الجزء التاني من (سلسلة البيوت اسرار ) رائحة الروح 💙(منقوله )

7

#رائحة_الروح
الفصل السابع

                  (سيلين)

سيلين..مافيشي مايضايق ماما اللي ولدتني بعد ماتوفى بابا الله يرحمه بسنتين جاها عريس تزوجاته وبابا حسن رفض انها تاخذني معاها لان زي ماقال اني امانة بابا الله يرحمه عنده خصوصا ان ماما بتسافر لمكان ثاني خارج بنغازي  وهي تقول ماصدقت وبعد ماكبرت شوي عمري ماشفتها جت زارتني او سئلت عليا  وبعد ماتما عمري 12 سنة قررت انها تخش حياتي وتبي تتصل بيا بس انا كنت هذاك الوقت ماعنديش ام الا ماما رحمة بس اللي حنت عليا واهتمت بيا وسهرت عليا لما مرضت  ولقيتها حضن دافي ليا ليش نمشي ندور على حضنها ونبدا من جديد مرحلة التعارف
عماد..بس هاذي امك وحقها عليك
سيلين بدموع ..حقها عليا وبه انا حقي وين عليها انا ماقلتش ليها ماتتزوجش هذا حقها لكن مش تعزقني معاش ادورني وبعدها خطرت عليها دورتني ليها عليا اني مانكونش عاق ليها وانا فعلا هكي نطمن عليها من بابا حسن انها حالها كويس وانها عندها عيال اللي هما المفروض خوتي اللي مافكروش يجو يتعرفو حتى عليا واني عمري ماسبيتها او قلت ليها كلام مش كويس وبالعكس حتى في صلاتي ندعيلها زي ماندعي لبابا الله يرحمه وهذا حقها عليا اكثر من هكي ماعنديش شئ نعطيه ليها اللي بنعطيه ليها ماما رحمة اولى بيه
وجاء عماد حضني ويمسح في دموعي
عماد..خلاص ياحبي بطلي ابكي وسامحيني اني فتحت ليك جروحك
سيلين .. عادي حبيبي اصلا طبيعي ان يكون عندك فضول في النقطة هذي خصوصا اني مرتك تو
عماد بحب .. ربي يخليك لي
وخذيتها في بوسة طويلة وحلوة عشان تتطلع من الجو اللي هيا فيه
سيلين ..هي نطلعو
عماد ..هي غير ساوي روحك قبل 

وقعدنا خمس ايام كانن من احلى الايام طلعت ادهورت واجد انا وعماد في بنغازي لي اماكن ماشفهاش قبل والجو مع اهلي كان مش عادي وروحنا للطرابلس على وعد اني نجي نزورهم في رمضان وبعد الشهر الكريم هما بيجو على خاطر عرس نائلة
وروحنا لحوشنا وبدت حياتنا روتينية زي المعتاد وبدا عمل عماد الحكومي
وجانا الشهر الكريم وجو عيلة عماد غريب عليا في الاطباع والعادات و قررنا انا وعماد نفطرو في حوش اهله عشان عماد كبيرهم وانا الكنة الاولى ورغم ان ليا حاجات واجد مانعرفش نفطر الا بيها لكن مادويتيش لعماد عليها عشان مانبيش نكلف عليه وقلت عادي نتعود بما متوفر عندي لكن تفاجأت بيه جايبهن كلهن واستغربت كيف عرف

سيلين .. حبيبي كيف عرفت اني مانفطرش الا بهذين
عماد ..نادية وحسام
سيلين ..بس كيف عرفو
عماد.. مش جوكم ايامات في رمضان السنة اللي فاتت فتفكروهم وقالولي عليهم
سيلين ..بس انا مانبيش نكلف عليك
عماد وحضني .. اني قداش سيلين عندي
سيلين ..تسلم ياحبي
عماد بضحكة ..بس اهناك واحد يفطر كابتشينو وبريوش وبعدها سلاطة وشربة ومعاها حاجة مشوية والحاجات الحارة في الاخير بكل 
سيلين .. مش عارفة منين جبته الطبع الغريب هذا حتى بابا وماما يضحكو عليا الكروسان والكابتشينو هنا الاولات بعد حبة التمر وبالنسبة للشربة و المشاوي طبع بابا عودنا عليهن لازم فطورنا فيه نوع مشاوي ومع اي نوع شربة وسلاطة   والمعجنات ناكلو فيهن مع الساعة 12:30  او 1 والسحور ناخذو زبادي او لبن وكاسترد او مهلبية وبس
عماد ..هو عادات غريبة لكن حلوة بس ليش قلتي بتكلفي عليا
سيلين ..ماهو حبيبي لما بتجيب مثلا كيلو لحم بيش نشويه يسدنا انا وياك لكن تو بتتطر انك تجيب اكثر من اثنين كيلو لان اكيد مش حناكل بروحي فحتكون تكلفة كبيرة عليك يوميا 
عماد.. اصلا ياحبي بالعادة نذبح في خروفين كل رمضان  خروف في الاول وخروف في النص والدجاج والحوت انجيب فيه باستمرار والحاجات الثانية متكفلين بيها نائلة وياسين زي الجبنة والطن والحاجات الثانية الخاصة بالحاجات الحارة والحلويات فانا ماتكلفتش حاجة وفازو النسكافيه وكيس البريوش وفازو الشوكلاطة ماهوش الحاجة المكلفة
سيلين ..ربي يخليك لي ويخليكم لبعض
عماد ..امين يارب