#رائحة_الروح
الفصل التاسع
(سيلين)
سيلين بشهقة .. انا والله ماقصدي اللي انت فهمته انا اصلا كنت بناخذ ليها هدية ومافيش احلى من هدية تبقى هي تبيها ومتمنيتها
عماد.. عارف ياحبي ان مش قصدك حاجة وخلاص ياستي حتى كان بتخلصي الصالة كلها عادي
سيلين .. عماد انا وانت واحد وانت شريك حياتي يعني صح تو انت مش مستحق لكن الواحد مايعلمش على الوقت وبعدين المفروض فلوسي هنا فلوسك من يوم ماتزوجتك وانت ماتخليش فيا نصرف حاجة من فلوسي وهذا رزقي نبي نتمنع بيه وانت وراك مسؤلية اهلك وخواتك ومازالت نادية حتى هي تبي تجهيز
عماد..شنو اني قصرت معاك في حاجة طلبتي حاجة ماوفرتهاش ليك
سيلين و ايديا حاضنات وجه عماد.. حبيبي انت من يوم ما ارتبطت بيك عمرك ماقصرت معاي لكن حتى انا مانبيش نحس اني ثقيلة عليك نبي انقاسمك في كل شئ وفلوسي هنا فلوسك وفلوس عيالنا اللي يرزقنا بيهم ربي ان شاءالله
عماد وحاط ايديه فوق ايديا .. حاضر ياحبي لو طلبتي حاجة وماقدرتش عليها او بتكلف عليا هلبة نقولك وانت تاخذيها بفلوسك
سيلين ..متفقين تمام
عماد..خلاص سماح يعني
سيلين وبسته على خذه..سماح
عماد.. بس حنسئل نائلة لو تبي تغير الصالة واذا قالت لا
سيلين ..تعطيهن ليها هدية مني تكمل بيها كان ناقصتها حاجة
عماد ..خلاص كله الا زعلك
خليني نخش للحمام اندوش الفجر على آذان
ولبست دبشي ومشطت شعري وجهزت لبست عماد ولما خطر عليا كيف خش عليا الحمام لاشعوريا خدودي تمو حمر من الاحراج
عماد..حبي في شنو سارح
سيلين .. اكيد فيك ياقلبي
عماد.. اذن الفجر
سيلين ..على اذين هاك اشرب امية
عماد..صحيتي
سيلين ..حبيبي بنقولك
عماد..شنو
سيلين ..نادية ونائلة بكرة بعد التروايح بيعدن لازهار مريضة واجد والبنات يبني نمشي معاهن
عماد ..لا فوتيها المشية
سيلين..على خاطري حبيبي البنات طايرات بمرت خوهن ويبن يعرفوها على الناس كلها
عماد.. به تمشو بس ما اطوليش واذا هما يبو يطولو ترني عليا نروح بيك
سيلين ..تمام ياقلبي
وصلينا الفجر وزي المعتاد خذاني في حضنه ورقدت ونسيت كل اللي صار بينا
(احيانا السكوت على الاشياء الصغيرة يجعلنا ندفع الثمن لحاجات اكبر سوف تأتي ) وثاني يوم
..........................
(حمزة)
نا قلت لك من قبل
نقدر عليه حنيني
وتمشي بلاك سنيني
وغيرك توالف عيني وننسى
وحق الله ننساك ماتعنيني
وايامي معاك انملها
ولافي المنام تجيني
وننسى الملامح كلها
تحسابني نشتاق وفي الليل نوقد شمعة
ويكيدني الفراق
وع الخد تنزل دمعة
انت بخيالك واهم وغلطان مانك فاهم
اللي نسو ننساهم واللي جفا نجفاه
............
ماقدرتش نوصل ليها فقررت نسافر نغير جو بالك حتى انا اندير زي ماهي دارت وننسى مش عارف حبيبتي الطيبة والحنينة كيف قست عليا هكي كيف هنت عليها كيف تحملت تقعد بلاي كيف وحتى الكلية ماجتهاش بكل وبعدين عرفت انها وقفت قيدها معقولة لهدرجة قدرت تبعد عليا
ووصلت اوكرانيا وبعد السلام والترحيب والاحضان
ياسمين ..كنك يا حمزة من اول ماجيت من ليبيا وانت تقول بني ادم ثاني كنك مهموم ياولدي
حمزة ..اه يا امي شنو نقولك
ياسمين ..احكي ياقلب امك ماتشغلنيش عليك
حمزة بتنهيدة ..شنو بنقول يا امي بنقولك حبيت وبغبائي ضيعت حبي بنقولك حبيت وحبيبتي من اول صدام بينا سيبتني شنو نقول يا امي قلبي موجوع يا امي
ياسمين ..حبيت يا حمزة
حمزة ..تخيلي يا امي انا اللي كنت نقول الحب مش موجود الا في الاساطير والله الروايات الخيالية بس واني يوم مابنتزوج نتزوج زواج تقليدي لقيت روحي نحب ونحب بكل جوراحي يا امي لكن مش عارف شنو اندير وانا مش عارف كيف نوصل فيها لدرجة حاولت نمشي لباتها بيش نخطبها هي اللي فتحتلي الباب ورفضتني يا امي تخيلي ماسحبتهاش قاسية هكي
ياسمين ..شنو السبب احكيلي ولدي بالك نقدر انساعدك
وحكيت لامي كل شئ وكان حسن معانا وسمع كل شئ
ياسمين ..غريبة تحس الموضوع مش مستاهل
حسن ..بالعكس يا امي لما تكون البنت معتزة بنفسها واول حب في حياتها تتفاجاء بيه شك فيها وحكم عليها قبل مايعطيها فرصة اكيد صعب عليها وعلى كرامتها
ياسمين ..مافيش في الحب كرامة
حسن ..لما يكونو متزوجين لكن مش علاقة يا امي وبعدين الشك مرض صعب
حمزة ..انا والله ماشكيت انا صدقت طول انها خانتني
حسن ..ايوه هذا هو الهم انك صدقت طول بدون ماتسئل وتتاكد وحتى لما عرفت انها ماعرفت شئ فرحت بدل ما انك تجي وتحكي معاها وتحكي ليها اللي صار كانت ردت فعلها مش حتكون هكي
حمزة بقهر ..وليش يافصيح ماقلتش ليا الكلام هضا ماهو قدامك اللي قاله ليا احمد ليش ماقلتش ليا اني نحكي ليها الموضوع
حسن ..لاني ماتخيلتش ان الحقير مازال عنده وجه ويحكي ليها ولا كنت متخيلها معتزة بنفسها للدرجة هذي
ياسمين ..سبحان الله ذكرتني بشخص نعرفه الله يرحمه نفس العند ونفس الكبرياء اللي عندها
حسن ..من يا امي
ياسمين ..واحد كنا زمان نعرفوه الله يرحمه
حمزة ..الله يرحمه
حتى انا ياحسن نسيت انه اخ صديقتها المقربة وبالذات لما عطيته طريحة زدت طينت الدنيا
ياسمين ..حاول ثاني وثالث معاها
حمزة ..انا تو بنخليها فترة تروق وتهدا وبعدها تو نروح ونكلمها ثاني
حسن بفرحة ..مطول هنا معناها
حمزة ..اه
وجاء حسن حضني من الفرحة
حسن ..معناها نكمل امتحاناتي ونروح معاك
حمزة ..اكيد
ياسمين ..ربي يحفظكم لبعض وتو نقول لمحمد ومرته يروحو ونتلمو اليوم على العشاء عاد عطلة محمد وفرح مقضينها دهوير كانه شهر عسل جديد حتى ياقوت يخلو فيها غير من حضك ليهم ثلاثة ايام في خاركيف ورفعوها معاهم
حمزة ..ربي يهنيهم فرح تستاهل محمد ديمة مقصر معاها و اوتي حبيبة عمها رايفت عليها وقعدت تحكي والله مازالت خرسة
حسن .. تحكي كلمات بالاوكراني يخلنك تفطس ضحك عليها رغم محمد يحاول يعلم فيها كلمات عربي حتى هنا تسمعهن منها تقعد تبي تاكلها وكال
حمزة .. به انا بنرقد شوي قبل ما ماهر يروح بيش نكون مصحصح ليه رايفت عليه واجد ويكونو الباقيين جو
ماهر روح من المدرسة ومع المغرب روح خوي محمد ومرته وقعدنا نسهرو وجو حلو ونسيت الحق ولو مؤقتا مشكلتي وهمي وياقوت حكاية طلعتني من اللي انا فيه وضحكت من قلبي عليها
حمزة ..اوتي حبيبتي هذي من
نشير على امي ياسمين
ياقوت .. ماتي (ماما) سين (ياسمين )
حمزة ..شطورة لكن هذي بابوسية (جدة) مش ماتي (ماما)
ياقوت ..ماتي سين (ماما ياسمين )ماتي رح (ماما فرح )
حمزة ..حي على فرح اللي طار الاسم وتما رح
فرح مرات محمد.. منها كل شئ متوقع
استنى اسمع هذي امنا
اوتي هذا من وشيرت عليا نا
ياقوت ..تجا(انا)
حمزة بضحكة ..ههههههه صار تجا
يا اوتي تجا تجياشكو ( انا عمك )
ياقوت وتهز في راسها بمعنى لا .. جا (انا) تجا(قصدها تختصر في كلمة تجياشكو اللي معناها عمي بكلمة تجا واللي معناها انا)
حمزة بضحكة..طي (انت ) مش جا (انا) يابنتي ضاعت اللغة
باه حبيبة عمو هي احكي عربي وفكينا من الاوكراني
ياقوت ..به
حمزة ..شطورة
ياقوت ..مزة ابي بنان
حسن بضحكة ..تضحك على فرح اللي اسمها طار وانت شوف كيف ناداتك تقول نحن في بار هههههههه
حمزة ..تقول اللي تقوله حبيبة عمو وخذيتها في حضني
هي نجيبو بنان (موز )
ومشن ايام وشهوريعلم ربي بيهن كيف مشن عليا من وراء فقدها نتابع في صفحة خوها وخواتها بس نبي نطمن عليها وبعد قريب اربع شهور قررت نروح لليبيا وحتى حسن كمل قرايته وجاب نتيجة ودرجات عالية خلى باتي يوفي بكلمته لاني كنت مسيب شغل الشركة على احمد ونتابع معاه على النت وياريتني ما روحت
#حياة
تعديل ومشاركة في الكتابة #الصابرة
الجزء الثاني من سلسلة البيوت اسرار
الشعر الشعبي للشاعر #اكرم_الزوي
أنت تقرأ
الجزء التاني من (سلسلة البيوت اسرار ) رائحة الروح 💙(منقوله )
Romanceروايه ليبيه منقوله الجزء الأول في صفحتي 💙
