الجزء التاني من (سلسلة البيوت اسرار ) رائحة الروح 💙(منقوله )

14

#رائحة_الروح
الفصل الرابع عشر

              (حمزة)

نفس الشي ..
مازال طيفك في المنام يجي
لكن نصيب وصار
نفس الشي
نفس الحال..
مازالت طاغي ياغلا ع البال
ومازالت شاغل خاطري مازال
مانظن ننسى غيتك موحال
ولا انظن ياغالي تهون علي
نفس كلامك..
مازالت حالف مانبيع غرامك
ومازالت عايش في الحياة بالهامك
حتى وانت غايب ياقديم اوهامك
وين مانحيهن يهزن في
نفس الدوة..
مازالت مالكني زمان وتوا
ومازالت ساكن في الجواجي جوا
واللي مضا من العمر راح بسوا
اللا الكاينة يازين مانك لي
لكن نصيب وصار نفس الشي
                 ..........

حمزة ..اطمن خوك وانت عارفه
احمد بجدية ..تبي الحق كنت خايف
حمزة ..فاهمك يا احمد انت درت زي امي بس انطمنك صح انا مستحيل ننسى زمرد وديمة حنتمنى ان زمرد تكون مكان ندى لكن مستحيل نظلمها معاي لانها في الاخير في رقبتي وبنتحاسب عليها يوم القيامة ماتخافش على خوك يخاف ربه
احمد..ربي يهنيك بس ليش حسيتك مش مرتاح
حمزة ..ندى ماعندهاش شخصية بكل 
احمد..كيف عرفت
حمزة ..تخيل مشيتنا لتركيا نسحابها هي قارية على تركيا وهذا ليش متمنية انها تمشيلها لكن طلعت امها هي اللي قالت ليها امشي لتركيا
احمد..ممكن بس لان صاحباتها او بنات صاحبات عمتك مشن لتركيا تبي بنتها زيهن
حمزة ..مش هذي بس تخيل ثلاثة ايام ونحن ناكلو في فطور وغذاء وعشاء ولما نسئلها تقولي انت اختار قلت ممكن عشان ماتعرفش بس رابع يوم تعشينا في مطعم كلينا فيه اول يوم وعرفت تقريبا معظم وجباته لكن برضو قالتلي اختارلي انت  لما سئلتها فالحق انفجرت وقلت ليها مش انتي كليتي فيه معاي اول يوم اكيد في حاجة عجباتك تخيل شنو ردت
احمد..شنو
حمزة ..قالتلي اه حبيت فيه اسكندر كباب و الفاصوليا واللحم بعجين تخيل لما قالت هكي فتحت فمي ولما سئلتها ليش ماقالتش ووليش ماتوقعتش اني ممكن نختار حاجة ماحبتهاش فردت عليا وقالت ماما قالتلي ديمة نقولك انك ادير زي ماتبي 
احمد..معقولة
حمزة ..تخيل وووووه شنو نحكي لما نعارك تقولي ماما اللي قالتلي انت تتخيل لما وصلنا للفندق وخشيت دوشت طلعت لقيتها لابسة روب استغربته لان روب ليلة الدخلة كان يعتبر مستور وكانت بتموت من الحشم ولما سافرنا وفي الجناح وبعد ماطلعت من الدوش وشفت الروب ورغم ان جسمها يرعش بين ايديا وقديش كانت متحشمة لكن الروب شككني في الموضوع وقبل مانروحو بيوم سئلتها تعرف شنو قالت
احمد..زيد اجلطني زيد
حمزة بتنهيدة ..امها لما جتنا بعد المفروض ليلة الدخلة قبل مانسافرو وسئلتها شنو صار بينا فقالت ليها ماصار شئ فهي اللي قالت ليها تلبس الروب هذا اول مانوصلو للفندق وحاجات واجد اخرى غير هيا تحشمت ماعرفتش ادير منهن شئ
احمد..حي عليك يا حمزة صح حلو المرا تسمع كلام راجلها بس مش تلغي شخصيتها
حمزة .. هي هذي المشكلة وتخيل ان ندى مش صغيرة يعني مش18/17 بيش نقول تمشي وراء كلام امها لانها ماتعرفش لكن هي 24 سنة اصغر مني بسنة بس يعني قادرة وواعية لكلمة انها تكون ربة بيت  وفاتحة حوش هي صاحبته انا مش عارف الطلبة اللي تقري فيهم كيف دايرين معاها
احمد..ربي يعينك بس قولي بتخليها تكمل شغل
حمزة ..اه هذا حقها مش معقولة تقرا وتتعب ونجي انا ونقول انا لا مافيش شغل وبعدين انا بنكون لاهي في شغلي وهيا تقضي معظم الوقت بروحها فالشغل احسن حاجة مايخليهاش تمل  
احمد..يعني بتقل وبتجيب
حمزة ..لا هذا ماناقصني عارفني مشاوير الرفع والجيب مش شوري بكل
احمد..عارفك مشاوير دهوير وطلوع عادي لكن نقل وجيب مش شورك لكن شنو بدير
حمزة ..وصيت محمد قبل مانسافر يشرلي سيارة يكون موديلها يناسب ولية بنهديها ليها بمناسبة زواجنا لاني عرفت انها تسوق في سيارة اختها كانت
احمد.. اه به ربي يعاونكم ويهنيكم
حمزة ..ان شاءالله هي شكل العشاء وصل ترن عليا هي سلام
احمد..سلام
وطلعت لشقتي ولقيتها مجهزة العشاء وتعشينا وثاني يوم اتصلت بامها طبعا اللي عاتبت عشان ماقلناش ليهم ومشينا ليها ودارت عشاء لينا وعزمت عليه حتى خوتي اللي ماجاش منهم حد الا ماهر بس وروحنا لقيت محمد مدرس السيارة الجديدة وعجبتني وكانت كيا سبكترا ومخلي المفتاح عند احمد وفرحت واجد بيها وحسيت للحظة كانها طفلة صغيرة ومشن ايام وجن ايام ندى هادية وماتناقشش فيا وهذا خلاني نمل من حياتي وقعدت طول الوقت ياعند احمد يا جايبها معاي تكسد مع فرح وانا مع خوتي وتمت حياتنا اغلبها هكي الصبح هي في المدرسة وانا في الشركة وبعد مانروحو ونتغدو نقيلو شوي وبعدها نطلعو يانمشو للڤيلا عند خوتي وندى تكسد مع فرح وطبعا حبيبة قلبي اوتي نقضي معظم الوقت نجري في جرتها ومرات نمشو لحوش اهلها ومع دوت عمتي مانطولش معاها نخلي فيها ونطلع نمشي لخوتي ونحمد في ربي ان خوتي جو سكنو واستقرو هنا كنهدا راه طلقت ندى وهجيت لاوكرانيا اللي ماتعرفش تقولي لا الا عليها على قد مانقوللها ياندى هي نمشو لاوكرانيا تقولي لا مانبيش وانا عارفها انها لو برايها راه مشت لكن من امها بس نا مانعدلش عليها لما نرايف على امي نسيب فيها عند امها ونمشي لامي ومر على زواجنا سنة وذكرى ميلادي وميلاد ندى وذكرى زواجنا جاء صدفة كله في شهر واحد ذكرى زواجنا في بداية الشهر وندى ميلادها في نص الشهر وانا في نهايته وقررنا ان نحتفلو بيهن كلهن مع بعض في نهاية الشهر ودرنا احتفال عائلي اهلها واهلي بس وكان عادي مش حلو زي ماتخيلته ولاشين وخطر عليا طول احتفالي بتسكير سنة على علاقتنا انا وزمرد كيف درته مفاجأة ليها وكيف فرحت بيه ومع انه كان بيني وبينها الا انه كان روعة الروعة واذكرت روحي لما وعدتها اني مستحيل حننسى ذكرى لينا وحنحتفلو ديمة بذكرى علاقتنا وذكرى زواجنا حنخلو حياتنا كلها احتفالات وفرح وهناء لكن للاسف كل واحد فينا عدى لنصيبه ربي يهنيها ويسعدها
ويوم جت العطلة وكمل حسن امتحاناته وماهر ليه وقت مكملهن وقررت انا وخوتي  وفرح كلنا نمشو لاوكرانيا مفاجأة لباتي وامي خصوصا ان ذكرى زواجهم بعد ايام فحبينا نحتفلو معاهم زي كل سنة