الجزء التاني من (سلسلة البيوت اسرار ) رائحة الروح 💙(منقوله )

11

#رائحة_الروح
الفصل الحادي عشر

                (سيلين)

عماد.. شنو جو المشية
سيلين ..جو حلو بس
عماد..بس شنو حد ضايقك
سيلين ..لا لكن ما ارتحتش لمرت خوهم
عماد بتوتر ..خيرها
سيلين ..نظراتها مش تمام تحس وراهن الف حاجة وطريقة كلامها غريبة شوي وتسئل فيا واجد
عماد..ممكن بتتعرف عليك ونظراتها ممكن اعجاب في حد يشوفك ومايعجبش بيك
سيلين بحب ..تسلم ياقلبي

ووصلنا الحوش وحول عماد عبايتي وعجباته واجد لبستي وطبني لدارنا ورحنا في عالمنا الرائع والجميل وبعد وقت

سيلين ..كنك حبيبي في حاجة مضايقاتك
عماد..لا ياحبي عليش تسئلي
سيلين .. غير حسيتك تسرح واجد
عماد.. لو سارح سارح في جمالك وقلبك وحبك
سيلين .. ربي يخليك لي يارب
هي انوض نسخن الموالح بيش ناكلو وبعدها ندوشو ونكسدو نتفرجو
عماد.. به ياحبي
وصبيت سخنت الموالح وكليت انا وعماد وفقدت اللمة الحق
سيلين ..حبيبي معاش نجو مرة اخرى قبل ماناكلو مع العيلة
عماد..علاش
سيلين ..اللمة حلوة الحق وهما جوهم يجنن
عماد بحب.. وبه ناري كيف انطفيها
سيلين بخجل ..انديرو زي امبارح
عماد..حاضر ياحبي اللي تبيه
سيلين .. ومن بكرة ان شاءالله بنطلع مع البنات ناخذ لبسة العيد وفي نفس الوقت نائلة بتكمل اللي ناقصها
عماد..به
وقعدنا نتفرجو في جو كله حب ولاكأن امبارح صارت حاجة
عماد
حاضن مرتي ونتفرج اني وياها لكن عقلي في مكان اخر زعمك حنان شنو تبي من مرتي والله زعمك تبي توصلي او تخرب عليا بس لو بتخرب شن مصلحتها ولو تبي توصلي هيا على ذمة راجل وحتى مش على ذمة راجل بالنسبة لي اللي باعك بيعه ومش عارف نقول لسيلين ان حنان مرت خو ازهار هي حبيبتي الاولى اللي باعتني والله نسكت وخلاص
وجاء ثاني يوم ومشن ايام وايام نروحو بدري وايام بعد الفجر ومازال على العيد اسبوع ايام

سيلين ..حبيبي انا بنعدي لاهلي على الاقل نفطر عندهم حتى يومين
عماد.. به بس اني مانقدرش نمشي معاك
سيلين بحزن ..ليش
عماد وخذاني لحضنه .. ماهو على خاطر الوقت هادا بالذات وقت زحمة الشغل والرزق الكويس لكن اكيد مش حنخليك تمشي بروحك
سيلين ..به مع من نمشي
عماد.. انتي مش مرة وعدتي ياسين تاخذيه معاك لبنغازي وادهوريه فيها
سيلين ..اه
عماد..خلاص امشي انتي وياسين رغم انه بينقص عليا لكن حسام يوفي 
سيلين بحب ..مع اني حنفقدك لكن خلاص حتى بالمرة ناخذ لبسة العيد من غادي
عماد..ليش مالقيتيش حاجة حلوة هنا حتى في محلنا 
سيلين .. لا والله كل حاجة هنا حلوة لكن انا متعودة على بنغازي ممكن لما ندور فيها نرجع وناخذ من طرابلس
عماد..اللي تبيه ديريه حبي واذا عرفتي روحك ماعجبك شئ غادي ابعتيلي واني نبعتلك صور لبضاعة بتجي بعد العيد لكن عادي نقدر نكلمهم يجبولي اللي اخترتيه
سيلين ..ربي يخليك لي يارب

وفعلا ثاني يوم حجزلنا عماد واسقدت انا وياسين طبعا بعد توصيات عماد اني مانسوقش بعد المغرب واذا بنعطل ناخذ معاي يا مالك يا ياسين وعطاني فلوس بيش نشري بيهم اللبسة مع انه عارف ان عندي واجد
ووصلنا لبنغازي واستقبلنا مالك وبابا وبعد الاحضان والفرحة بجيتي وسلامهم على يس والفطور وطلعنا طول انا ومالك ويس وجوري وزهرة ودهورنا يس في بنغازي وعجباته واجد وبعد يومين روحنا وخذيت لبسة العيد من محل عماد لانها كانت اول لبسة عجبتني لكن هذا نحن لازم اندورو بيش نرتاحو ومشن الايام وجاء العيد وكانت لبستي بدلة رسمية بديكور جديد كان لونها بيج وسرواله ضابط بالطريقة الجديدة مع وسع بسيط مزين باللولي من تحت وجاكيت لنص الفخذ اكمامه مزين بحبات لولي وقماشها واقف وحلو وركبت عليها بلوزة حمراء  ومن عند الرقبة دانتيل بشكل طبقات رفرف وحذاء بيج وشنطة حمرا ومحرمة حرير بيج بخربشة بسيطة حمراء وطلعت حلوة بيها بكلام الجميع وعماد اكثر واحد كان مبهور بيا وهو الاهم اكيد وبدينا استعدادت لعرس نائلة وخشينا اسبوع العرس وجو اهلي طبعا مبوش يقعدو لاعندي ولا عند اهل عماد اجرو شقة وقعدو فيها لانهم ماحبوش يثقلو على حد واصلا هذي عادة بابا لما كان يجي هو ماما  للمناسبات اقارب ماما سوى بروحهم او نحن معاهم يأجرو نفس الشقة تقريبا اللي يأجرو فيها وفي يوم سهرية نائلة ركبت فوق للدور الثاني اللي فيه نائلة تجهز في روحها ومعاها ازهار ومرت خوها حنان وركبت عشان نستعجلهم وكنت لابسة سروال واسع شوي لونه وردي هادي وعليه بلوزة شيفون  بيضا لابسة تحت منها بدي نص لونه فوشيا داكن ماتستغربوش الالوان ديمة نلبس الالوان اللي مش كل الناس تتقبل تركيبها مع بعض وشعري طالقته عادي بلون اللي كل الناس يسحابوني صابغاته ولاني نحس فيهم مايصدقوش فيا لما نقول انه لونه الطبيعي معاش نصلح ليهم ودرت جمتي على قدام زي الكوريين ولبست طوق لولي  ولاني لابسة طاقم لولي والبلوزة كان عليها حبات لولي
سيلين ..هيا يا نانا تأخرتي راه
نائلة ..اهو نازالة ازهار تكمل في تحزيمتي
سيلين ..وين حنان مش معاكن كانت
ازهار ..تو نزلت ماتلقيتيش معاها على الدروج
سيلين ..لا
ازهار ..غريبة
سيلين ..هي نازالة انا ما اطولوش
نائلة ..به
وطلعت من الدار وحسيت كأن حد وراي لكن لما التفتت مالقيتش حد طبعا الدور الثاني كان دار عماد منعزلة بروحها وفي جيهة حمام حشاكم وبحذاه دارين دار كبيرة لياسين وحسام ودار صغيرة فاضية هذي اللي تلبس فيها نائلة دايرينها الشباب للبلايستيشن او لما يتفرجو على الكورة معاهم ضنا عمهم وفي ممر مش مسقف تفتح فيه الديار كلهن وجيت جيهة الدروج واول ماحطيت رجلي على اول درجة حسيت كان حد دفني وجيت عرم من الدروج لحد الاستراحة اللي بين الدروج الاخرات وطبعا عيطتي تقريبا جابت اللي في الحوش والخيمة كلها