غربة روح

بارت 12

#غربة _روح 🌸

#Nabá _baqer🌸

البارت الثاني عشر 💬

•° ❤°•    •° ❤°•   •°❤°•

خوف ورهبه و مغص ولويات كلها جتمعت عندي من اجه وكعد يمي ..
والاصعب من رفعت راسي وصارت عيني
بعينه ...
مشفت اليطمني ويهدء من موجات التوتر والخوف الصارت تتسارع علي ويه كل لمسه
منه وهوه يلبسني ..
شفت بعيونه ضلام و ضياع ..
ضياع ضيعني وياه وخلاني اشرد بفكري
والافكار صارت تتزاحم بدماغي وكمت
وحسبه جيبني وحسبه توديني ...

جنت اتمنى اشوف نظرات فرح ولهفه مثل
ماكل عروس تتمنى تشوفها بعيون عريسها

وهذا الشي خلاني اخاف اكثر واطلب من ربي يعفيني من مواجهه مستقبل صرت احسبله
الف حساب ....

اذا بالخطبه وهاي نظراته وهذا بروده لعد
الله يسترني من الجاي وشنو
راح اشوف بالزواجه هاي ....

فزيت من شرودي على هلهوله طكتها ام
ادهم ...فزه خلتني انتبه على نفسي ..
ولكيت ادهم او عريس الغفله مخلص تلبيسي
الذهب وكايم وعايفني وحدي ...

بعدها بقو اهله شويه وراحو ...

وانه بعد ماتحملت ابقه بالبدله اكثر حسيتها
تخنكني وطلبت من ايه و اختي يكومني

حتى ابدل واذب الذهب الخنكني ..
وحسيته حبل اعدامي وملفوف على ركبتي ..

ايه :
روح انطيني البدله احطها بجنطتها وانتي
روحي غسلي حته تفتحينو لشعرج وتتعشين

دحجي  وجهج شلون صار اصفر وراح توكعي
علينه من البارحه انتي محاطه لكمه بحلكج..

ام مازن :
ايي يمه جيبيلها لكمه تسند طولها بيها
خذت حيلي كاطعه الزاد من البارحه ...

روح دنكت على امها وباست ايدها وحجت ..

اسم الله على حيلج يمه ..
لاتحجين هيج وتظوجيني انه ماشتهي الاكل
من اجوع اكل وامسح الجدوره بعد ...

ايه :
ماكو هيج حجي هساع احط الاكل تاكلينو كلو وتشربين العصير ..
شوفي وجهج شلون صار ليمونه ...

ام مازن رفعت اديها وصارت تدعي لايه من كل قلب ولسان ..
والله ياام شاكر بنتج هاي ماعرف شلون اجازيها من اجت لليوم وهي شايله البيت
بالصلوات وحتى هاي الطفله تعلمت عليها

وصارت ماتنام الا بحظنها ...
كون اريد من الله ونبيه واهل بيته ينطيها
الحظ والتوفيق ويفرحج بيها وتشوفين جهال
جهالها ...
ايي والله عبنها تستاهل كل الخير ...

❤________________________❤

ايه :
طلعت للمطبخ وانه شايله سما واسولف وياها
نزلتها على الميز وكفت اكبالها على الطباخ