الجزء التاني من (سلسلة البيوت اسرار ) رائحة الروح 💙(منقوله )

16

#رائحة_الروح
الفصل السادس عشر

               (حمزة)

احمد.. انا مازال الامل كبير يا حمزةعلى الاقل انا قراية فاتحة مش زوجته فعليا
حمزة ..ليش بختنا هكي لما نحبو نحبو صح لكن النصيب يعاكسنا والله لو كنا مكسدين ونضحكو على البنات راه حضنا احسن من هكي
احمد.. استغفر ربك يا حمزة ربي ليه حكمة في كل شئ
حمزة ..استغفر الله العظيم واتوب اليه
احمد قصته حب بنت خالته وهي تحبه لكن باتها غصبها انها تنخطب لولد عمها اللي مايحبهاش لكن لما عرف انها على علاقة مع احمد دارها تقول مكر فيه ومن خطوبة قلبها لفاتحة وتمت زوجته شرعا على الورق وهي قاعدة تماطل بالك ربي يهديه ويسيبها واهو ليها سنتين مقرية فاتحتها وان شاءالله ولد عمها يسيبها وتكون من نصيب احمد يارب

احمد.. به على الاقل روح بدري ماتمكرهاش واطول هنا
حمزة .. لا بنطول ومعاها بنطلع لخوتي شوي وحتى قرب ماني قاربها نين نتاكد انها فعلا بعدت على امها
احمد.. ربي يسهل ويريح بالك
حمزة ..اجمعين يارب
وبالفعل نفذت مانبي وجيت قريب المغرب روحت للشقة ولقيتها تستنى فيا وبارمة على الشقة ضامتها وواضح انها حتى على روحها بارمة

حمزة ..السلام عليكم
ندى ..وعليكم السلام وينك طولت استنيتك واجد
حمزة ..عندك اعتراض
ندى ..لا غير رايفت عليك
حمزة ..رايفت عليك الايام الطيبة
ندى ..تغذيت برا والله نجهزلك حاجة تاكلها
حمزة ..خليها شوي اخرى ونتعشو مرة وحدة
ندى ..به اندير قهوة نشربوها مع بعض مابين غيرت دبشك
حمزة ..باهي
وخشيت غيرت دبشي وطلعت عليها لقيتها مجهزة تقمعيزة في البلكونة
حمزة ..ااايه شنو الجلسة
ندى ..عجباتك
حمزة ..اه حلوة
ندى .. الحمدلله عجباتك مع اني خفت منك الحق
حمزة باستغراب ..عليش خفتي مني
ندى ..ماهو قلت في البلكونة
حمزة ..لو كراسي اه ممكن كنت اضايقت لان سياج البلكونة مش عالي واجد لكن جلسة ارضية اكيد لا والزرعات دايرات جو حلو
ندى بفرحة .. الجلسة هذي لقيت وحدة تركية دايرتها في سورها فانا خذيت الفكرة وغيرت عليها شوي وهذي النتيجة
حمزة ..حلوة النتيجة بس شنو اللي غيرتيه على فكرتها
ندى ..هيا دايرة المخاد صغار ورقاق  شوي وانا كبرتهن وخليتهن منفوخات على خاطر الجليز وهي دايرتهن على عشب وزدت عليهن الفرشة الصغيرة بنفس لون المخاد وهي دايرة طاولة وانا مادرتهاش عشان بضيق المساحة وعبيت البلكونة بالزرعات عشان تعطي لون حلو ومنظر مريح
حمزة .. فعلا جت في وقتها وحلوة لقعدت عشية او اخر الليل

وشربنا قهوتنا ودايرة حتى كيكة اللي ليا سنة ومعاها متزوجها عمري ماكليت من ايديها حاجة حلوة ديمة نجيب جاهز وغير انها فكرت في القعدة هذي بروحها انجاز تهيا من لما تزوجتها ماغيرتش فازة من المكان اللي حطتها فيهن فرح تمسح واظم وترد كل حاجة لمكانها لكن تو مغيرة حاجات واجد اول مرة نشوف لمستها هي في شقتنا وحسيت بشوي راحة
ندى ..مازالت زعلان مني حبيبي
حمزة ..نكذب عليك ياندى كان نقولك راضي لكن مش زعلان بس خايف ان تغيرك هذا مؤقت وبعدين ترجع حياتنا زي ماكانت
ندى .. خلي الايام بينا وهي اللي تثبت ليك
حمزة ..ان شاءالله
وقعدنا نسهرو واجد الحق عجبتني القعدة او ممكن لانها اول مرة دايرة حاجة بروحها من فكرها او يستر الله ماتكون متفقة هي وامها على هذين كلهن وبعدها تعشينا وخشينا رقدنا وضمتني ندى واستغربت حركتها ولفيت ليها وضميتها حتى انا ورقدنا وقعدنا ايام هكي وفعلا ندى تغيرت واجد وعلاقتها بامها فعلا فيها حاجة متغيرة لاحظتها لما مشينا ليهم وحياتنا تمت كويسة حتى علاقتنا الزوجية تمت احسن مايكون
ندى بتردد ..حـ حمـ حمزة
حمزة ..نعم
ندى ..بنحكي معاك موضوع بس خايفة تزعل مني
حمزة سيبت اللي في ايديا .. طالما بنسمع منك انتي اكيد مش حنزعل
ندى ..نبي نعاين
حمزة بلهفة وجيت شديت ايديها ..كنك ندوش تحسي في حاجة تشكي من حاجة
ندى بحب .. لا ياحبيبي بس نبي عيال
حمزة ..هذي بس خلاص بكرة شوفي دكتورة كويسة ونمشو ليها
ندى ..يعني مش زعلان مني
حمزة ..ليش بنزعل منك اصلا نحن نعتبرو طولنا وماشقيناش بالموضوع هذا
جت ندى ضمتني بقوة نين استغربت ولهدرجة كانت خايفة مني رديت ليها ضمتها وبعدتها شوي عليا وبستها ومن بوسة تمينا في حاجة اخرى وبعد فترة
حمزة وانا نلعب بشعرها ..ليش كنتي خايفة اني نزعل 
ندى ..انا كنت خايفة منك وعليا
حمزة ..كيف مني وعليك
ندى ..خايفة انك تحسس من الموضوع وخايفة عليا ان العطل هذا نقعد انا سببه
حمزة .. اولا ان شاءالله مايصير غير كل خير وثانيا ليش بنتحسس زي مانتي تبي عيال حتى انا نبي ولولا الفترة الاخيرة والمشكلة اللي مرينا بيها كنهدا راه شقينا بالمعاينة لان نحن لينا قريب سنة ونص متزوجين وثالثا ليش خايفة لان ماحد يعلم فينا المشكلة عند من وان شاءالله ماتطلع حاجة صعبة
ندى بتنهيدة .. ان شاءالله
حمزة ..تعرفي ياندوش قديش انتي حلوة من داخل ومن برا
ندى ..هذا وين عرفت
حمزة ..اه ليا قريب ثلاثة شهور وانا نحس في روحي كأني متزوج جديد طبعك اختلف بكل نحس فيك حياة وروح مش قبل كنت تقول عايش مع آلة لكن تو حتى حياتنا الزوجية الخاصة تغيرت واجد
ندى ..لو عمري انتآسف كله شوي حتى انا قديش كنت ظالمة روحي لما قررت اني نكون تابعة لماما بدون تفكير
حمزة ..هي هذي المشكلة اللي كانت بينا ياندوش انك كنتي اتبعي في كلام امك بالحرف هو مش عيب ان المرا تاخذ وتسمع كلام امها ونصايحها لكن تاخذ مايناسبها وتعيش حياتها على ضوئه لكن انتي كنتي حتى النفس اتنفسي زي ماتقولك
ندى.. لكن الحمدلله عرفت غلطي لما تخيلت اني بنخسرك وبنخرب بيتي بايدي عرفت روحي شنو درت
حمزة وحولتها من على صدري وخليتها تحتي .. وبمناسبة حياتنا الزوجية اللي تمت احلى من سنة زواج كاملة
ندى بضحكة ..المطلوب
حمزة خذيتها ببوسة طويلة وبوسة تبعتها بوسات ورحنا في عالمنا الحلو اللي عايشه من ثلاثة شهور
وعدينا ثاني يوم للعيادة وحجزنا واستنيت معاها وفرحت اني ماخليتهاش بروحها وحتى مع الدكتورة خشيت معاها واستغربت الدكتورة خشوشي وطبعا طلبت مني ومنها تحاليل وعطتنا موعد للمراجعة ونجيبو ليها التحاليل وروحنا للڤيلا هلي حسيتها زي اللي اضايقت قلت تكسد مع فرح وخوتي تغير جو وانا طلعت للشركة
احمد..كنك عطلت
حمزة .. عدينا للعيادة
احمد بخوف ..كنكم حد فيكم حاجة
حمزة ..اهدا اهدا مافينا شئ خوتي كويسين ومرت خوي وبنته ماشاءالله عليهم  وانا وندوش مافينا شئ
احمد بتنهيدة ..امنا كنتو في العيادة ليش
حمزة ..بنشوفو موضوع تأخر الحمل لتو
احمد.. اه ان شاءالله ربي يسهل
تصدق يا حمزة مالاحظتش حاجة
حمزة ..شنو
احمد..انك انت وندى متزوجين ليكم سنة ونص ومارزقكمش ربي بعيال ومع ذلك ماحد سئل ولا تكلم على الموضوع هذا حتى انا رفيقك ماسئلتكش
حمزة ..عشان كنتو متأزمين معاي من وضعي مع ندى اللي قبل ثلاثة شهور وفي بالكم اكيد مرتاحين مافيش عيال بينا لكن تو بما ان ندى فعلا تغيرت وحياتي ارتاحت فلازم نفكرو في الموضوع هذا
احمد ..ربي يهنيكم يارب اه بنقولك خبر حيفرحك
حمزة ..شنو    
    
..............................................