الخلفاء الراشدين

الحلقة 1

اللهم صل وسلم وبارك على سيدنا ونبينا محمد وعلى آله وصحبه أجمعين

خلي الامل بالله موصول:
السلام عليكم من النهاردة هنتفق مع بعض اننا نستقطع خمس دقايق يوميا عشان نعرف حاجة جديدة في ديننا وايم كمان هناخد عليها حسنات ما احنا طول النهار فاتحين سوشيل مجتش من الخمس دقايق دول يالا بينا 😍👇
(١)

خلافة أبو بكر الصديق رضى الله عنه

يلا صلوا على النبى

اللهم صل وسلم وبارك على حبيبنا محمد.

النهاردة هنتكلم عن أعظم إنسان بعد النبي محمد عليه الصلاة والسلام .. هو مين؟ أبو بكر الصديق رضي الله تعالى عنه وأرضاه .. واللى بقى خليفة للمسلمين بعد وفاة النبيﷺ .

تعالوا نشوف ربنا عز وجل قال على سيدنا أبو بكر إيه في القرآن
" ثاني اثنين "  يعنى النبيﷺ ومعاه أبو بكر  .. العلماء قالوا كلام جميل أوى قالوا " أبو بكر هو ثاني اثنين في كل شئ"
ثاني اثنين في الإسلام: أول رجل يسلم بعد السيدة خديجة

ثاني اثنين في الصحبة:  أول واحد النبيﷺ اتصاحب عليه .. وثاني اثنين في الغار ..
ثاني اثنين في المجلس: النبيﷺكان يقعد وأبو بكر يقعد على يمينه .
ثاني اثنين في القبر  كمان ..أصل سيدنا أبو بكر هو أول شخص أندفن جنب النبى عليه الصلاة والسلام .. رضي الله عن سيدنا أبو بكر وأرضاه ..

النبي عليه الصلاة والسلام كان بيقول ايه عن سيدنا أبى بكر ؟ إن من أمَنّ الناس عليّ في صحبته وماله " أبي بكر" .. يعنى النبيﷺ بيقول أن أكتر إنسان له فضل عليا أبو بكر .. تخيلوا .. أبو بكر له فضل على النبيﷺ !

ويقول النبىﷺ : " إن الله تعالى أتخذنى خليلا كما أتخذ إبراهيم خليلا .. ولو كنت متخذا من البشر خليلا لأتخذت أبا بكر  "

شايفين .. سيدنا محمد كمان كان خليل الله زى سيدنا إبراهيم .. ومرتبة الخلة دى أعلى من مرتبة المحبة .. الخلة هي أن يتخلل الحب القلب .. فهذه المنزلة لا تجوز في قلب النبيﷺ إلا لرب العالمين .. فعشان كده النبيﷺ قال أنى مقدرش  أتخذ خليل من البشر .. لأن ربنا هو خليلى لكن لو كنت هختار خليل من البشر كنت هختار أبو بكر الصديق ..

طيب كان في حاجة عجيبة أوى بتحصل مع النبىﷺ وأبو بكر رضى الله عنه
  هى أن كان أبو بكر والنبيﷺ يقولوا نفس الحاجة و مايكونوش متفقين عليها،  فاكرين في السيرة النبوية لما حكينا عن صلح الحديبية، فاكرين سيدنا عمر لما زعل وقال يا رسول الله ألست رسول الله؟! أليسوا المشركين؟! ألسنا المسلمين؟! كيف نعطي الدنيّة في ديننا؟! ( ليه نوافق على شروط قريش الظالمة دى ونوافق على الصلح.. وسيدنا عمر كان زعلان أوى ) فالنبيﷺ قال له: يا عمر أنا رسول الله ولن يضيعني ( أنا عارف أنا بعمل إيه ) فقام عمر قايل: ألم تقل أننا سنعتمر يا رسول الله؟ ( سيدنا عمر تعبان أوى نفسيا من كتر الزعل )

قام النبيﷺ قال له : يا عمر .. أقلت لك هذا العام؟ فعمر قال : لا .. لم تقل هذا العام ..  ( وفعلا المسلمين حيعتمروا زى ما النبىﷺ قال ولكن مش السنة دى) فعمر لسه زعلان فقام رايح لأبو بكر وسأله .. فراح أبو بكر قايل له : يا ابن الخطاب! هو رسول الله والله لن يضيعه، و لم يقل سنعتمر هذا العام ..

شايفين أبو بكر قال نفس كلام النبىﷺ بالظبط!! طب ازاى يحصل كده؟!  ده بيحصل بسبب شدة الحب بينهم

ما هو أبو بكر ده اللي قال " شرب النبي حتى رضيت" .. يعنى النبيﷺ  شرب لحد ما ارتحت وشبعت، يعنى النبيﷺ لما ياكل بحس كأنى أكلت بالظبط .. شايفين أد أيه العلاقة بينهم جميله !!  وأد إيه الإسلام ده مليان حب، الإسلام لا دين قتل ولا دين عنف ولا دين تكفير .. بالعكس ده دين كله قائم على الحب .. الإسلام والرسالة ابتدت بجبريل وهو بيحتضن النبي عليه الصلاة والسلام بشدة ويقول له: أقرأ باسم ربك الذى خلق .. وأنتهت الرسالة بوفاة النبىﷺ وعائشة تحتضن النبى عليه الصلاة والسلام " .. ديننا كله قائم على الإحتواء والحب .. وقائم على تقدير الحب لدرجة أن  النبي عليه الصلاة والسلام قال: " المرء مع من أحب".. يعنى مهما كانت درجة اللى بتحبه أعلى منك فى الجنة فأنت حتتحشر معاه يوم القيامه ،لو كنت بتحبه من كل قلبك بجد"

يوم الهجرة النبيﷺ ماكانش بيتمنى انه يهاجر مع حد إلا سيدنا أبو بكر رضي الله تعالى عنه وأرضاه .. كان ساعتها أبو بكر بيجهز نفسه للهجرة .. فالنبيﷺ بص له وقال:
عَلَى رِسْلِكَ - يعنى انتظر - ، فَإِنِّي أَرْجُو أَنْ يُؤْذَنَ لِي ..
فقالَ أَبُو بَكْرٍ : وَهَلْ تَرْجُو ذَلِكَ بِأَبِي أَنْتَ وأمى ؟!
فقَالﷺَ : نَعَمْ ..
وبعد كده أذن ربنا عزوجل بالصحبه ..فهاجروا سوا

فاكرين يوم وفاة النبيﷺ لما دخل أبو بكر الصديق  و قام حاضن النبيﷺ وكشف الغطاء عن وجه النبيﷺ الشريف وقبّله بين عينيه وقال: طبت حيا وطبت ميتا يا رسول الله ( يعنى جميل وأنت حي وجميل وأنت ميت يا رسول الله )

النبى عليه الصلاة والسلام ما حبش حد زي ما أحب أبو بكر، ومحدش فى الدنيا حب النبيﷺ زى ما أبو بكر حبه

وقت الهجرة من مكه للمدينة سيدنا أبو بكر كان بيحاول يحمى النبيﷺ من أى حد يأذيه وقال للنبيﷺ: إن مت فإنما أنا رجل وأنت يا رسول الله إن مت فإنما أنت هذا الدين.

نكمل بكرة إن شاء الله