الخلفاء الراشدين

الحلقة 21

اللهم اغفر للمؤمنين والمؤمنات الأحياء منهم والأموات _____________________________________

خلي الامل بالله موصول:
النهاردة هندخل في الجد ومعركة المسلمين مع الرومان والبطولات الفردية للصحابة يالا بينا  👇
( 21 )

جيش المسلمين مستعد .. ماهان قائد جيش الرومان معاه ربع مليون بس بردو قلقان جدا .. هتعمل ايه يا ماهان ؟ هيعمل حرب نفسية يحاول يكسر معنوية المسلمين .. يبعت لسيدنا خالد يقول له من فضلك عايز اتكلم معاك .. فخالد يوافق .. عشان يمكن ماهان يكون بيحاول يعمل معاهده سلام وطبعا ده شئ المسلمين معندهمش مشكله فيه .

فيروح سيدنا  خالد .. فيقول ماهان: ارجع يا خالد ولك عندى لكل جندى من جنودك عشرة دنانير ولرؤسائكم ألف دينار .. فقد سمعنا أنكم قوم جوعى وعراة .. وجئتم لتأخذوا بعض الأموال .. فلكل جندى من جنودك عشرة دنانير وكسوة وطعام ولكم ذلك كل عام ( طبعا المسلمين مش بيحاربوا عشان الفلوس ووضحنا ده فى الحلقه السابقة

المهم رفض سيدنا خالد ورد وقال : " إننا أيها الأمير  قوم عطشى وجوعى ولكننا لا نشرب إلا الدماء وقد سمعنا أن دماء الروم أطيب دماء .. فجئنا لنشرب من دمائكم " .. فيغضب ماهان جدا .. ويقرر يحارب

ويأمر سيدنا خالد بن الوليد جيش المسلمين ويقول : أيها الناس اقرأوا سورة الجهاد .. طب هو فى سورة أسمها سورة الجهاد ؟ لأ مفيش لكن سيدنا خالد يقصد سورة الأنفال أصل الصحابه كانوا بيسموها سورة الجهاد .. المهم أرتفعت الروح المعنويه للجيش وكله بيردد الله اكبر .. الله اكبر ..

ويحاول ماهان يقلد خطط المسلمين ويفشل فشل ذريع .. ويدخل جيش المسلمين فى قرية وكان على يمينه جبل وعلى شماله جبل ومن وراهم جبل .. فدخلوا لاقوا العدو ميقدرش يهاجمهم غير من أتجاه واحد .. فكانت فكرة ذكيه والظروف ساعدتهم .. لكن جيش ماهان ماكانش عنده نفس الظروف فلما ماهان عمل نفس الفكرة حبس جيشه .. تخيلوا دخل ربع مليون جندى فى قرية .. فكده الرومان حبسوا نفسهم فقال سيدنا عمرو بن العاص : ابشروا .. حصرت الروم نفسها ..

فخالد بن الوليد بدأ يقسم الجيش ميمنة وميسرة ومقدمة ومؤخرة وبدأت المعركة وكان القتال شديد جدا وفى الأول ظهرت بشاير نصر جيش المسلمين لدرجة أن أنتشرت إشاعه أن قائد جيش المسلمين معاه سيف من عند الله ..

أول يوم فى المعركه عدى .. والروم بدأ يحصل لهم رعب وخوف من المسلمين .. خصوصا أن مرة قبل معركة اليرموك واحد من القادة بعت جاسوس .. عشان يروح لجيش المسلمين واستخبى عشان يعرف المسلمين هيعملوا ايه .. فرجع وقال له : أيها القائد رأيتهم رهبانا بالليل .. فرسانا بالنهار ، إذا سرق كبيرهم عاقبوه .. فكان الرومان فعلا خايفين من المسلمين ..المهم تانى يوم بدأت المعركة تبدأ وبدأت تطلع بطولات فرديه .. فيطلع شاب جميل صغير فى السن ويروح لأبو عبيده بن الجراح .. ويقول له: أيها الأمير ائذن لى أن ادخل فأبارز وأشفى قلبى من عدوى .. وأجاهد لعل الله يرزقنى الشهادة فى سبيله ..

فبكى أبو عبيدة بكاء شديد وأذن له بالخروج فالشاب بص له وقال له: هل تريد أن تقول لرسول الله شيئا ؟ فقال أبو عبيدة : نعم يا بنى أقرئ رسول الله منى السلام وأخبره أنَّا وجدنا ما وعدنا ربنا حقًّا ..

ويدخل الشاب ويقاتل ويقتل أول رومانى والتانى والتالت والرابع كل دول قتلهم الغلام  .. لحد ما الخامس قتل الغلام واستشهد فى سبيل الله .. فيقول سيدنا أبو عبيدة : من منكم لها ؟ مين يبارز الرومانى ده؟

فقام سيدنا معاذ بن جبل وقال : أنا لها .. قام سيدنا أبو عبيدة مسكه وقال له: لا يا معاذ أنا محتاجك فى الجيش، أنت حامل الرايه مينفعش تسيبها .. فوقف  معاذ بن جبل وقال: أيها الناس من يبارز هذا الأجنبي .. فيطلع عبد الرحمن بن معاذ بن جبل .. وكان سنه صغير وكان من مشاة الجيش فقال: أنا يا أبى .. فيعطيه سيدنا معاذ سيفه وفرسه .. ويطلع عبد الرحمن بن معاذ بن جبل ويبارز ويضربه الجندى فتتفتح راس عبد الرحمن ويتملى وشه بالدم ويبص لأبوه معاذ ويقول : يا أبى قتلنى الرومي .. فيبكى معاذ ويقول له: يا بنى وماتريد من الدنيا ؟! ويرجع عبد الرحمن ويقاتل ويستشهد رحمه الله ..
بعديها يطلع واحد من المسلمين اسمه عامر بن الطفيل الدوسي .. ويبارز الفارس الرومانى .. وفعلا أنتصر عليه وقتله.. فيقوم طالع فارس رومانى اسمه جبله .. ده فارس مشهور جدا عند الرومان،  ويطلع جبله ويبارز عامر بن الطفيل الدوسي مبارزة شديدة جدا .. فيقوم جبله يقتل عامر .. فجيش المسلمين كان موجود فيه جندب بن عامر بن الطفيل الدوسي .. فيشوف أبوه أتقتل فياخد سيفه ويركب فرسه ويقول لسيدنا أبو عبيدة : أيها الأمير دعنى آخذ بثأر أبى .. فقال أبو عبيدة : أنتظر يا بنى .. فقال له : لا والله لا يقتله إلا أنا .. فيطلع جندب ويقف لجبله ، و جبله ده ضخم .. فيقول له من أنت يا بنى .. فيقول : أنا ابن هذا القتيل .. فقال : يا بنى على ماذا تقتلون أنفسكم ؟ فقال : نقتل أنفسنا فى سبيل الله .. قال جبله : يا بنى ارجع إنى لا أريد أن أقتلك .. .. فقال : ولكنى أريد أن أقتلك ..
طب مين اللي هيكسب ده اللي هنعرفوا مع بعض بكره بإذن الله 💘