ماذنبي انا للكاتبة ام مصطفى

٢٠

#ما_ذنبي_انا
#ام_مصطفى
البارت 20
بارت مفاجئ لعيونكم

اجه اسامه للمستشفى
تلكاه علاوي أخذ منا الجنسيه
كله هاي هيه الله وياك
احنه لوما الإجراءات هيج
حتى جنسيتك مريدها
كله علي ليش هيج تتعامل وياي
ياأخي اني غلطان وجاي أعترف بغلطي
انطيني فرصه أخيره أصلح غلطي
جربني هالمره
كله علي مامستعد اخلي اختي بحقل تجارب
اني انطيتك فرصه وشنو صار
اجت اتموت البنيه
رجائا جوز من اختي
لو تبقى آخر واحد بالدنيا
مراح ارجعها الك
اني ممستغني عنها مرتين وصلت الموت بسببك
الثالثه بيها المنيه مثل ميكولون
كال بيش احلفلك اني تغيرت
وإني شاريها مستعد اوقعلك ع أي شي
يضمن حقها
علي كله لا توقعلي ولا تتوسل
الله وياك
مااريد اختي اشوفك وتهيج مواجعها وياك
بقى اسامه كاعد اباب المستشفى
وكل شويه متصل بخالتي
خلصنا الاجراءات وطلعنا
شفته كاعد
من شافني كام ونفض ملابسه
وبقى بس يباوع علينه
من بعيد
صعدنه علاوي بسيارته
ورجعنا للبيت
فرحتي شكبرها بعلاوي الصغير
فديته حبيبي يخبل
يشبه ابوه عبالك اسامه
صوره مصوره
كل يوم يكبر علاوي يزداد تعلقي بي أكثر واكثر
اسامه يخابر ويسئل خالتي علي
ويتوسل حتى احاجيه بس اني ماقبل
مااريد اكسر كلمة اخوي
كسرتها قبل وطلعته من السجن
ورجع نفس الشي
بعد مااكدر اسوي شي
حتى لو أحبه وأريد ارجعله
مابيدي شي الموضوع طلع من أيدي مثل ميكولون

قدمت أوراقي للكلية
ورجعت ادوام مرحله ثالثه
اسامه سمع تهستر
علاوي خلالي خط للكلية
طبعا الخط مختلطة بنات وولد
اسامه مشتري سياره
كام يوميه الصبح
الكاه منتظرني
اصعد بالخط هو ورانه بسيارته
يراقب ويباوع علي شنو اسوي
واطلع من الكلية الكاه هم
أول أسبوع أبد محاول يحجيني بس يباوع ويراقب من بعيد لبعيد فديوم خابرت امي وإني بالكلية
تبجي
يمه خير شبيج بيج شي كولي
إيلاف يمه الحكي اخوج مرتضى
شبي يمه
مرتضى انتقل ومات
شنوووووو
رغم اذيته الي
بس يبقى اخوي من امي وابوي
أحس نفسي كمت ارجف
واديه ورجلي ماتن
كوه ركزت
كمت ابجي الطلاب التمو علي
شكو شكو
كلت الهم اخوي مات
طبعا اسو هنا تخرجت
يعني ادوام وحدي ماوياي أحد
طلعت أركض
واحد من زملائي كال مريم اني اوصلج كتله اي فدوه لأن مدى أركز
والخط بعده ميجي هسه
كال شنو القصه صدك جذب
امشي
مااعرف ليش دموعي تنزل وابجي
لأن أحبه لمرتضى لو شنو
اخوي هذا لو مهما يسوي يبقى
ضلع من ضلوعي
ليش هيج سويت بنفسك مرتضى
ليش ضيعت شبابك هيج
طلعنا الولد كال تعالي سيارتي بذاك الكراج
رحت امشي وياه
اسامه شافني طالعه من بعيد
وشافني داى احجي وي زميلي
بسرعه فتح باب سيارته ونزل
اني استعجلت
كتله فده أسعد بسرعه
كال اي أي
اسامه عبر الشارع اني
فتت بالكراج
جانت السياره قريبه
صعدت
واسعد شخط السياره
اسامه أشر وصاح علي
وين محاجيته سويت نفسي مسمعت
اباوع راح ركض رجع لسيارته
كتله لا سعد استعجل
خطيه حرك السياره حرك
اسو خابرتني
كالت ولج وين انتي أسامة حركني
حرك يكول صاعده وي واحد
وطالعه من الكلية
كتلها هو هذا أسامة ميتغير ويبقى
شكاك ونيته سؤ دائما
وج احجي شبيج تبجين
اسو امي خابرتني مرتضى مات
دكول انقتل
يااااااااا
وج شلون
مااعرف انهاريت وسديته
راح اروح للبيت اكوله لعلاوي
سديته من اسو
أسعد وصلني لباب البيت
اشكرت منه وكتله يدخل
كال غير مره والبقيه بحياتج
نزلت للبيت
ابجي واصرخ
خالتي فزت شكو
علاوي نزل يركض خير
علاوي مرتضى مات انقتل شنوو
اي والله
منو كلج امي خابرت وكالتلي
خابريها خلي افتهم
اباوع ع علاوي صار وجهه اصفر ويرجف
خابرت امي منهاره وتبجي كلشي مفتهمت
تالي علاوي خابر خالي احمد وافتهم منه
مرتضى يشتغل بالمخدرات يبيع حشيشة
وحبوب كبسلة والشرطة مراقبته بالبصرة
تالي لازميه وشارد
ورامين عليه
وميت بمكانه
وهسه جثتة موجوده بالمستشفى
وايلاف مخابره امي وكايله الها
سد التليفون علاوي
وخابر عمامي انطاهم خبر
وكال حضروا روحكم
ولملمن غراضجن
راح اسوي فاتحه
راح نطلع للبصره انجيب الجثة ونجي
ونجيب مرته وجهالها
الي عرفته صاير عنده ولد وبنيه من إيلاف
التموا عمامي وخوالي
وامي جابوها ابيتنة منهاره عليه ومكسوره وتبجي
أهل إيلاف وعمامها بسرعه وصل خبر الهم
كالوا نروح وياكم نريد بتنه
طبعا الي سمعته حتى اسامه ومروان راحوا باعتبارهم ولد عمها
من سمعت اسامه هم رايح
مااعرف اوصف احساسي قهر غيره خيبة أمل ع انو اسامه أبد مراح يتغير ويبقى عايش ع الماضي
وللحكايه بقيه #ام_مصطفى