غازيه

8

#غازيه

_8_

مر ع خطوبتي من ابو حميد شهر ونص جان كل اسبوع لو ٤ ايام يجي يشوفني ويجيبلي حلويات لو بطاله شربت لو فواكه ولحم وكلشي احبه يجيبه..اتقبلت فكره ابو حميد زوجي. بس مااعرف زواج شنو ولااعرف تفاصيله..عندي الزواج بس اكل طيب ولبس زين وذهب وبيت جبير..

صادف شهر رمضان وصيف حاره صمت انه واهلي الضهريه اترس المبرده ماي وشغلهه ونام كبالهه وكل لامي وكت لفطور تكعدني حتى لااعطش ولااجوع...ابوي جان صايم ويطلع للعلوه يحمل مخضر يرد هالك وتعبان يكعد بلحوش ع طابوكه ويصيح ع امي تذب عليه طاستين ماي بارد ويجي يلف راسه وينام..بس غازي جان فاطر لان جاهل صغير ويتعب بلعلوه....

العصريه اكعد شابعه نوم وروح يم امي اشوفهه شسوت اكل المصيبه من جنت أصوم كلشي اشتهي كل الاكلات كون اريد امي تطبخهه

مديحه: ها يمه غازيه كعدتي

غازيه: اي يمه. شسويتي فطور

مديحه: يابسه وتمن وهاي دجاجه مشويه دزهه ابو حميد هسا.

غازيه: يااا بس هاي دزهه. كبر كبر فاهم.

مديحه: ياا ولج شمالج شتردين لعد

غازيه: يمه انه صايمه ومشتهيه بقلاوه كون اكل سمج قوزي دولمه هبيط وحلويات

مديحه: يااا كل هذا تاكلينه انفجعتي يغازيه

غازيه: اي يمه ولله جوعانه وكلشي مشتهيه

مديحه: اكلج باجر يجي أبو حميد يفطر يمنا انه عزمته..شوفي من يجي تكعدين يمه وتكليله ع البيت اليكعدج بي كليله لازم اشوفه انه وامي ونجيب غراض ونشوفه حلو لا

غازيه: اي يمه خوش.

غازي: يمه شوكت تحطون فطور جعت

غازيه: ع اساس انت صايم مو الضهر لفطت غده

غازي: اي جعت ارد اكل وياكم.

مديحه: عوفي شرايده منه خل ياكل الف عافيه..هسا يمه حبيبي صار الغروب خل يأذن ونصب فطور اروح اكعد ابوكم

هذا جان اول يوم رمضان وصمنا حطينا الفطور ولجوارين برمضان جانو يدزون فطور بيناتهم بيت ام ناديه دزولنه دولمه ودزينالهم تمن ويابسه وبيت ام كضومي دزولنه باميه بلحم وهم دزينالهم. وبيت ام نبيل دزو كبه..وقسم تمر ولبن الحمدلله سفرتنا انترست...ابوي متعود ع سطح ناكل بي رشينا ماي وفرشنا بساط وصعدنا فطورنا ع الهوه البارد وفطرنا...ابوي ضهر من اجه جاب ركيه حطيناهه بثلاجه تبرد. وماي بارد ثلج شربنا. جنه محرومين من الماي البارد.

الحمدلله فطرنا وضلينا نسولف نوب نزلت شغلت تلفزيون جان طالع فلم مصري  قديم. باوعت وجو اهلي كعدو يباوعون وحفضنه اسماء الممثلين القدامه عمر الشريف عادل امام عبد الحليم حافظ وشاديه وفاتن حمامة ذوله حفضت اسمائهم وعرفتهم لان جانت افلامهم يعرضوهه...ابوي جان يروح ورا لفطور ياخذ غازي ويرحون للكهوه يلعبون محيبس جانو نازلين بطوله فريق ابوي ويا فريق من للكاضميه واليفوز يطو صينيه زلابيه..وجان فريق ابوي الفاز رجعو هوه وغازي وجايبين زلابيه وياهم الي ولامي بدهن الحر..تخبل ب١٠ عزل التلفزيون. ولعالم لان رمضان كلهه بره كعدنا بلباب نسولف ويا نسوان جوارينا...جان تمد راسهه كريمه بت ام حميد. واختهه سعديه