الجزء التاني من (سلسلة البيوت اسرار ) رائحة الروح 💙(منقوله )

29

#رائحة_الروح
الفصل التاسع والعشرين

ياسمين وفاتحة ايديها لياوبدموع .. بنتي حبيبتي تعالي لحضني خليني نحس بوجودك خليني نحس بيك انك حقيقة مش حلم 
سيلين حاولت نحكي ماقدرتش نزلت من السيارة نجري لحضنها وغرست جوا حضنها وضميتها واجد ليا ننعم بدفئ حضنها وبكيت وبكيت وهي تبكي نين معاش حسينا بالوقت قديش نين فكونا خوتي ومحمد من بعض

محمد .. خلاص امي خلاص سيلين
ماهر .. ساد وانتن من بدري تبكن
ياسمين .. مش مصدقة ان بنتي بين احضاني
وردت ضمتني ثاني وسلمت بحضن كبير لمالك مهما دار فيها بابا يبقى خوها اللي عمرها ماكرهاته لدرجة سمت ولدها عليه ورحبت بحرارة بمروان لما عرفت انه هو اخ مالك في الرضاعة وخشينا للڤيلا واستقبلني عمي محي الدين بكل محبة وود اللي فضل مايكونش في الصورة لما تسلم عليا ماما وحضني وباس على راسي قديش حسيت بالمودة والمحبة في الحوش هذا ومن جمعتهم

محي الدين .. نورت حوشك يا بنتي آنستينا
سيلين كتبت (منور باهله الله يآنسك)
محي الدين .. حالك كويس ان شاءالله ماتعبتيش
ماهر .. انا اخر عنقودك ماسئلتنيش تاعب والله لا
محي الدين بضحكة  .. انت اتعبهم كلهم ولا انت تتعب
مالك .. لا يا عمي سولي ماتعبتش لانها واخذة على السفر لساعات اطول حتى من هكي
محي الدين .. آسف حقك علي فرحتي بسيلين نستني نرحب بيكم كويس آنستونا ونور حوشنا بيكم
مالك ومروان .. منور باهله وناسه

وخشينا وقعدت ماما تسئل فيا وهي حاضنتني وبس ومع تعليق خوتي وفرحتهم بيا وعيال محمد يهبلو بالذات ياقوت تخش الخاطر طول وحسيت روحي كاني نعرفهم من سنين ويخشو للقلب بالذات ماهر حسيته قريب لقلبي او ممكن رباط الدم هو اللي مخليني حاسة هكي مش عارفة 

فرح .. هي سيلين اركبي لدارك ترتاحي مابين ماجهز الغذاء
محي الدين .. وانت محمد ارفع مالك ومروان لدارهم حتى هما يرتاحو
واستاذنا منهم وركبنا ارتحنا وبعدها وعونا للغذاء وانا قاعدة حذا ماما ماحولتش بكل وكاني بنعوض سنين حرمان منها الله قديش حلو شعور امك حذاك ومحاوطاتك بحنانها ماننكرش ان ماما رحمة ماقصرت معاي لكن مش زي وبالذات ماما ياسمين واضح فيها الحِن من معاملتها مع محمد ولد عمي محي وكنتها فرح تقول بنتها مش كنه بكل قديش حسدتها انها ليها في حضن ماما سبع سنوات وفرحانة واجد ان معاي مالك ومروان وبعد الغذاء عدى كل واحد يدير في حاجة او انهم بيخلونا برواحنا انا ومالك ومروان

مروان .. فرحانة اميرتي الضحكة في عيونك منورة
سيلين كتبت ( وااااااااجد فرحتي مانقدرش نوصفها )
مالك بحب  .. دوووم يارب
سيلين كتبت ( امين )
مروان .. لما شفتي امك اول مانزلتي من السيارة ماحاولتيش تتكلمي
سيلين كتبت( حاولت بس ماقدرتش وضغطت حتى على روحي لكن ماصار شئ)
مروان .. عادي اميرتي مرات ترقدي توعي تلقي روحك تتكلمي الدكتورة قالت مش لازم موقف مؤثر عشان تتكلمي المهم ان يكون في اصرار
سيلين كتبت ( ياريت نرقد يوم ونوعى نلقى روحي نحكي عييت وقديش خاطري واجد حاجات نقولهن )
مالك .. حتحكي وتسمعينا صوتك اللي لينا واجد عليه
على جية محي الدين .. سادكم راه نحن اللي مشتاقين ليها اكثر منكم
مالك .. وهي بنتكم وليكم
محي الدين .. تسلم يارب في شنو تخدم يا مالك وانت يا مروان وسيلين
مالك .. انا وسيلين خريجين اقتصاد ونخدمو في شركة عمي مالك الله يرحمه للاستيراد والتصدير تحت قيادة باتي
ومروان دكتور مخ واعصاب
محي الدين .. ماشاءالله حتى عيالي الاثنين اقتصاد وحتى ماهر بيقرا زيهم محمد بس اللي كسر القاعدة وقرا هندسة
مالك .. هذا ليش فتح شركة مقاولات
محي الدين .. اه لانه مهندس مدني وحسن معاه عشان يقرا محاسبة 
مروان .. ربي يحفظهم
محي الدين .. وانت يا دكتور واخذ اجازة
مروان بحزن .. اه اجازة طويلة
محي باستغراب .. ليش
مروان .. صارلي مشاكل وتوفت بنتي بسببها واصبت بازمة نفسية منعتني من مواصلة شغلي
محي الدين .. الله يرحمها ربي يعوضك خير لكن تو حالك الحمدلله واكيد حترجع
مروان .. ان شاءالله غير نطمن على اميرتي قبل وبعدين نشوف روحي
محي الدين باستغراب  .. اميرتك
مالك بضحكة .. اصلا مروان ديمة ينادي فيها هكي رغم انها نفس عمرنا لكن اصغر مني ومن مروان بشهرين فديمة تشوف في روحها علينا وتدلع علينا كانها اميرة ونحن الخدم عندها فقعد مروان هكي ينادي فيها
ياسمين بحب وهي خاشة .. ومن تكون حذاه هالقمر هذي ومايعاملهاش زي الاميرة
سيلين كتبت ( تصدقي ان ماهر لما شافني قال ماما ظلماتك ماعرفتش توصفك صح)
ياسمين بضحكة .. تعرفي انه اكثر واحد فرح عشان عنده اخت
سيلين كتبت( حتى انا فرحت بيهم واجد وماهر نحس فيه قريب لقلبي واجد  )
مالك .. راحت عليا نا شكلها
سيلين كتبت ( انت عارف انك شنو فمفيش مقارنة مع حد معاك ابدا انت بروحك ليك مكانتك انت خوي وسندي واماني والحضن الدافئ )
وجاء مالك بكل حب حضني
ياسمين .. ربي يحفظكم لبعض يارب
سمعت انك خاطب
سيلين ( اه يا ماما مع وقف التنفيذ)
ياسمين باستغراب .. كيف
مروان .. قصة طويلة يا عمتي تو تحكيها لك اميرتي برواحكم
طبعا مارو قال هكي عشان عارف الموضوع يوجع فيا وفي مالك وخصوصا ان ليه علاقة بعلاقتي الاولى
محي الدين .. هي جهزي روحك سولي بنطلعو كلنا ندهورو في كييف وبعدها بنتعشو برا
مالك .. انت عارف يا عمي محي ان سولي عندها اقاراب في خاركيف
محي الدين .. معقولة غريبة ياسمين ماقالتش ليا
ياسمين ..ماجتش فرصة وغير انهم من لما توفى مالك قطعو علاقتهم بينا
مالك .. لا يا عمتي هما ماقطعوش علاقتهم لان صارت لهم ظروف لكن بعد زواجك ممكن بسنة او بشوي جو وتعرفو على سيلين وقعدنا كل سنة نمشو ليهم او هم يجو لينا على حسب الظروف
محي الدين .. اقاراب باي درجة
مروان .. اخ واخت جدتها ام عمي مالك الله يرحمه وبعد ماتوفى اخ جدتها عياله واحفاده لتو على تواصل معانا واخت جدتها حتى هي
محي الدين .. به والله فيهم الخير
هي صبو تجهزو