج تردينه
اسو انت اختي
اجذب عليج اذا اكلج اكرهه
بس مالي رجعه وياه
بعد انتهت
لو شيصير ماارجع
اي عفيه
خلي يولي والله ميستاهلج
مريض هذا
بي حالة نفسيه يمعوده
لا هو انتهت بعد ماارجع
لو ع كص ركبتي
اي عفيه عليج
ودعتني اسو وراحت

وره اسبوع صارت الجلسه اني وكلت محامي مااريد
اشوفه واضعف
اجلو القضيه
لأن اسامه رفض يطلك
والباحثه طلبت
نكعد سوه بلكت نوصل لحل
اجه علاوي كلي كتله مستحيل
مااريد اشوفه
كال خلص اني اعرف اصرف
بهاي الأيام كمت أحس بأعراض الحمل
بس جنت اخاف اتاكد
حجيت لمينا
كتلها يمكن اني حامل
كام يصير عندي أعراض حمل ادوخ وتلعب نفسي
والشهرية كاطعتني
صار 10 أيام
كالت العصر اجيبلج تحليل
بيتي واشوف
جابتلي
طلعت حامل كلش فرحت بحملي
أحب الأطفال كلش
كلت لعلاوي اني حامل
نصحني مااكول لأي أحد
لأن اذا عرف انت حامل
مراح يطلك
والقضية تصير لصالحه
كتله اني هم مااريده يعرف
اخاف يكلي وكعيه
مثل ذيج المره
دنحجي هيج واجوي عمام اسامه
واسامه ومروان وياهم وعمتي
وحماتي وسن
كالت خالتي اجوي
علاوي كال هذول صدك ميستحون
والله اله اطردهم واطيح حضهم
أهم شي انت لادكولين حامل
لا لا اني اطلب منك لا دكول
لاتخافين
مااجيب طاري واعرف شلون اصرف
اصعدي فوك ولاتنزلين أبد
صعدت فوك لغرفة علاوي
دخلوهم
اسمع حجي وصياح
بس مدى افتهم شي
وره ساعه صعدلي حسون ابن علاوي كال عمه انزلي
اووي فديت عماتوا اني
نزلت
كال طردتهم ولعبت بيهم جوله
طحت حضهم لا وجماله اسامه
بكل صلافه يتوسل بيه
ويحلف ميكررها عباله
اني غبي اصدكه
خالتي كالت المره أمه توسلت راد
تصعد الج مخليتها
كتلها مريضه كتلها خاله زين تسوين مااريد اشوفهم ولا أريد اسمع شي عنهم

اسامه كام كل أسبوع يدز ناس
مشايخ وساده وناس خيره
بس احنه منقبل
إلى أن كسبنه القضيه واطلكت والحمد لله
بقيت بالبيت لازمه عدة طلاك
كبرة بطني دخلت بشهر السادس
فديوم اندك الباب الصبح
ابن علاوي كال مريه بالباب
تريدج عمه مريم
كلت اكيد اسو لو امي
طلعت كلت منو تفضلي
اتفاجئت بأم مروان خالتي
جايه
هي شافتني هم تفاجئت بحملي
كتلها تفضلي خاله
شبكتني وبوستني
خالتي ساميه طلعت
وهم كالت تفضلي
اول مكعدت كامت تبجي
وتشكي حال اسامه
ودكول والله يابنتي تمرمر بفراكج ويحبج ويريدج
والله يبجي بواجي عليج
وهاي تره رايح جاي من شارعكم يريد بس يشوفج
خاله فدوه رحمه لهلج سدي هالموضوع
اني نسيته وسامحته
خلي يفك ياخه مني
تره مستحيل ارجعله
يحلم بعد
زين انت شكد عليج وليش مكلتي حامل
والله خاله ردت يطلكني
وثانيا كلت خاف
هم يكلي ذبيه
لا مريم والله اسامه يحبج
هههههه خاله يحب الي يحب ميأذي حبيبته
خاله ابنج م دمرني موت الحب بداخلي
كرهني بعيشتي
فدوه خاله كوليله يكطع الأمل برجعتي وهذا الطفل ابني
ماانطيه أبد
وللحكايه بقيه
#ام_مصطفى
توقعاتكم بنات للقصه