#غربة _روح
#Nabá _baqer
البارت التاسع والعشرون 💬
----*---*---*---*---*---*---*---
كاعد اشرب جاي وكلتلي امي خبر هدم كل احلامي ومخططاتي ...
-يمه سيف اعرف انته توك جاي تعبان بس لازم اكلك مريتك بدت تتذكر وصالها يومين
تسأل عن اهلها و واحد اسمه جون ...
هيه كالتلي هيج لوانه عبالك كالولي راح ناخذ روحك منك ...
كمت بسرعه طفرت ...
-يمه هيه وينها هسه ..زين شتذكرت ...
مانتظرت امي تجاوبني وطفرت فوك سويت الدرج شبختين وانه اصيح ...
مياااسه مياااسه ....
فتحت الباب لكيتها غافيه بفراشها والغرفه دافيه وظلمه بس ضوه التيبلم ضاوي يم راسها ... وانه بالكوه اخذ التفس من الركض تقربت عليها وكعدت بطرف السرير وبقيت اباوعلها شلون نايمه مثل الملاك ...
مديت ايدي وكمت امسد على شعرها واحاجيها بقلبي ......
-ابنيتي ..وحبيبتي ..ومرتي .. صدك تذكرتي
يعني شنو ..يعني راح تتاذين وتبجين وتزل درر عيونج الحلوه ...زين من راح تعرفين اهلج كلهم ميتين واخوج ماتحمل وهج شلون راح تتصرفين راح تتقبلين الموظوع ..لو ترجعين تنتكسين وتتعب صحتج ...
زين راح تقبلين اتقربلج واواسيج وامسح دمعتج واوسدج بحظني وانسيج ....
لو راح تصديني وتعوفيني ...
صدكيني ماتحمل فكرة انو تبعدين عني ولو ساعه موعاد اتحمل تبعديني عنج عمر ....
انتي بنيتي الحافظت عليها وحميتها وداحفر بالصخر حتى احظى بيها ...مستحيل اسمحلج تبتعدين عني مستحيل ....
بستها من راسها وغطيتها زين وطلعت ...
نزلت وانه ضايكه بيه الوسيعه ...
وافكر شلون اكللها لوسئلتني ..وشجاوبها وششرح الها ...
زين واخوها هذا وين الكاه هسه ...
مديت ايدي بجيبي وطلعت تليفوني ودكيت رقمه وعسى ولعل يجاوب ..
بس ماكو دك مره وثنين وتلاثه وهوه ماكو يطلع مغلق ...
شمرته على صفحه وتمددت وادي شبكتهن وره راسي وكعدت فكره تجيبني وعشره تاخذني لحد مافتحت عيوني لكيتها صايره الصبح وانه غافي بمكاني ...
كمت صليت ودعيت ربي يسرلي اموري ويكدرني وينطيني القوه على اللي جايني ...
كملت صلاتي ورحت للمطبخ لكيت العلويه كاعده تسوي ريوك ..بستها براسها وصبحت عليها ..
وسحبت كرسي وكعدت وخليت ايدي على خدي وافكر ..
اجت امي حطت ماعون البيض كدامي وكوب الجاي وصمون ....
-اكل يبعد امك ..ولاتفكر ولا تحسبلها زايد وخليها على الكريم ..هوه اللي يحلها ويفك عقدها مثل ماطلعها من الموت وبقدرته سبب الاسباب وخلاها تصير بيتك ..
أنت تقرأ
غربة روح
ChickLitدنيا غريبه بديناها بدموع وعشناها بضحك وفرح وحزن وقهر وكعده صبح ولمه اهل وسهرة سمر ونهيناها بغربه لكن موغربه وطن ولا غربه بيت غربه اصعب واقسى من كل انواع الغرب وكل انواع التهجير تهجير نفسي تهجير روحي تحس نفسك بوسط اهلك وناسك بس مو هو هذا المك...
