الجزء التاني من (سلسلة البيوت اسرار ) رائحة الروح 💙(منقوله )

31

عذرا على التأخير الخارج عن اردتنا
#رائحة_الروح
الفصل الواحد والثلاثين

سيلين ببكا .. تعبانة يامارو تعبانة
مروان .. كنك تحسي في حاجة توجع فيك حاجة

صبت سيلين وقمعزت وشيرت بايدها على قلبها وبصوت ضعيف ودموع خطوط على وجهها

سيلين .. قلبي يا مارو قلبي مازال مش مستوعب شنو اللي صار فيا
مروان .. احكي احكي يا اميرتي بالك قلبك يرتاح
سيلين .. تزوجت وتحملت كل شئ صارلي عشان مانطلعش فاشلة عشان مانرجعش وحيدة ولكن في الاخير(تنهيدة)  فشلت والمشكلة اني درت كل شئ عشان ينجح تحملت اللي ماتتحمله ولية وبعمري هذاك الوقت
مروان يمدلها في كباية امية .. اشربي سولي واهدي اشوي واحكي وانا نسمع فيك وكوني مطمنة كلامك يموت هنا
حمزة
انا الحق خاطري ماريحني وطلعت وقربت من باب زمردتي بندق الباب ولما سمعت كلامها ماقدرتش نقاوم فضولي ونعرف شنو اللي عاشاته زمردتي من بعدي وفطنت بامي جاية حتى هيا شيرت ليها براسي انها ماتجايش لاني متأكد اللي حتحكيه زمرد مش ساهل عليها وهيا فهمت عليا ورجعت لدارها
وسمعت زمردتي تحكي

سيلين حاولت تكون هادية .. تعرف يامارو والله سكاتي وصبري مش خوف من كلمة مطلقة اكثر من خوفي من كلمة فاشلة واني نرجع للوحدة من جديد
مروان بحت فيها باستغراب
سيلين كملت .. اه وحدة يامارو ماتستغربش هكي صح ماحد قصر معاي لكن في الاخير سماي وحيدة لو كنت نعلم ان عندي خوت من لحمي ودمي يبوني ومايعلموش بوجودي راه ما اطريتش نتحمل شئ وتحاميت فيهم
مروان .. ومالك يا سولي
سيلين .. بسبب زواجي من عماد خلاني نحس اني وحيدة لاني خفت كان شكيت لمالك مش حيسكت وحنكون سبب ان علاقة ماما رحمة بعيال ولد عمها تنقطع لان مالك وبابا حسن مش حيسكتو وانكون السبب
مروان بهدوء .. لكن حكيتي لمالك شنو سبب اللي خلاك تطلقي منه
سيلين .. لانه خاني شنو مازاله عندي الا الطلاق بس وهذا اللي خلى مالك مايدرله شئ
حمزة
لما سمعت كلمة خانها طول خطر عليا اللي صارلي وحسيت بوجع وقلت سبحان الله حتى الوجع ننوجعو نحن الاثنين نفس الوجع 
سيلين بدموع وشهقات متقطعة .. تعرف يامارو شنو تحملت انا تحملت انه يضربني
مروان بفجعة .. شنو كيف سكتي
سيلين .. قلت اول مرة عصبي ومافهمش مني قبل وضربني ضرب (بشهقات اعلى) نين قعدت يومين مش قادرة نتحرك تخيل انا ننضرب ومعاها سكتت يامارو عشان خفت من الوحدة ومن الفشل وقلت عادي معاش يعاودها وهو صح معاش عاودها لكن مامنعاش مرة دفني بعصبية جيت على الساس انفتح راسي ثلاث غرزات او مرة بيحولني من طريقه بعصبية نطيح على ايدي تنكسر وتحملت 
مروان يهز في راسه مش مصدق اللي يسمع فيه
سيلين ومازالت تبكي ..وكله نصبر في روحي نقول مش مشكلة نتحمل تو يجو عيالي ينسوني كل شئ وقعدت نستنى وكل شهر ومايصيرش ونتوجع وخوفي من الوحدة يكبر ويكبر وهو اللي خلاني نتحمل حتى بعد حلمي باني ندير عيلة ماقدرتش نحققه قلت مش مشكلة هو عيلتي هو سكني حتى بعصبيته وضربه ليا