الجزء التاني من (سلسلة البيوت اسرار ) رائحة الروح 💙(منقوله )

24

عذرا على التأخير عزيزاتي الخارج عن ارادتنا وهذا الفصل عن امس وان شاءالله شوي وانزل الفصل اللي يخص اليوم
#رائحة_الروح
الفصل الرابع والعشرين

             (حمزة)

ياسمين .. انا عندي بنت من الراجل الاول
حسن بصدمة .. شنو تقولي يا امي
ياسمين بدموع .. وتو عمرها 24
محمد بهدوء.. امي منغير دموع عارفتينا مانتحملوش بكاك احكيلنا ونحن معاك
حمزة بحب وجيت حضنت امي .. انت غالية يا امي واللي ايبكيك نمحوه من على الارض احكي وعشان نفهمو ونعرفو كيف نساعدوك وليش بنتك بعيدة عليك وليش حكيتي تو عليها
ياسمين خذت نفس عميق وطلعاته .. بنتي خوي هو السبب في بعدها عليا وكرها ليا
حسن بعصبية .. خوك اللي مسميتني عليه
محي الدين ..حسن شنو قلنا خلي امك تحكي بدون ماتقطعو عليها
حسن .. حاضر يا باتي
محمد .. كملي يا امي
ياسمين بحزن .. بنتي قطعة من قلبي باتها كان رفيق خوي واجد تقول خوت مش رفاقة بس لدرجة انه لما مات خلى اموره المالية كلها لخوي حتى وصاية بنتي وتوفى باتها وهي عمرها تسع شهور ولما كملت السنتين جاء محي الدين وطلبني وخوي وافق وانا فرحت واجد لاني اكيد بنكمل حياتي خصوصا لما تزوجت اول مرة كنت صغيرة وعمري ماخالطت حد الا هو بس فرحتي كانت ناقصة لان خوي قالي خلي بنتك عندي وبعد فترة تو نبعتها لك وبعد اصرار وبكلام خوي اني عروس وكيف بتاخذي بنت معاك وبالذات لما عرف ان محي ماهوش رافع عياله معاه لقاها فرصة واقتنعت وبعد ستة شهور جيت انا ومحي عشان ناخذوكم وناخذوها وطبعا خوي طلب انه يحكي معاي بروحي وطبعا كانت المفاجأة او الصاعقة
حمزة .. شنو يا امي
ياسمين .. هددني اني لو خذيت بنتي حيدير تهمة سياسية لمحي وينهي عمله ولما قلت ليه مش حتستفيد حاجة لانه لما بيحققو معاه يطلع براءة وهو قالي بعد مايطلع براءة تكون سمعته انهارت ومافيش حد حيشغله بسمعته اللي اشوهت وبالذات مع مركزه الكبير فانهياره حيكون صعب عليه واجد  لان مجرد بس اتهام ينهي حياته وانا بسذاجتي صدقت ولاني فعلا حبيت محي وخفت على محي خصوصا اني كيف بادية حياتي معاه ومانبيهاش تنتهي ونكون انا السبب ومابيتش نحكي لمحي في البداية وقلت نعطيه وقت ونرجع ليه وفعلا روحنا بيكم وقدرتو تهونو عليا شوي فراق بنتي وبعد سنتين حملت بحسن وفرحتي كانت كبيرة خصوصا اني تأخرت في الحمل واجهضت مرتين قبله ولما ثبت حملي سافرت ليه وبروحي هالمرة هذي ولكن كان اكثر قسوة واكثر وجع وقالي هي امانة رفيقي عندي ومستحيل نخليها تتربى بعيد عليا وبالذات مع راجلك اللي عنده عيال مش محرومين عليها وبيتربو برا معاها شنو ضمني مايديروش ليها حاجة وعلى قد ماحايلت ماباش وبالقانون يقدر يمنعني اني ماناخذهاش لان باتها دار الوصاية لخوي ولاني متزوجة لان المرحوم كان عارف اني طيبة وعلى نياتي ومانعرف شئ في الدنيا بحكم مانخالطش فخلى حماية بنتي لخوي بدلي واصلا خوي هو اللي وافق على محي رغم ان تقدمو ليا رجالة واجد ساكنين في بنغازي وهو اللي يرفض فيهم ولما قلتها ليه مانكرش انه كان يرفض فيهم لان مايبيش بنت رفيقه يربيها راجل غيره
حسن بحسرة .. ومع هذا كله سميتيني عليه 
ياسمين .. انا نحب خوي وبلي داره عمري ماكرهته وعاذراته لانه كان خايف يقصر في امانة صاحبه ليه ومن خوفه نسى اني انا امها
حمزة .. وبه يا امي تو شنو تبي
ياسمين .. حاولت من سنين اني نشوفها لكن هي رفضت
ماهر .. ليش
ياسمين .. مش عارفة وهذا اللي زاد كسرني لكن اللي نبيه منكم انكم تمشو ليها تتعرفو عليها تحطوها عند الامر الواقع
ماهر بفرحة .. وهي حلوة يا ماما
ياسمين بحب .. قمر طالعة لجدتها ام باتها اوكرانية 
ماهر .. يعني زي ملكات الجمال اللي نشوفو فيهن هنا
محي الدين .. تحشم يا معفن
ياسمين بضحكة .. زيهن واحلى اخرى
محمد .. انا عندي وجهة نظر
كلنا .. شنو
محمد.. انا اللي يمشي يشوفوها هما حسن وماهر لان هما اللي خوتها
فرح .. صح كلام محمد حق وحتى خوك بالك لما يعرف انك سميتي ولدك عليه يحن قلبه عليك ويكلم بنتك ويخليها تلين
ياسمين .. هو يعلم اني عندي عيلين لكن مايعرفش اكثر من هكي
حمزة .. صح يا امي كلام محمد وفرح هو عين العقل
ياسمين .. بس حتى انتو عيالي
حمزة .. عارفين يا امي ومش معنى كلامنا هذا انا نحن نفصلو في اروحانا عليك ابدا لكن لازم ناخذو الامور بعقل انا ومحمد نجوزو ليها في الشرع يعني مش محرمة علينا لكن حسن وماهر خوتها بالدم ونحن خوت خوتها فتأثير حسن وماهر اقوى غير لما تعرف ان نحن انتي اللي ربيتينا وهي لا مرات ادير رد فعل عكسي
حسن .. ليش حكيتي تو يا امي ليش مش قبل
ياسمين .. لانها كانت متزوجة من خمس سنين
ماهر وهو يحسب  .. نعم خمس سنين وهي عمرها تو 24 يعني لما تزوجت كان عمرها 19 معقولة تزوجت صغيرة
فرح .. كانت شنو قصدك امي
ياسمين .. اطلقت من فترة قصيرة
محمد .. لا حول ولاقوة الا بالله
ياسمين .. وماحد عارف شنو السبب الا خوها
حمزة باستغراب .. خوها
ياسمين .. اه ماهو ولد خوي جاء قبلها بشهرين بس والمرحوم اصر انهم يرضعو على بعض عشان يكونو خوت ويكون ليها عزوة وسند تقول قلبه كان حاسس انه بيموت قبل مايجيب ليها خوت
حسن .. اه خوها في الرضاعة وولد خالها في نفس الوقت
ياسمين .. اه وهذا ليش اخترت الوقت هذا نحكيكلم فيه قلت بالك اللي تمر بيه يحنن قلب خوي عليا ويحكي ليها انه كان السبب في بعدي عليها
محمد .. اه ان شاءالله ربي يسهل وبنتك ترجع لحضنك
ياسمين .. ان شاءالله
محي الدين .. كلام العيال صح يا ياسمين
حمزة
بنغير جو الحزن اللي سيطر على امي جيت لماهر وضميته .. فرحان ان عندك اخت
ماهر بفرحة .. اه خير من الجفاف اللي عايشه مع الخناشير اللي زيكم
حمزة بلوم .. طلعنا خناشير صار
ماهر .. تي والله لولا اوتة راه هجيت منكم
محمد.. باهي به ياماهر تو يبانلك
حسن .. غير ان شاءالله ترضى بينا ماتفرحش واجد
محمد بحب وجاء ضم حسن لان حاس بيه متوتر .. اصلا منو اللي يكون عنده خوت زيك انت واخر العنقود هذا ومايرضاش بيكم
حسن .. ربي يخليك لنا يارب
حمزة .. هو بس وانا وين
حسن .. خليك مع حبيبك المدلع
ياسمين بفرحة .. ربي يخليكم لبعض يارب
فرح .. راحت عليا خلاص
محي الدين .. تريح عليهم كلهم الا انتي انتي فرحة قلوبنا