#غازيه
بقلم Nareman karm
17
من خلصت حرب ايران اخوي غازي كمل الخدمه وراح تطوع بلجيش صار جندي. رغم توسلات امي بي ميروح بس كال احسن ماكاعد لاشغل ولاعمله..اصيرن جندي..واعتمد ع روحي....وشفناله مره يمنا بلناصريه..زوجناه اسمهه حسنيه جانت خوش حسنيه. نادره وشاطره وتحوف الشغل حوف غازي جان يروح يلتحق وينزل اجازه كل شهر يجينه..وصار عده ٣ جهال نعمان١٤ وريسان١٣ وبدريه٨ سنين ..جان يموت ع بدريه بته هيا شلون بدريه جنهه العافيه حليوه وشكره. يكلون طالعه عليه...هواي يشبوهه بيه...بتسعينات .عزت كام يداوم بغداد طلعله طبيه داوم سنتين هناك وكعد بقسم داخلي للطلاب هم جان كلبي نار عليه...يجيني للناصريه كل نهايه اسبوع الخميس العصر ويرجع السبت...كبر عزت وكبرت مصايبه وياه وكبر همي..وشيب ترس راسي..ابوي صحته صارت ع كده..وبيت أم سوسن من اجونه وكت الحصار. ضلو ٦ شهور بلمزرعه يمنا بعدين ردو..
غازي تسرح من الجيش من حتلو الكويت لان تصوب بضربه قناص وجت الضربه يم كلياته..نقلو لمستشفى عدنان خير الله نومناه وشدوله بلاتين..وراهه طلعناه بس سوده عليه ضل يعرج شويه من يمشي ومايكدر يكعد مثلنه عدل مرته تسفطله مخاد ينتجي عليهن صفح يلا يكدر يكعد...بس دكي وشكي جان عزت ابني يلي ماجنت اعرف من يكبر راح افقد السيطره عليه...ولا جنا نعرف السر الضامه ابوي علينه ونكشف بعد ٣٠ سنه...
مسعود: بويه انه باجر امشي لبغداد اجيب ايجار البيت. شعدج غريضات اوديهن لابنج
غازيه: اي بويه هاي فلوس تطيهه اله وكله امك تكول اقتصد بيهن لاتبعذر فلوسك منا ومنا اصرف بس للضروره ..وهاي ملابس جبتهن اله من سوك. ودبه دبس وكليجه وحليب جاموس.
مديحه: شنهي وليدج وين يودي الفليسات ماصار سبوعين ونص من اجه وطيتي ٢٠٠ دينار...كلبي لاعب من ابنج يغازيه
غازيه: يمه شمالج لاتجفليني. عزت عليه بدراسته وبس .وبغداد غاليه. هوه كلي مرافج كله ولد مسؤولين بدوله ويطلعون ويصرفون..جا تردينه يتفشل جدامهم
مسعود: شمالج يامره ع الولد عزت ولدنه وربه ع ايدنه. ونعرفه شني ماشني بسج من هلخريط..انه فايت انام باجر من الغبشه اركب سياره وطلع
حسنيه: صباحج الخير عمه
مديحه: هلا يمه صباح النور
حسنيه: عمه عجنت من الفجر والعجين تخمر رايحه اخبزه بلبراح حتى الحك ع عمي ياكل خبزات حاره بس عينج ع الجهال وبدريه لاتكعد تبجي وتكعد ابوهه
مديحه: عفيه بحسنيه روحي يمه ..ماعليج انتي..انه هنا
ريسان: صباحج النور جده
مديحه: هلا جده صباحك ورد...جده ريسان هاك هايه فليسات روح جيب كيمر عرب من ام الكيمر البراس سوك
أنت تقرأ
غازيه
قصص عامةاحداث القصه وقعت لامرأه عراقيه في فتره الستينات والسبعينات واين وصل بها الحال من بائعه الورد إلى ام تشقى وتتعب لتربيه ولدها الوحيد. قراءه ممتعه لغازيه
