الجزء التاني من (سلسلة البيوت اسرار ) رائحة الروح 💙(منقوله )

26

#رائحة_الروح
الفصل السادس والعشرين

محمد.. مافي شئ وماصار شئ غير مالقينهاش لاهي ولا خالي حسن ولا حتى ولده
حمزة .. وين مش قاعدين
حسن بتنهيدة .. في مصر
حمزة .. كنهم
ماهر .. مش عارفين طلعت لينا مرا بعد ماقاللنا البواب انهم مش قاعدين ونحن اصرينا نشوفو حد من عرب الحوش فطلعت لينا المرا وقالت لنا انهم مسافرين لمصر وخلاص
حمزة حاول يطمن خوته .. هانت انتم عشتو عمركم ماتعلموش بيها وتو اصبرو شوي قديش بتقعد يعني

وطبعا لهينا في تجهيز فرح احمد رفيقي وجهزنا كل شئ لشهر العسل بتاعه وانا قعدت شاد في الشركة عشان لما نمشو نقضو الاسبوع الاخير من شهر احمد في اوكرانيا تكون الشركة امورها تمام وروح باتي وامي وقعدنا كلنا عشان محي يكون شد روحه شوي وفي نفس الوقت عشان فرح تشد مكان امي في عرس احمد لان باتي عنده شغل ماقدرش يقعد حتى يحضر عرس احمد وجاء عرس احمد وجو مش عادي واحمد فرحان وطاير من الفرح واخيرا حب عمره تمت حلاله ويوم بس وتكون حلاله فعلا

حمزة .. مبارك يا احمد واخيرا واحد فينا قلبه لقى شريكه الاصلي
احمد.. الله يبارك والفال ليك يا وخيي
حمزة .. انت عارف القلب لمن وهي مع راجلها تو واكيد بعيالها
احمد.. ماتعلمش النصيب وين مرات تلقى وحدة تنسيك زمرد وتجي هيا مكانها وتلقاها احسن عوض ليك
حمزة بهزة راس .. لا ما اعتقدش يا احمد خمس سنين فاتن وانا ماقدرت ننسى ماظني وحدة تجي مكانها
احمد.. اللي عند ربي ما حد يعلمه
حمزة ..  ونعم بالله هي نروحو لحوشنا عشان ترقد مرتاح بعيد ع الدوشة
احمد.. لا مافيها كيف فرح غادي يا راجل عيب
حمزة بضحكة .. يا دايخ ماهي فرح بايتة عندكم والله نسيت امنا اعياط البيبي اللي شايل العرس عياط من
احمد بضحكة .. من فرحتي نسيت ربي يحفظه يارب امي تعلقت بيه واجد لدرجة حتى قبل فرح بتشيله لامها ماخلاتهاش
حمزة .. امين يارب لكن جاي عياط بكل اوتي مش هكي بكل كانت هادية
احمد.. ماشفتهاش شنو دايرة تو
حمزة بحب وفتحت يدين .. حبيبة عمها اكيد فلطة هكي كبرها
احمد بضحكة .. ياسيدي لقوها واخذة كبابي المية وحاطتهن في سفرة ومقمعزة بنات حنان وبنت عواطف وبنت ايمن زعميتهن ضيوف واضيف فيهن في المية ماعدلوش عليها لكن الحق عواطف ماهنهاش خاطرها قعدت تبع فيها شنو بدير لقتها ماشية للكوجينة وجهزت طواسي شاهي وعبتهن حتى هن امية وجت بترفع السفرة تبزعن عليها كلهن وطبعا فرحت عواطف انها امية مش شاهي حق
حمزة .. تبي تكبر روحها بالغصب
احمد.. فعلا هي هكي لان لما عاركتها عواطف قالت ليها اهناك مرا تخلي ضيوفها من غير ضيافة  عواطف نين فتحت فمها
حمزة .. سلمها يارب تعرف اصول الضيافة
احمد.. وعقلها اكبر من عمرها ولاتقول عندكم شغالات وواخذة على الرفاهية وهي اضيف في البنات بروحها
حمزة .. ماهو تقلد في امها وامي
احمد.. كيف
حمزة .. ماهو انت عارف ان عمتك ياسمين التطييب وضيافة الضيوف ديمة ادير فيها بروحها وحتى الشغالات يغسلن بس ويضمن وفرح زيها برغم ان واخذين على وكال عمتي زينب لكن طالما هي حاضرة ماتخليش فيها اطيب وحتى لما حملت وكبرت بطنها قعدت تساعد فيها وفي اوكرانيا ديمة تساعد في امي ومعاها ايد بايد فشنو بتتوقع من بنتهم
احمد.. ونعم الرباية الحق حتى فرح عمري ماحسيتها كنة ليكم ديمة نحس فيها كانها اخت
حمزة .. فعلا والله كانها اختنا وان شاءالله تطلع رودينا زيها
احمد.. ان شاءالله يارب البوادر هكي زي فرح لكن الواحد مايحكم نين يعاشر قبل
حمزة .. انا انقول زيها واحسن منها ان شاءالله رودينا برغم ظروف اهلها الصعبة ومع ذلك ماتكلفت عليك بشئ واصرت تجيب بتاتها زيها زي غيرها وماطلبتش واشرطت  لو وحدة في مكانها كانت استغلت الفرصة خصوصا انها عارفة ظروفهم المادية شنو
احمد بحب .. اي والله ربي يحفظها حتى لما مشينا بناخذو الذهب مابتش تختار حاجة غالية واجد نين انا اللي اخترت ليها
حمزة .. ربي يهنيكم يارب هي ياغالي بكرة وراك حرب
احمد.. لا اله الا الله شنو حرب بكرة دخلتي 
حمزة .. ليلة الدخلة يافالح حرب وحرب كبيرة هي زي الامتحان يا يكرم المرء يا يهان
احمد بضحكة .. هي هي قبل ماتبدا تفلم اخرى والحكاية مش ناقصة