غازيه

3

#غازيه

_3_ قصص واقعية ل Nareman karm

كعدت الغبشه ورحت استرزق ابيع هلقاسمه الله لان ايجارنه قرب بيتنا الكحيان جنه مأجرينه ب70 درهم شغلي ع شغل امي وابوي وغازي مدبرينهه للعيشه.

جنت احب اروح يم الكليات ابيع الورد وباوع ع ذني شكد حلوات لابسات مال افنديات ومرتبات اضل حاطه السله بصفي وباوع عليهم. شكد جنت اتمنى اصير مثلهن والبس مثلهن. لبس الافنديه المرتب. مو انه ونفنوفي هذا مخيط الف خياط وعتيج. بس صدك دنيا تصعد ناس وتنزل ناس.

بعت جم ورده ورحت للسعدون لابو نؤاس ابيع..ابو نؤاس جان الشارع شكلكم جمال ونضافه. يكعدون بي بس الافنديه..ميوزه وكراسي نوب دخلت ع حديقه غازي مسوين بيهه مسبح وذني الافنديات الزناكيل كاعدات يشربن بطل كراش وناس تشرب جاي بكواب بيض مدوره شكد حلوه الدنيا هنا بدي ابقى والعب ويا جهال بس تاليتي شفت مره من ذني الافنديات كامت هيا وصاحبتهه من الميز وضل الكراش بي نص كلت خل اسوي نفسي افنديه مثلهن كعدت ع الكرسي وحطيت رجل ع رجل وقلد حركاتهن جريت الكراش سفطته كله اول مره اضوك شكد طيب وبارد يروي الكلب نوب ضكت الجاي ضليت كاعده وباوع ع ناس اجاني الكرسون كلي تحبين تشربين شي...

كرسون جان حلو يخبل لابس بنطرون وقميص خجلت كتله لا

كمت ع سريع خذت السله مالتي وكمت ابيع ورد..ورد..ورد غازيه ماكو منه...طبيعي ياورد..شترو مني جم واحد..رديت طلعت .

تمشيت صوب شارع الرشيد هم بعت يم السينما ..

وانه امشي التقيت بأمي..شايله كونيه بيهه خرك وجدر ع راسهه شفتهه رحت اركض..

سئلتني..

مديحه: ياا منو هاي غازيه شعدج هنا

غازيه: شعندي يمه غير جاي ابيع

مديحه: ياا وج اجابج يم سينما هنه وردات منو يشتري هنا

غازيه: لايمه ٢ اشترو مني هسا

مديحه: يمه هنا محد يشتري مو كتلج يم السوك بيعي يم الحدايق. يم المشافي.

غازيه: اي يمه غير رحت ماضلن جم ورده..وكتلني الحر والجوع

مديحه: دمشي وياي نرد للبيت عوفي ذني ع باجر بيعيهن

غازيه: خوش .جايبه اكل يمه

مديحه: تمن ولحم وهاي كونيه بيهه ملابس ماتريدهن ست بدريه..عود وديهن لنوسه الخياطه تصغرهن عليج

غازيه: يمه اريد اصير افنديه والبس ع كدي واكل اكل زين تعبت من هاي العيشه يمه

مديحه: يمه غازيه جنج شايفتلج شوفه....يمه لاتباوعين لفوك تنكسر ركبتج..مدي لحافج ع كد رجليج يمه.

غازيه: يمه ليش الله خلقنه فقره وذولاك افنديه وعدهم فلوس. جا احنه مو بشر

مديحه: يا استغفرك ربي...شجرالج مدهوره شو اليوم كابات عدج..استغفري بساع ترا الله يذبج بنار واحنه نروح للجنه انه وابوج وغازي وحدج ترحين للنار محد يكدر يخلصج.