غازيه

9

#غازيه

_9_   زواج غازيه

ابو حميد من بعد ماراحتله امي رد لبيته وكضب بناته وكتلهن وتعارك وياهم وجابهن لبيتنا خلاهن يتعذرن مني. وكلهن اذا اسمع تحجن عن غازيه لو وحده بيجن تحجي بشرفهه ياويل ويلهه...

مديحه: حل ولله عاشت ايدك ابو حميد ميجن غير بلعين الحمره..العوانس امهات الكمل

غازيه: اي ولله هسا يلا برد كلبي منهن. عوذه الغيره موتتهن مني

مديحه: اي يمه جا ليش ميغارن اصغر منهن واحلى وتزوجتي وهنه بعدهن ع كلب امهن محد يكلبهن.

غازيه: عوفينه منهن يمه. خيولن. اكلج يمه شو ابو حميد جنه غلس ع سالفه البيت.من حاجيته بلمزرعه كال بس نرد لبغداد وسواهه سكته..خاف مايكتب البيت بأسمي

مديحه: لا شنو بكيفه..غير يلتزم بحجايته. عوفي جم يوم وروحله.

بليل صعدنا بسطح كنسته ورشيته ببريج ماي ونكتنا الجودليات وفرشناهن. اجتي أم ناديه من يم ستاره سطح تحجي ويا امي  وشكال ابو طبر وشحجه ابو طبر. تكلهه طافر ع سطح بيت اختي بنعمانيه وبت اختهه شايفتهه وصايره بيهه صدمه مخلوسه. وخلت امي بس تكمز من الخوفه بس انه ولاهتميت لان هواي اسمع يروح بس ع زناكين. لهناك صحيت من صفنتي

يااا عزه العزاج غازيه بعد جم يوم وتزوجين ابو حميد وتصيرين زنكينه وبيتج لحالج. بالله ذيج ساعه وجاني هذا الملعون كتلني واخذ فلوسي وذهباتي شسوي منو يلحكلي وفاهم شايب..لالا جا ابو طبر عافهه كلهه يجي عليه شني هلحظ الاسود. والاغبر

مديحه: يمه غازيه شوفي منو بلباب

غازيه: صار يمه نازله

غازيه: يااا منو وياك شمالك تبجي

غازي: عوفيني معليج

غازيه: خايب احجي منو عايل بيك ولله هسا اموته كول غازي

غازي: تعاركنا علمود الطوبه ونركعت باب بيت ام عصام ولاحتني بلعصه مالتهه اجت بضهري

غازيه: ياااا سرطان بيهه العجيز امشي وياي إلا العب بيهه طوبه.

مديحه: يااا شمالك يمه. شبي اخوج يبجي

غازيه: يمه هاي العجيز ام عصام ضاربته بلعصه ع ضهره لان طوبه راكعه بابهم

غازي: همه جماعتي كلهم شردو كضتني الي وضربتني ع ضهري. اخ بويه ضهري موتني. اخ يمه

مديحه: اطيني عباتي غويزيه هسا رايحه عليهه اسحلهه من خلاجينهه

غازيه: اوكفي يمه اجي وياج

مديحه: لاخليج هنا بس انه رايحه

بعد ربع ساعه اجه ابوي وطبب امي للبيت تعاركت ويا بيت ام عصام

مسعود: فوتي يامره فضحتينه بصوتج شجرالكم من بيت يوميه طلايب ويا الوادم