الجزء التاني من (سلسلة البيوت اسرار ) رائحة الروح 💙(منقوله )

23

#رائحة_الروح
الفصل الثالث والعشرين

           (سيلين)

ومشى الاجتماع على خير وانا نحاول نركز ونفهم وكمل الاجتماع وطلعو وطبعا استغربو اني ما تكلمتش بكل فبابا وضح ليهم اني مانحكيش
وبعد يوم طويل وانا نتعرف على الشغل روحت  تاعبة ويا دوب كليت وخشيت رقدت لان روحنا قريب المغرب رغم ان الموظفين روحو بعد الظهر لكن انا تميت مصرة اني نتعلم وقعدت في الشركة مع مالك يعلم فيا وجاء ثاني يوم وزيه جن ايام واجد وكملت عدتي وتميت حرة من اي قيد وقررت نكمل ماجستير وقدمت اوراقي ومعاي وخيي ايد بايد ماسيبنيش بكل وبديت نرجع لحيويتي ونشاطي  و عماد يبعتلي مرة مرة في رسالة يطمن عليا ويسئل فيا بالك غيرت رايي وانا ما نردش عليه وبعد ماكملت عدتي معاش بعتلي لكن ياسين التواصل مانقطعش معاه و سمعت من ياسين ان اخبار عماد كويسة وحتى هو بدت حياته تستقر وطبعا بعتلي ذهبي ومؤخري ودبشي اللي نلبس فيه رغم ان بابا قاله مانبو شئ لكن هو ماباش وحتى قبل بيبعث الاثاث اللي شاريته غير ماما حلفاته ماعاد تكلمه عمرها كله وهو خاف على زعلها مهما صار هي عمته وطبعا دبشي خليته في شناطيه وعطيته لماما تعطيه لاي حد مانبي منه شئ  خصوصا بعد ماشريت دبش جديد وطبعا كانت هذاك الوقت جوري حامل بشهرها الاخير وهي عندها بنوتة اسمها اميرة عمرها تو ثلاث سنين وحتى البيبي هذا قالو ليها بنية وراجلها فرحان واجد لانه يبي بنات بحكم انه ماعنداش خوات هو وخوته ثلاثة شباب وجانا اتصال منه طرنا كلنا ومشينا للمصحة وماطولناش وسمعنا صوت عياط البيبي وعدينا شفناها واطمنا على جوري وجو هله وخوته الولاد وهما فرحانين لان حتى هما احرف من خوهم في عشق البنات اصلا اميرة يخلو فيها تبات عندنا بالغصب  وبعدها خلينا جوري ترتاح واكرم مباش يسيبها وثاني يوم طلعت من المصحة لان صحتها كويسة واصر بابا وماما انها تروح عندنا حتى الاسبوع بنديروه عندنا زي اميرة وطبعا اكرم رضى على خاطر امه مريضة وماعنداش خوات يعاوننها وفرحت واجد بيها وبي بنوتتها

زهرة .. ماقلتوش شنو بتسموها
اكرم .. لا نحن سميناها وهي في بطن امها
رحمة .. غريبة ماقلتوش عليه بكل وكل مانسئل جوري كانت تقولي مازلنا
جوري .. لان نبوه مفاجأة
زهرة .. هي قولو شنو سميتوها
اكرم .. سيلين
انا التفت ليه نسحابه ينادي فيا شيرت ليه بمعنى نعم
اكرم بضحكة .. مش انادي فيك نحن سمينا بنتنا عليك
سيلين بفرحة كتبت ( والله صح )
اكرم .. وهذي فيها بصارة
سيلين كتبت( فرحت والله وان شاءالله حضها في الدنيا خير من حضي )
وجاء اكرم قرب مني وقمعز احذاي وبصوته اللي يبعث الراحة في جسم كل حد يسمعه تقول مخدر
اكرم .. سولي معاش تقولي هكي اولا كل ابتلاء من الله الحمدلله عليه وبعدين شنو حضك من الدنيا انتي كله على بعضك عمرك 24 سنة شنو شفتي منها الدنيا وبعدين هذا كان اختبار من ربي عشان يشوف صبرك ورغم اني مانعرفش شنو السبب اللي خلاك تنفصلي على راجلك الا اني عارف انك مش دلوعة عشان تنفصلي بسبب تافه
سيلين هزيت راسي بمعنى صح
اكرم يكمل .. وطالما انتي اخترتي الراي الصح وعارفة روحك صح يبقى كملي في اللي قررتيه انتي مش بتكملي وبتحضري الماستر
سيلين هزيت راسي اخرى بنعم 
اكرم .. ومعاها بديتي تشتغلي في الشركة ومالك وباتك يشكرو في نشاطك وحماسك يعني انتي اقوى وبصلاتك وقراية القرآن والدعاء والاستغفار ربي يبدل حال من حال
سيلين كتبت (ونعم بالله )
اكرم .. انا خوك الثاني وراجل اختك ولما سمينا بنتنا عليك نبوك تفرحي عشان بنتنا حتطلع زيك مش يقولو لكل امرئ من اسمه نصيب ونحن نبوها تاخذ منك كل شئ مش شوي بس مع ان المثل معني بمعنى الاسم لكن انا متمني انها تاخذ منك انتي النصيب من اسمها  
سيلين كتبت (ربي يخليك لي والله انا ديمة نعد فيك خوي واكيد كون متهني اني حنرجع اقوى من قبل طمن بالك )
اكرم .. ايوه هذا اللي نبي نشوفه وان شاءالله كل ما ترتاحي حيرجع صوتك هكي قال لنا الدكتور و قريب غير انتي بس اصري على ان يرجع صوتك ونسمعو ضحتك الحلوة
سيلين كتبت( والله حتى انا نبي صوتي يرجع نحاول كل يوم لكن مايصير شئ)
اكرم .. سولي انت عارفة قديش غالية عليا صح
سيلين كتبت ( ماتستحقش لمقدمة عشان تقول شنو تبي اطلع على راس حاجاتك )
اكرم بتردد.. بس ماتزعليش مني
سيلين كتبت( مهما تقول مستحيل نزعل منك لانك اكيد تفكر في مصلحتي لانك واحد من هلي )
اكرم .. شنو رايك تشوفي دكتور نفسي
سيلين بصدمة كتبت ( دكتور نفسي )
اكرم بهدوء.. شوفي يا سولي زي ما الجسم يمرض حتى النفسية تمرض واكثر من دكتور رفعك ليه مالك وعمي حسن وكلهم قالو ان مشكلة صوتك نفسية ونحن رايفنا على صوتك واشتقنا لضحتك حتى زعلك نبو نسمعوه بالصوت