الجزء التاني من (سلسلة البيوت اسرار ) رائحة الروح 💙(منقوله )

18

#رائحة_الروح
الفصل الثامن عشر

شد رحيلك ..
متعود عليه الفقد مانحكيلك
ان شاءالله معرض خير ..شد رحيلك
مالي ومالك ..
نشوف ناحالي وشوفه حالك
لاعاد تلفالي ولانلفالك
ولاعاد نبقالك ونس في ليلك
ارحل معرض خير ..
انت في الطريق ونا والعقل ياجافي بطريق
لانبيك ولانريدك رفيق
لاعاد نمشيهن دروب سبيلك
ان شاءالله معرض خير
شد رحيلك ...
......................
حمزة
قربت من دار النوم وانا نسمع في همهمات خفت لتكون ندى مرضت في ساعات السفر اللي غبتهن وفتحت الباب بسرعة وياريتني مافتحته صدمة عمري اللي مستحيل انتخيل يوم من الايام نشوف حاجة زي هكي مرتي شريكة حياتي بنت عمتي عرضي وشرفي واللي ماشفتش شوية انا وياها في حضن راجل ثاني ووضع المفروض مايكونش الا معاي انا راجلها على طول دارن بيا الستة الشهور الاخيرة من لما حسيت بيها متغيرة معاي الستة الشهور الاخيرة اللي ماقربتهاش فيهن ممكن اربع او خمس مرات تخيلت الارواب اللي نشري فيهن ليها تلبس فيهن ليه يتمرغد على سريري ويلبس في بيجامتي ويغسل في حمامي يعني كل سفرة كانت ترفض فيها المشي معاي بسببه هو ومن هو سيف اللي يشتغل في شركتي ليش ومانندريش على روحي الا انا نخبط فيهم الاثنين بكل قوتي ونرمي في كل شئ قدامي عليهم وهما ماقدروش يقاوموني واجد بسبب رخوة جسمهم ملي كانو يديرو فيه ولما استعوبو شنو صار كانو خلاص ندى مغمى عليها من كثر الضرب وسيف ينزف من كل تركينة وانا نعيط بقوة صوتي

حمزة بعصبية ووجع .. ليش ليش ليش درتي هكي في شنو قصرت معاك بس ليش ليش ليش

رغم انها مغمى عليها الا اني ماقدرتش نهدا ونعيط بكلمة ليش وبس وشوي خطر عليا رغم صدمتي لكن عقلي ماغابش واجد خذيت مفتاح الباب من داخل وطلعت وسكرت الباب بالمفتاح واتصلت بعمتي المصونة

حمزة بعصبية وبصوت عالي .. تو تجي لشقتي
خديجة باستغراب ..كنك حمزة تحكي هكي معاي حتى سلام ماسلمت
حمزة وعلى نفس عصبيتي .. تجي تو والله نتصل بباتها يجي يصرف معاها ويدفنها في مكانها
خديجة بخوف ..جاية جاية

وسكرت منها وانا نفكر شنو ندير ووجعي وجرحي مش وقت التفكير فيه لازم نصرف بعقل مهما انكان هي بنت عمتي ومن سمعة باتي وجي وجهي جيهة الدار اللي فيها الخاينة ورجعت نفكر ونقول شنو قصرت شنو اللي درته خلاها هكي تصرف معاي ليش ورجعت نعيط من جديد نكسر في كل شئ يجي قدامي وانا نعيط ونقول ليش وشوي وسمعت جرس الباب وفتحته لقيتها عمتي وماطولتش شكلها كانت برا من حوشها

خديجة بخوف من منظري ومن شكل الشقة كيف رايح  ..شنو في ياولدي شنو فيه
حمزة وحاولت نكون هادي .. انا مش ولدك ولاعمري كنت ولدك
خديجة ..باهي غير قولي شنو في وندى وين
حمزة باستهزاء.. تعالي نوريك زوجتي الشريفة العفيفة وين
خديجة ..كنك يا حمزة تحكي هكي
حمزة بنفس الاستهزاء .. مستعجلة ليش تعالي تو تعرفي