#رائحة_الروح
الفصل الرابع
(حمزة)
زمرد .. اه بس والله (توت توت توت)
سكر عليا الخط بدون مانكمل كلامي وعديت نجري لخوي ونحكيله
حمزة
سمعت ردها وسكرت عليها طول مش قادر مش متحمل نحس في نار جواي تصهد فيا كان نلقى نعيط بصوت عالي ونقول اااااااااااااااااااااه ياربي شنو داير نا في عمري البنت الوحيدة اللي دقلها قلبي ادير فيا هكي
احمد بلهفة..كنك يا حمزة كنك
انا لما شفت حمزة هكي توقعت انه امه صايرة ليها حاجة منظره كان يخوف بكل ويخبط بايده جيهت قلبه
احمد..انطق يا حمزة امك صايرلها حاجة
حمزة بوجع..قلبي يا احمد قلبي
احمد بخوف ..كنه قلبك يوجع فيك
حمزة ..اكبر وجع نعرفه
احجزلي يا احمد بنعدي لامي بنمشي لاهلي مش قادر نقعد هنا
احمد..غير فهمني بس
حمزة ..مش قادر نحكي شئ نبي نمشي نبي نطلع من هنا
وطلعت مشيت للڤيلا وطول عزقت المفتاح والفون والكندرة وزقبت في حوض السباحة وخذيتها عوامة ماشي جاي
احمد
عديت حجزت ليه وانا عقلي مشغول كنه شنو صاير معاه وحاوالت نتصل بزمرد نفهم منها ولانه اتصال دولي مباش يجمع معاي بكل ووصلت لڤيلا اهل حمزة بعد السلام سئلت عمتي زينب
احمد..وين حمزة
زينب ..في حوض المية
احمد..لا اله الا الله
زينب..ياولدي والله من ساعة ماروح وهو في الحوض نين خفت عليه والحاله هذي ماشفته فيها الا من اربع سنين فاتو لما بلغوه بمرضت امه ياسمين
احمد..عارف ياعمتي لما يبدا مهموم او مضايق يبدا يعوم نين جسمه يتسنج وبعدها يبطل بيش يرقد زي الميت
زينب..ربي يخفف وجعه ويهون عليه يارب
احمد.. بنركب لداره انزله دبش لانه لو طلع ومالقاش دبش عادي يرقد بدبشه هذا
وطلعت نزلت ليه دبش وجيت احذا المسبح وقمعزت انتفرج عليه وهو كيف يتخبط في المية وحسيت بيه انه خلاص ايديه بدو يتسنجو وشوي وطلع مديت ليه المنشف والدبش وخش لدار اللي حذا المسبح وغير دبشه وطلع
احمد.. ها يا رفيقي ماتبيش تقولي كنك
حمزة بهدوء..حجزت لي يا احمد
احمد..اه طيارتك بعد بكرة الظهر
حمزة .. شكرا
احمد..عيب يا حمزة مافيش بينا ماتبيش تريحني وتقولي كنك
حمزة ..هي معاي للجناح بنمدد جسمي
احمد.. هي احكي تو ورد بالك ترقد قبل ماتقولي
طبعا لان عارفه بعد ساعات من العوامة اول مايتمدد يرقد طول
حمزة بتنهيدة ..زمرد كذبت عليا وخانتني
احمد بصدمة ..نعم وكيف عرفت ومنو هو وشنو اللي خلاك متاكد
حمزة .. حكيت لاحمد شنو اللي صارلي مع اسامة
احمد.. من جدك صدقته وبعدين كيف ادير هكي
حمزة ..كيف اندير هكي
احمد..كيف تحكم عليها بدون ماتتصل بيها وتفهم منها
حمزة ..اتصلت بيها وسئلتها وقالتلي اه
احمد..وسكرت عليها بدون ماتحكي ليها شنو صار معاك وتفهم شنو اللي دارته معقولة يا حمزة بعد سنة ونص علاقة وتظلمها هكي
حمزة ..انا ماظلمتهاش هي خانتني
احمد.. انت تبي ترقد وتاعب ومش حتكون مركز معاي غمض عيونك وبينا كلام بعد ماتوعى
حمزة ..به
وفعلا مهناش دقايق الا ورحت في نوم من تعب جسمي
أنت تقرأ
الجزء التاني من (سلسلة البيوت اسرار ) رائحة الروح 💙(منقوله )
Romanceروايه ليبيه منقوله الجزء الأول في صفحتي 💙
