غازيه

7

#غازيه

قصص واقعيه لNareman karm

_7_ خطوبه غازيه

بعد سبوع من العركه بينا وبين ام حميد...ابو حميد جاب شيوخ واخته الجبيره. هاي تكره ام حميد وماتحجي وياهه هيا اجت ويا خطبوني وعقدولي ..وحطلي حاضر مليون درهم. ولغايب ٣ مليون درهم.....ماصدكت هلكد العقد مالتي فلوس هواي. وجابلي كيلو ذهب. من بتوت وحجل واساور وكلايد ومحابس وتراجي..لبسوني..ضليت فاتحه حلكي انه وامي مامصدكين..

كعدنا الصبحيه ونضفنه طرمه وابو حميد دز بسط وكراسي جابهن الصانع اليشتغل عده. ودز صندوك بطاله شربت وجيس جكليت وباكيت بيتفور وبقلاوه .حتى اماعين دزلنه لان يدري بيتنا فارغ.

نوب اجوي الزلم وابوي ستقبلهم. طلب دشداشه نضيفه من صاحبه سوده عليه. حتى يكشخ بيهه وعكال اخته جابتلي
بدله ورديه جابوهه من سوك الاورفلي كلش حبيتهه بيهه تول ابيض .وطوك ورد وجتي الزواكه للبيت ابو حميد دزهه زوكتني وحفتلي وكوت شعري بالاوتي لبخاري صار ناعم ...لان كبل مو كلهه عدهه شسوار..

باوعت ع روحي بكسره مرايه جايبتهه وياهه زواكه..طلعت مو غازيه...

مديحه: كلللللللللللللللوش يمه صلوات ع نبي طشينا حب ولبلبي....وعرس غازيه هيل وطش بلولايه...وهذا دبجنا لاتكول ستهتار....تكابلن امي وخاجيه اخت ابو حميد يهوسن ويدبجن ويسمعن بيت ابو حميد...

خاجيه: صلو ع نبينا والعين ماتجينا..وفصوص روبه ياكفاهه منين دورهه ولكاهه....جا هيج النساوين لو بلاش تستاهلين يغازيه من اخوي متخبل عليج وجابلج هلكثر ذهبات....خل يسمعون العذال..جنتنه ماكو بحلاتهه..ههههههههههههه

مديحه: هههههههههه ولله عليك سوالف خاجيه..جا تلكين هسا ام حميد وبناتهه من شبابيج مكرفصات وكاعدات يتصنتن.

خاجيه: خليهم شمالج...خل يسمعون اخوي شلون مدلل مريته ويحبهه.....خل تموت ام العوانس الحيه المسمومه. شوفي من خباثتهه وحقارتهه محد دك بابهه ع بناتهه حد معنسن وكعدن يمهه....هاي حوبتي وحوبه امي الموتيهه بقهرهه ع فاهم ابو حميد

مديحه: جا شني صاير خيه..شو مقهوره من هاي ام الصيبان شمسويه مكسوره وياج.

خاجيه: كولي شسوت من مصايب جانت كاعده ويانه حركت لبيت من مشاكلهه وجذبهه وتنافق يم فاهم ع امي وعليه و ع اخواني..وخلت فاهم وخوتي. هيج صارت بينهم..واخر شي تزاعل ويا امي الحجيه. هلحجي جان عده بس حميد وكريمه بته جانو جهال..تلاغه ويا امي علمودهه وتوسلت بي طلعت ورا للحوش وهيا جانت مره مريضه تمشي ع عصتهه جلبت بفاهم وتتوسل ماقبل يرد للبيت ولامرته رضت المسمومه وخذهم وطلع..حد ما سمع امي ماتت. اجه مثل لمخبل ذب روحه ع تابوت ويملخ بروحه..ومحد من اخوتي لهذا ليوم يحجون ويا...فد انه صالحته لان نقهرت من اجاني يتوسل ويبجي ع امي..بس ضليت شايله ع ام حميد ولا بيتهم معتبته لهذا يومج.