غازيه

21

#غازيه

بقلم ..Nareman karm

_21_

جوز منهم لاتعاتبهم بعد جوز...
شلك عدهم ناس ماعدهم عهد جوز..
احنه ربينه وتعبنه وشفنه لوعات وقهر..
واحنه بارينه وشربنه كاس مر من الزهر..
جوز منهم لاتعاتبهم بعد جوز..
من هواهم شاب كلبي وشيبت..
ومن جفاهم الف مكتوب كتبت..
يعلم الله شكثر من شوكي حزنت..
هاي هم قسمه وعد جووووز منهم...

...

من رحت لنضال دلتني على شكم بيت بمناطق راقيه مثل المنصور والسيديه وشارع الكفاح..وضباط. يردون خدامه
كلت ارجع وكل لامي احسن ماكاعده..
لان ادري بعد يومين راح يرجع عزت يخابرني..
ويريد مصروف..رغم حلفلي وكلي بعد مااوصل
لذيج المنطقه وتعذر..بس كلبي مامرتاحله..

مديحه: ها يمه رحتيلهه لنوسه..

غازيه: يايمه نوسه متزوجه وعدهه جهال..
بس لكيت اختهه نضال بلبيت. وكتلهه على شغل
طلعت هيا تشتغل بلبيوت..فدلتني على شكم بيت
باجر اروح وياهه تعرفني على المره صاحبه البيت

مديحه: يايمه الله يغازيه الله ينطيج العافيه
طول عمرج تركضين منا ومنا. لو بيه حيل
وقوه مثل كبل جان انه كمت شتغلت..
اااخ منين اجيبن الحيل راح ويا العزيز

حسنيه: غازيه شراح تشتغلين. ،؟

غازيه: خدامه خيه. انضف بيوت لاصحابهه ويطوني المقسوم

حسنيه: جا انه هم اريدن اساعد بلعيشه
وكلت شتكول عمتي وابو نعمان لو اخبز
للجوارين. لو نشوف ابو مطعم نبيعله خبز..؟

غازي: بارك الله بيج يابنت الاصول..!
انه راح اروح على جم مطعم اتفق وياهم..
واوديلهم الخبزات.

مديحه: عفيه يمه عفيه..تساعدو تره العيشه كشره
وعلى غفله ماندري لانه صاير حصار ويكتلنه الجوع..
..

ثاني يوم الصبح رحت على نضال.
اخذتني لشارع الاميرات بلمنصور..
عرفتني على ست نسيمه ام البيت مبينه طاكه وزنكينه ومثقفه ..
كلتلهه هاي جيراني من عمر وجانت تشتغل
هيج كبل هاي شغلتهه. وامينه ونضيفه..
بديت بشغل من اول يوم..على تنضيف وتعزيل
وطبخ..بيتهم شكبره. معلكه صوره لرجال لابس
عسكري سئلتهه كالتلي هذا ابو مناف يداوم باركان الجيش
وكعدت تسولفلي على ابنهه بلكليه..وبتهه متزوجه.
وهيا مديره بالاسواق المركزيه. مال كراده..

..

ست نسيمه : ماشاءلله ايدج سريعه بشغل وشاطره
من زمان ادور على وحده مثلج .يعجبني هيج شغل..

غازيه: اشكرج عيوني ست ربي يوفقج

ست نسيمه: شوفي ام عزت. اني بصراحه مافوت
اي كان لبيتي لان ماأمن لأي احد. بس
من حمدتلي بيج نضال. وشفت شغلج نضيف
عجبتيني..وماريد يوميه وحده شكل تجي
تنضفلي..اريدج ثابته ويايه. واذا صنتي الامانه
وحافضتي عليهه مااقصر وياج. ها شكلتي؟