غازيه

13

#غازيه

_13_  بقلم Nareman Karm

ايام سوده شفت  من مات فاهم وطلايب ماتخلص ويا صبريه وحميد. ويوميه عركه زهكوني..كل يوميه ثلاثه جايبه اخوتهه ويهدون علينا...ع ابو البيت هذا من حكنا وراحو للقاضي اشتكو ع اساس فاهم باخر ايامه خرف واني قشمرته وخليته يكتب الاملاك باسمي..و ع اساس الطابو مزور. ويوووو شكال الوان سو وحجو فشلت كل حججهم لان الحك وياي وكلشي رسمي عندي...

اهلي عافو بيتهم وجوي كعدو وياي واجرو البيت. جنا كاعدين بليل ع تلفزيون طلع بيان عاجل. وطلع المذيع يحجي انو الشرطه لزمت ابو طبر ويا اخوته ومرته وابن اخته. ونحكمو بالاعدام بعد ماعترفو بلجرايم السووهه ذيج الليله الناس كلهه فرحت وزال الشر والخوفه ورجعو ينامون بسطوح ولبيبان تبقى مفتحه بليل جان امان محد يسترجي يسوي شي وكفو بكل منطقه سياره نجده توكف براس الفرع يحرسون جانت دنيا بخير وامن وامان وريس الله يحفظه نزل بلبطاقه التموينيه زيدهه دجاج ومعجون وجاي. فوك التمن ولطحين ولشكر والعدس...نعمه جنت كل شهر اروح استلم حصتي وحصه اهلي جنا نضم شي يكفينا ولباقي امي تروح تبيعه. ولفلوس تضمهن مصرف لغازي من راح للجيش تعلم يدخن تتن. وربه شوارب وكبر وطول يخبل جان من ينزل اجازه من لجيش يجي ع بيتي بلكراده لبنات ياكلنه اكل بعيونهن بس جان يستحي ولايدير بال  جان هيبه سوده عليه ..انه هم كبرت صار عمري ٣٢ سنه عزت صار بلسادس ابتدائي وجان داخل ع بكلوريا وامتحانات. اباوع عليه ذب كل حيله ع الدراسه اجي اكله يمه ارحم نفسك ع كيفك الكتاب ماطاير..يكلي يمه اريد احقق حلم ابوي وصير دكتور..وانه من جنت اطلع انه وامي تصدف عدنه شغلات نخلصه مثل سوك لو دكتور. يشوفوني شكد عالم ويجون يتقدمولي بس جزت نفسي من الزواج عكب فاهم الله يرحمه كل همي شلون اعيش انه وابني بهلدنيا...

مديحه: شبي هذا الجايج يايمه شو مهندس وعليه العين ليش ماقابله.

غازيه: يايمه انتي من كل عقلج بعد هلعمر اتزوج مره ثانيه وعكب ما عزت كبر اجيبلي رجال غريب للبيت وتدلع كدامه...غدي ماريد

مديحه: يمه انتي بعدج صغيره عيشي حياتج واذا ع عزت اني ادير بالي عليه وابوج موجود مايقصر

غازيه: يمه رحمه ع اهلج سدي الموضوع. كتلج ماريد يعني ماريد..............خل اشوف الباب

غازيه: هلا بدلال ام سوسن.

ام سوسن: بلمهلي خيه ام عزت. شلونج شحوالج هاي عصرونيه هسا سويته وحار. خبز بلدهن عليه شكر عليج بس الجاي ابو الهيل

غازيه: مو تدللين فوتي فوتي كعدي يم امي بلحديقه بين ماخدر الجاي

ام سوسن: شلونج خاله مديحه

مديحه: هلا بدلوله. شلونج فريخاتج شلونهم

أم سوسن: يبوسون ايدج خاله. الحمدلله زينين هسا كملت قرايه وتدريس. كتلهم روحو لعبو. بين ماروح اطمن ع خيتي غازيه