غازيه

16

#غازيه

بقلم Nareman karm

16 حرب الخليج الأولى

بعد ما عفنا بغداد وجينا كعدنا بلمزرعه الكتبهه باسمي ابو حميد الله يرحمه.بناصريه ...عشنا عيشه حلوه هنا يم العرب..ويمنا ناس عرب وعشاير يحمونا ولو هوه امان كبل بس هاي التصير مرات عداوات بين الكرايب لو الغربه. لااكو ارهاب ولا بتفجيرات. جانت سياره نجده توكف براس الفرع تحرس منطقه بحالهه ولليل العالم مفتحه بيبانهه محد يخاف.....واحنه مزرعتنا عايشين بخيرهه. بيهه مخضر وجم شجره فاكهه ونخلات تمر...وهلبطات ودجاجات يسرحن..نعمه.لحد مابدت حرب قادسيه صدام..حرب ايران سنه 1980...اخوي غازي طلبو الوحده مالته ونصبنا مناحه وبجي عليه..حتى ابوي لان جانت حرب اليروح منهه لو يرجع عايش لو محمل بتابوت....الفجر ودعنا غازي وشبعنا بجي..باس راس امي وراسي وصاني ع امي وابوي خاف مايرجع بعد.....وراح التحق لمعكسر التاجي. مناك ويطلعون للاراضي الايرانيه ....

سئلت ابوي بويه ليش هاي الحرب صارت...كلي بويه ايران راسمه حدود البصره وتريد تاخذ شط العرب وبصرتنا غنيه بلنفط وكلهه طمعانه بنفطنا . ولأن إلريس وقع ميثاق الدفاع العربي بسنه 80 ايران خافت لايستهدفها وعتبرو صدام تهديد عليهم ..فكامو يحركون جنودهم ويقصفون بلبصره...لحد ما الريس جمع جنودنا ودباباتنا وتحركو لحدود ايران ..بتلفزيون بليل نباوع يعرضون جنودنا شايلين العلم العراقي وكل مايطبون منطقه بايران ويقصفونهه يحطون علمنا ويبوسنا. وحركو علم ايران....نوب طلعو الريس بساحات المعارك يفتر ع جنود ويشجع بيهم. ولازم دبابه ويقصف ع جهه ايران.....نوب طلعو علي عبدلله وياس خضر ومطربين كومه يغنون ياكاع ترابج كافوري ونسوان تهلهل..يشجعون بجنودنا ويحفزونهم.علمعارك......

نوب طلعو الريس يحجي ..(أيها الشعب العراقي العضيم ايها النشامى في قواتنا المسلحه المجاهده ايتها العراقيات الماجدات ياابناء امتنا المجيده..)    خطب ابو عداي ذيج الخطبه ع ايران وكال شواربنا نزينها اذا رجل ايراني داست كاعنا واحنا تحتلنا واحنه ساكتين..كافي مهانه وقبول بلذله ليسقط العملاء الخونه .وختمهه آخر شي ب الله اكبر وعاش شعبنا العراقي المجاهد  عاش النضال المشترك ..عاشت امتنا العربية الاسلاميه. امه عربيه واحده..ستمرت الحرب ٨ سنوات خلصت وكلنه ارتاحينه وراهه بدت سنه ال٩٠ وبدت حرب الكويت...

وهنا بده الحصار ..لان كل التموين ولدعم جان يندز للجيش العالم كتلهه الجوع كامت تخزن مواد ..واحنا هم كمنا مانبيع بلحصه نضم رحنا انه وابوي للسوك نجيب بعد مسواك ونضم بس وين ماكو كلشي مخلص..لان اول ما بده الحصار جبت مجمدتين عشتار وترستهن لحم ودجاج وجمدنا باميه وطماطه....نوب الغاز صعد وكام مايصرف..العربيات كالن لامي ابني تنور طين وخبزي علحطب مثلنه. لان هنه مايخبزن علغاز.....وسوت امي بركن المزرعه بنص الحشيش  جابت طين وكعدت تسوي بي لحد ماكملته وصار صدك تنور...وعفناه جم يوم بين ماينشف علشمس ويصير قوي...من شلت من بغداد كل هاي الفتره ام سوسن مانقطعت علاقتي بيهه جبت تليفون ارضي للمزرعه ومدينه واير علتيل الكبالنه ربطنا..وجانت يوميه تخابرني وتكلي فاكدتج..نوب سئلتهه علبيت كالت حميد كعد بي وتزوج وحده مركضته ليل ونهار..