غازيه

6

#غازيه

_6_

كملنا شغلنا بيت ام نادر. وطلعنا واحنا دنمشي سياره النجده واكفه يم بيت بفرع بيت ام نادر. واسعاف تطلع جثث لمن سألنا كالو ابو طبر فايت ع بيت بشير احمد سلمان مدير شرطه كركوك متقاعد وكاتله هوه وابنه ومرته وابن اخت مرته جاي زياره عدهم. خطيه نايمين بسطح وكاتلهم..حتى ابنه الصغير فاشك راسه بطبر....يبوي المنظر الشفته انه وامي رجفنا رجيف....

طلعنا نركض من الفرع نخاف لا ابو طبر يشوفنا ويلحكنا. ردينا لبيتنا واحنه تافلين المر من الخوف والهبطه..

مديحه: الله لايوفقه هلملعون ادري شرايد من العالم ونازل عليهم بطبر تطلبنه طلابه هسا كتلت المره ورجلهه. هذا جاهل بالله شنو ذنبه خطيه. يبو يتراولي غازي بيوم شفته..يمه اسم الله ع وليدي

غازيه: يمه بعد ماروح وياج لذيج المنطقه..بالله لو فايت ابو طبر ع بيت ام نادر وكاتلهم ولنه كاتلنه وياهم. ماريد اموت يمه عفيه شفت من دنيا

مديحه: ولج يمه هوه انه بعد ماروح هناك جزت روحي من الشغل هناك...يمه غازيه اطيني شربه ماي من الحب. نشف حلكي

غازيه: هاج يمه. شربي

مسعود: الله يساعدهم

غازيه: هلا بويه ويساعدك جا وين غازي

مسعود:  هلا بويه غازيه..هذا اخيج شاف جهال بيدهم طوبه عافني وراح يلعب. شمالهه امج لونهه مخطوف

مديحه: هلا مسعود..شمالني جا زعت العافيه من شفته اليوم
.جا غير هذا ابو طبر فايت ع بيت كبال بيت ام نادر وكاتل اهل البيت كلهم وهمه نايمين. حتى جاهل صغير كاتله

مسعود: لا لا يعني سالفه صدك....سمعت طراطيش حجي اليوم بلعلوه كالو فايت ع عايله وكاتلهم بطبر وبايك بيتهم...لاحول الله..شني هلبشر هذا شرايد من العالم.

غازيه: بويه جا ماشفت الشفناه انه وامي شلون الاسعاف يطلعون بجثثهم من لبيت ودمايات يبووو..ماسولفلك بويه انه كمت امشي وزوعت مصاريني من الخوفه.

مديحه: اي ولله يابو غازيه..الشفناه مرعب بحياتي ماشايفه موته وهيج مكتلين..بس ليوم صارو كبالي..يمه  شسولفلك تجي عليه..رجليه ماحملني بس اريد اطلع من المنطقه

مسعود: بويه سترو علينا وبعد لاترحون هناك تخدمون..واذا كلش كلش ماكو شغل  بس بذيج المناطق كعدو وسكتو. بس انه وغازي  نشتغل.

مديحه: لا جا هوه انشالله ماضل شي وتتسهل غازيه وتتوكل لبيت رجلهه

مسعود: ها....شني منو مشي ع غازيه

مديحه: ياا شمالك نسيت ابو حميد رايدهه. وهيا وافقت

مسعود: اكيد وافقت لو ضغطتي عليهه وجبرتيهه..مو انه اعرفج......بويه غازيه تعاي يمي.