الجزء التاني من (سلسلة البيوت اسرار ) رائحة الروح 💙(منقوله )

21

#رائحة_الروح
الفصل الواحد والعشرين

              (سيلين)

عماد.. طمنيني سيلين قوليلي ان احساسي غلط
واني حاضنها بكل قوتي وهي تبكي بس وبعدين دق الباب
عماد .. منو
غزالة .. ولدي كان سيلين ما فاقتش فيقها لان خوها وبوها وامها يستنو فيها قالو وقت على طيارتهم
عماد.. هي يا امي اهي فايقة

ونزلت امي وسيلين بعدت روحها من عليا وصبت بالشوي واني جيتها ثاني وخذيتها لحضني اخرى بس هالمرة ضمتني حتى هيا وحسيت براحة وطبست راسي علاها وبستها بوسة كبيرة ولانها تجاوبت معاي خفت واجد لانها بوسة كانت غريبة مش باردة ولاحارة مش شغوفة ولاعادية بوسة جديدة عليا وبعدت عليا وفطنت لروحها انها من غير حجاب وكيف بتنزل فهمت عليها وهي تشير على شعرها

عماد..دقيقة بس ننزل ونجيبلك دبش جبته لك معاي آمس غير ماركبتاش
سيلين بهزة راس .. به

ونزل عماد يجبلي في دبشي وحاسة باحساس غريب اني مستحيل نقدر نسامحه حتى مادار معاها شئ وانا عارفة عماد انه صادق في كل كلمة بس مش قادرة ننسى الموقف اللي صار وحتى لما تجاوبت مع بوسته طول جاء في بالي الموقف ومانعلمش الشعور اللي وصل لعماد لكن كان شعور وجع وقهر لو كان قالي لو حكا لي كنت تعاطفت معاه خصوصا انها هي اللي جرت في جرته لكن خلاص قرار وخذيته الانفصال على عماد بمجرد مانوصل بنغازي والخمس سنين اللي عشتهن من عمري ماكننش بالنعيم الكبير اللي بنفقده وبنبدا في حياتي من جديد وننسى واكيد حننسى على خشة عماد وهو  جايبلي الدبش خذيت منه لبسة وخشيت للحمام اللي بحذا الدار ورجعت للدار بعد ماعدلت حجابي كويس وجاء عماد ضمني اخرى كأنه فعلا يودع فيا ونزلت وسلمت عليهم وطلعت مع اهلي لبنغازي واول ماوصلنا للحوش لقيت جوري وزهرة يستنو فيا وتغمروني وقعدت نبكي ونبكي وبس نين جاء بابا وفكني منهن وحضني واجد وقعد يمسح على راسي نين هديت بين ايديه

عماد
طلعو للمطار وطلعت معاهم وسلمت عليهم واني عارف ومتأكد انها معاش بترجع لان سيلين على طيبتها وحنيتها لكن هي لما تنجرح ماتسامحش بسهولة واني جرحتها فعلا اصلا جيبتها لحوشي بس اكبر غدر واهانة وخيانة ليها حتى لو مادرت شئ وشعرت بكبر غلطي وطلعت بعد ماسقدتهم وطلعت طيارتها مع العصر قريب على رنة فوني

عماد .. الو
حنان .. اهلين عماد
عماد بحمق .. شن تبي
حنان .. خيرك ليا يومين واني نرن عليك وانت ماتردش عليا بكل
عماد ببرود.. راجل ومرته شافاته مع وحدة في حوشها شنو بيكون حالها وراجل حس روحه انه خان مرته ودمر حوشه بسبب تافه شنو بيكون وضعه يعني
حنان .. اني سبب تافه
عماد.. موافقتك على جيتك لحوشي قديش بين ليا ان ربي يحبني انه باعدني عليك وفعلا ربي صدق لما قال ( عسى ان تكرهو شئ وهو خير لكم ) على قد ماكرهت بعدك وخيانتك ليا على قد ماشكرت ربي ان رزقني بسيلين لكن بسببك انتي خسرتها بكل
حنان .. انت شن تقصد قصدك كنت تلعب بيا
عماد.. لما مشيت معاك وجبتك لحوشي كنت بنبين ليك قديش ان ربي رازقني بالخير والحمدلله ولولا وقفت مرتي معاي ماكنت وصلت لشئ منه بنبين ليك قداش خسرتي لكن بسببك انتي خسرت مرتي
حنان ..قصدك انت كنت تلعب بيا ومارجعتش تحبني زي قبل
عماد باستهزاء .. نحبك اهناك واحد يحب وحدة خانته انخطبت وهيا قاعدة على علاقة معاه بدون ماتنهي شئ ومعاها تقوله نحبك في كل مكالمة وهي لابسة دبلة غيره والسبب اللي خلاها ادير هكي تافه هلبة عذر اقبح من ذنب
حنان .. شن قصدك عماد اني مافهمت شئ منك
عماد.. اني قبل ماتخش مرتي علينا مكنتش حنسمحلك تبوسيني لعلمك وكنت حنطلعك من حوشي زي الكلبة لكن اللي صار خلى كل حاجة تتغير وبالك تسحابيني اني في يوم ممكن نرجع ليك حتى لو فارقت مرتي مستحيل انتي تكوني على ذمتي وناخذ وحدة تكون بنت بنوت يوم ما بنفكر ناخذ
حنان .. ياحقير يا واطي
عماد.. احترمي نفسك اللي ترخص نفسها وهي مطلقة وتسمح لنفسها انها تجي لحوش راجل ثاني وبروحه شنو بتكون غير حقيرة وواطية
حنان ببكا .. بس اني ماجيتكش الا اني حبيتك ومازالت نحبك حتى لما تزوجت والله مايوم غبت عن بالي
عماد.. اهو قلتيها بروحك يعني خاينة حتى وانتي متزوجة مش على علاقة بس
خنتيني ايام فيهن كنتي بعلاقة معاي وبعد ماتزوجتي قعدتي تخوني في راجلك بتفكيرك بيا واني مايناسبنيش وحدة خوانة واصلا اني عمري مافكرت نرجعلك ومش لانك مطلقة لا المطلقة مافيهاش عيب لكن لانك انتي خنتيني لما كنت نحبك وبعد ما اطلقتي سمحتي لنفسك اتجي لحوشي بدون اي رابط يعني تقدري اديرها مع غيري
حنان .. اني مادرتهاش الا معاك ومستحيل انديرها مع غيرك ماتسيبنيش ياعماد
عماد.. تعرفي اكبر غلطة درتها في حياتي اللي هي يوم مارديت عليك في الفيس وعلى العموم اخر مرة تكلميني والله ليا تصرف ثاني معاك