ماذنبي انا للكاتبة ام مصطفى

١٥

#ما_ذنبي_انا
البارت 15
#ام_مصطفى
لليل اجه مروان واسامه
خالو دخل علي كال يله كومي اجوي حضري روحج
من سمعت اجوي أحس روحي انسلبت مني تندمت ماسمعت كلمة
علاوي ومؤيد وشردت من البيت
رغم انو متأكده حتى لو اشرد
امي سليطة ورغم كل المشاكل قويه واكيد راح تسبب مشاكل لعلاوي واكيد راح تشتكي عليه واسجنه
وإني ماريد اسبب لعلاوي مشاكل خصوصا صار عنده طفل وزوجته بوكتها هم حامل
جنت متيقنه امي محد يكدر عليها
وإذا صممت ع شي تسوي
امي جانت شخصيتها كلش قويه
ولا فديوم مره كدرت اطلع من طوعها
حتى خوالي احسهم يخافون منها ويسمعون كلامها
فمكان عندي حل غير انو استسلم لقدري وأقبل
كمت لبست عباتي ودموعي تجري ع خدودي
كمت أودع بغرفتي
إحساس يكلي رايحه للموت
مراح ترجعين
كمت اخطي خطي
عبالك طفل توه يتعلم المشي
امي جابت الجنط مالاتي الي هي
سفطتهن بيدها
وماشفتها نزلت دمعه منها علي
رغم دموعي الي مافاركني
يومين
خصوصا من قرب الموعد
صعدت امي الملابس
وصلت للباب جان جزداني بيدي
بي قرآن صغير وذهبي ومبايلي
مااعرف شلون جنت لازمتهن بيدي
صار بوجهي مروان خزرني بعيونه
كأنما يكلي راح ترحين للموت وراح اشوفج عذاب مشايفته
اسامه نفس نضرته بس جان بيها استهزاء
جان يبتسم بمكر
مجاهل دموعي وحالتي الي جانت واضحه للكل
جنت ارجف خوف وجهي مصفر وعيوني وارم جفونها بجي
صعدت بالسياره خالي جان وياي اخذوني لسيد عنده مكتب متفقين همه وياه
حتى يعقد النه
وصلنه خالوا كال انزلي نزلت
دخلنه
السيد كال شنو طلاك كولوا يا الله
جاوب اخوه لا زواج
كله شنو زواجيش
اشو الوجوه مكلوبه والله عبالي
طلاك
شنو المره مغصوبه لو غير شي
تره اذا مغصوبه  مايصح العقد
جاوب خالي لا سيد ما مغصوبه
بس تبجي ع اهلها وكذا
كال ها خير ان شاء الله
بده يعقد ويحجي وصل يمي كال هل تقبلين باسامه ابن كاضم زوج لكي
هزيت راسي
كال بابا جاوبي كولي نعم
رد عاد الجمله الي كتله نعم
كال الف مبروك
شهدوا خلي ومروان ع العقد وطلعنه
وصلنه للبيت خالي رجع
وإني دخلت للبيت
انقضت روحي من طبيت
تلكتني أمه كالبه وجها
كلت شلونج خاله
كالت لا هله ولا مرحبا
دنكت راسي ودمعتي نزلت بالكاع
اني أم مروان شايفتها دوم جانت تجي لبيت خالتي أم أيلاف
اشو خوش مره جنت اشوفها
اسامه يجر بالجنط
صاح عليه مروان عوفهن هي تجرهن وطببهن
باوع علي كال ذيج غرفتج
روحي فوتي ملابسج واطلعي
سوي عشه بدال امي
عرفت هنا اني راح أعيش بعذاب وراح اشوف ضيم
ومثل ميكولون الجواب مبين من عنوانه
دخلت الملابس
ونزعت عباتي
ورحت للمطبخ الي اشرلي عليه مروان دخلت
شافتني أمه خلت وطلعت
من المطبخ
لكيتها صاله الأكل بصينية
بس جبته واجيت خليته يمهم
أمه لكيتها تحجي شكو جبتوها
انتم شبيكم مو كتلكم مااريد اشوفها
خليت الصينيه ورحت للغرفه
كمت اسفط بهدومي
دخل اسامه علي قفل الباب
واجه اتجاهاي فاتح عيونه بحقد
ونافخ نفسه
بلحضتها كلت راح يقتلني
اول شي ضربني راشدي
وجرني من شعري
وكام يضرب
وراها بده يغتصبني اغتصاب
ضرب وغلط وحجي مينحجي
ومسبه ويغلط ع مرتضى
ويتفل بوجهي
كرهت نفسي بوكتها كلش
وراها كال عندج مبايل جيبي
أخذ المبايل كام يدور منو هذا ومنوا ذاك لزم المبايل كسره وكسر السيم كارت
كال انسي شي اسمه مبايل
وإنسي روحه لهلج
واصلا انسي شنو طلعه
اني جبتج انتقم منج كتله زين شنو ذنبي اني
كال اس اني مااريد اسمع كلمه منج لا خاف عبالج مزوجج لسواد عيونج
انت فصليه تعرفين شنو فصليه
يعني مثل عبد عدنه خدامه ملك النه سمعتي لولا
اه إحساس صعب يوصف بذاك اليوم تمنيت الكاع تنشك وتبلعني
تمنيت اني بحلم وافز وأكعد الكه ابوي عايش وكاعد يضحك بنصنه
بس الواقع صعب
لا هو حلم ولا اني نايمه
نمت بالكاع وهو ع الجربايه
الصبح كعدت ع صوت عمتي
يله كومي خاف مصدكه عروس
جانت حماتي موجوده ممزوجه
ومرت مروان هم
بس عمتي متقصده
تذلني من أول يوم
عبالك اني دازه مرتضى ع إيلاف
كتلها أي عمه كايمه
دخلت سبحت وطلعت لكيتها تبسبس وي اسامه بالغرفه
وكالت زين طلع عدهم شرف
افتهمت شتقصد
مشطت شعري ولبست حجاب
جاي اطلع
كال تعاي تعاي وين
كتله اساعدهم بالبيت
كال هذا ثوبج ضيك انزعي
والبس ثوب عريض
تعلمي مااحبه هيج لبس
كتله بس مابي شي طويل
وردانه طويله
اجه صار كبالي مااحب تردين
كلمه وحده اكولها متنعاد
بدلي البسي عريض
كتله اوكي
رحت نزعت وغيرت دورت ثوب كوه لكيت كل ملابس نفس القياس
الحمد لله لكيت ثوب بالمواصفات
لبسته وطلعت
دخلت للمطبخ
كالت سوي ريوك
سويت وخليت بالكاع الهم
عمتي كالت تعلمي
تاكلين وحدج بالمطبخ
كتلها صار
اصلا اني مالي نفس
عفتهم يكولون كمت انضف بالمطبخ
كمت جلفت المطبخ جلف
اسامه طلع اسمعه يكل لاخته وسن ديري بالج راقبيها زين
ماهتميت كلت حقه يشك
الي سوته إيلاف مو شويه
مرت الأيام وإني ع ها لحاله يمهم
تقريبا صار شغل البيت كله علي
وبناته التؤم علا وحلا عمرهن سنه ونص اني اغسل والبس وانومهم يمنه بالغرفه يعني مثل بناتي صاروا 
وعمتي تعاملني معاملة الخدم
ومرت حماي وحماتي نفس الشي
واسامه باليل ينكلب وحش علي
امي لا سئلت ولا خابرت
فديوم عرفت نفسي حامل بوشهر الثالث يعني من أول شهر عدهم حملت
سمع اسامه وكام وتخبل هسه اتذبيه اني مااريد طفل منج لزمني سحلني من الغرفه للصاله وكام يضرب ع ضهري وبطني
وكعي مااريده وإني اصرخ
وتوسل أريد أحد يفكني منه ماكو
جانوا بس يتفرجون عليه
وللحكايه بقيه
تفاعل بنات حتى أكمل القصه الكم