الخلفاء الراشدين

الحلقة 12

اللهم صل وسلم وبارك على سيدنا ونبينا محمد وعلى آله وصحبه أجمعين 
________________--__-_____________________

خلي الامل بالله موصول:
(12)

شفنا امبارح مسيلمة الكذاب اللى ادعى أنه نبى بعد سيدنا محمد عليه الصلاة والسلام .. مرة كان سيدنا عمرو بن العاص قبل إسلامه رايح اليمامة .. فمسيلمه قال له : يا عمرو ما آخر ما نزل على محمد .. فقال عمرو سمعته يقول:﴿ وَالْعَصْرِ * إِنَّ الْإِنْسَانَ لَفِي خُسْرٍ * إِلَّا الَّذِينَ ءَامَنُوا وَعَمِلُوا الصَّالِحَاتِ وَتَوَاصَوْا بِالْحَقِّ وَتَوَاصَوْا بِالصَّبْرِ ﴾" ( وكان وقتها عمرو بيفكر فى الإسلام .. عارفين سورة العصر الإمام الشافعى قال إيه عنها ؟ قال : لو تدبر الناس سورة العصر فقط لكفتهم .. ( يعنى سورة العصر دى بليغه وشامله لبراهين كتير ) المهم سكت مسيلمة شوية وبعدين قال لعمرو : لقد نزل علي مثلها .. فقال عمرو: وما هى؟ فقال مسيلمه: " يا وبر يا وبر إنما أنت أذان وصدر "  ( الوبر ده اسم طائر ) المهم عمرو أول ما سمع التأليف بتاع مسيلمة بص له وقال: يا مسيلمة أنت تعلم  أنى أعلم أنك كذاب ( أصل يا جماعة مسيلمة ده كان حاوى يعنى مخادع كبير )

المهم لما سمع عن سورة الفيل .. قال أنا نزل عليَّ خيراً مما نزل على محمد .. وبدأ يقول: الفيل ما الفيل ، له زلوم طويل .. ولما سمع سورة النازعات قال : إنى نزل عليَّ الوحى بمثل النازعات وبدأ يألف ويقول : والعاجنات عجنا والزارعات زرعا فالحاصدات حصدا والطاحنات طحنا .. وعمل كلام كمان أطلق عليه اسم الضفدع .. وقال : يا ضفدع بنت الضفدعين ،نقى ما تنقين، نصفك فى الماء ونصفك فى الطين ..

شايفين أد ايه كلام مسيلمه الكذاب تافه .. احنا حبينا أننا نوريكم جزء منه عشان تشوفوا  ان برغم تفاهته دى إلا أن فى ناس ءامنت بيه وصدقته وأتبعه ٤٠ ألف شخص .. متخيلين ؟! .. طب إزاى ده يحصل ؟! أصل يا جماعة ربنا قال: "يُثَبِّتُ اللَّهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الْآخِرَةِ ۖ وَيُضِلُّ اللَّهُ الظَّالِمِينَ ۚ وَيَفْعَلُ اللَّهُ مَا يَشَاءُ " [سورة إبراهيم]

أصل الثبات ده يا جماعه مش بأيدينا .. اوعى تفتكر أن ثباتك على الإسلام وعلى السنة وعلى الحق دى شطارة منك .. لا ده فضل فعلاً من ربنا سبحانه وتعالى لأن ازاى ناس بعد ما سمعوا القرآن بإعجازه من رب العالمين .. يكفروا به ويصدقوا كلام تافه كده .. عرفتوا ليه النبى عليه الصلاة والسلام دايما كان بيدعى اللهم يا مقلب القلوب والأبصار ثبت قلوبنا على دينك .. وربنا عزوجل قال :" وَلَوْ عَلِمَ اللَّهُ فِيهِمْ خَيْرًا لَّأَسْمَعَهُمْ ۖ وَلَوْ أَسْمَعَهُمْ لَتَوَلَّوا وَّهُم مُّعْرِضُونَ " [سورة الأنفال]

طيب وقفنا امبارح على أن النبى عليه الصلاة والسلام  بعت لمسيلمة الكذاب رد على رسالته .. والرسالة دى اتبعتت مع صحابى اسمه حبيب بن زيد .. حبيب بن زيد ده من كبار الصحابة ؛ فاكرين مين حبيب ده .. ده ابن أم عمارة ( نسيبة بنت كعب ) فاكرينها ؟ فاكرين المرأة اللى كانت واقفة بتدافع عن النبيﷺ وقعدت تبارز بالسيف دفاعاً عن النبيﷺ وييجى واحد من الكفار يضربها على كتفها عشان توسع له الطريق عشان يقتل النبىﷺ فيضربها لحد ما عظام كتفها تتهشم وتتكسر ..  وكان النبىﷺ يقول لها: ومن يطيق ما تطيقين يا أم عمارة .. مين يستحمل اللى استحملتيه .. الست دى يبقى ابنها سيدنا حبيب بن زيد ..

وبعد ما حبيب وصل بالرسالة لمسيلمة .. فيقبض عليه مسيلمة الكذاب ويصلبه .. ويبدأ مسيلمة يضربه فى كل حتة فى جسمه ويعذب فيه .. ويوقف تعذيب ويروح يسأله: أتشهد أن محمد رسول الله فيقول لمسيلمة : نعم أشهد أن محمداً رسول الله ( خاتم النبيين وسيد المرسلين ) فيقول مسيلمة: وتشهد أنى رسول الله ، فحبيب يعمل أن سمعه تقيل ويقول إنى أصم لا أسمع ..

ويرجع مسليمه تانى يعذبه وبعدين يوقف تعذيب ويرجع يعيد عليه نفس الأسئلة وسيدنا حبيب يفضل ثابت على نفس موقفه لحد ما يموت .. ويستشهد سيدنا حبيب رضى الله عنه وعن الصحابة أجمعين ..

وفى خلافة سيدنا أبو بكر الصديق .. حتطلع جيوش تحارب المرتدين وحيبقى اسمها حروب الردة .. وحيتقتل مسيلمة الكذاب .. طيب هى كام بلد أرتدت ؟ ١١ بلد .. يعنى أنت يا سيدنا أبو بكر هتبعت ١١ جيش؟ اه هبعت ١١ جيش ..

وباقى التفاصيل حنعرفها بكرة إن شاء الله

.....................،.......................................

اللهم اغفر للمؤمنين والمؤمنات الأحياء منهم والأموات