الجزء التاني من (سلسلة البيوت اسرار ) رائحة الروح 💙(منقوله )

17

نزلت الفصل هذا اليوم وقبل الموعد عشان من هنا حتكون نهاية الذكريات والرجوع للوقت الحاضر نبي رايكن لحد الان على الرواية بكل صراحة عزيزاتي
#رائحة_الروح
الفصل السابع عشر

                   (سيلين)

مادوم لحد
سيور لي درته ..عليك يرد
ونجيك شامت ..مادوم لحد
مادوم لوالي
ويجيك يوم ..وينكروك غوالي
وتعيش معاناة ..الفراق ليالي
متألم بروحك..خاطرك منهد
ذكرى اليمة ..في الحياة تبقالي
وننساه كذبك ..في الغلا لابد
             ......................

مشن ايام وجن ايام وانا قريب نسكر خمس سنين متزوجة ونائلة تما عندها عيلين نصر الدين وسيف الدين ونادية انخطبت وفرحها قريب وجوري عندها بنوتة حلوة سمتها اميرة وحتى زهرة تزوجت وعندها ولد اسمه عبد السلام على جده اب باته ومالك طبعا مازال خاطب اللي كانت  صاحبتي وصديقتي الوحيدة اللي معاش حكيتليكم عليها تو تعرفو ليش وطبعا عماد معاش مد ايده عليا الا حاجات تو تعرفوهن لقدام  لكن  الجرح قعد مكانه ما انتساش وفي حاجة تغيرت فيا ناحيته من يومها لكن قعد الود  والمحبة بينا وطبعا العلاج قاعد عماد مستمر فيه وماخليناش دكتور مامشينا ليه عدينا للادرن ومصر وتونس وكل مكان يقولو فيه دكتور كويس لدرجة ان انا وعماد تعبنا وقررنا ان هذا اخر كورس دواء ياخذه والباقي نخلوه على ربي لان درنا اللي علينا وزيادة وقاعدة حاليا نجهز لذكرى يوم ميلاد عماد وانا قاعدة نجهز خطر عليا السنة اللي فاتت شنو صار فيها (جهزت لذكرى ميلاده وطبعا لان عنده شغل طول ماروحش ولما اتصلت بيه عربد عليا وخاطري وجعني حسيت بالكسرة فطفيت الشمع اللي على الطاولة وغطيت العشاء والتورتة وخشيت رقدت ولما روح وشاف اللي على الطاولة ولما خش للدار شافني شنو لابسة عرف روحه شنو دار وعاني من النوم وقعد يبوس فيا وتعذر واجد وانا كالعادة نسامح ونفوت والمفروض مع مرور السنين ان حبه يزيد يكبر في قلبي لكن اللي صار معاي العكس تميت نحس في روحي اني ماحبيتاش اصلا تعودت عليه زي ماهو تعود عليا لانه شريك حياتي ورفيق دربي وحتى هو احيانا واجدة نحسه زيي صارله  (كاننا كل واحد حس بانه محتاج للاخر والنصيب جمعنا وكل واحد فينا مر بتجربة حب سيبت اثر فيه وخلتنا ندواي بعض بالمحبة والمودة والرحمة والالفة لكن الحب ما اعتقدش انه نوجد بينا )
المهم حجزت التورتة من صفحة على الفيس والهدية حتى هيا ساعة حجزتها من صفحة المحل على الفيس واتفقت انا ويس شنو انديرو واه نسيت نقوللكم اني نجحت وصفيت موادي كلهن ونجحت بتقدير عالي وجبت الثاني على الجامعة وعماد واهله واهلي فرحو بيا واجد ويس وقف معاي واجد في المشروع والاعداد ليه وتو يساعد فيا لتجهيزات ذكرى ميلاد عماد وهو معاي لينا خمس سنوات
ونرجعو من الذكريات ونردو للواقع اللي هو تو وانا عمري 23 سنة 

عودة للوقت الحاضر

سيلين .. الو حبيبي
عماد.. اهلين
سيلين ..تو رن عليا يس وجاي بيرفعني للسوق
عماد..ههههه ندفع عمري وكيف ياسين مخليك هكي تناديه
سيلين ..مالكش دعوى بيني وبين سلفي خليك برا منها
عماد..باه وانا قولت حاجة
سيلين..ايوه حبيبي الشاطر
عماد..عادي اطلعي ماهو قلتيلي من آمس
سيلين..لكن بنقولك بنمشي لحوش هلك بنتغذا غادي انت بطول في المحل والله بتروح بدري
عماد بعد سكوت شوي .. بري تغذي عند اماليا بنقعد شوي في المحل ونمشي للحوش نقيل وبعدها نجيك غادي تمام
سيلين بفرحة ..تمام التمام توصي حاجة ياحبيبي
عماد وهو سارح..لا لا هي باي