الخلفاء الراشدين

الحلقة 13

اللهم صل وسلم وبارك على سيدنا ونبينا محمد وعلى آله وصحبه أجمعين

________________________________________

خلي الامل بالله موصول:
( 13 )

حروب الردة (ج١)

قرر سيدنا أبو بكر الصديق قرار .. هطلع جيوش لحروب الردة .. هى كام بلد ارتدت عن الإسلام  وكفرت بعد وفاة النبى؟ ١١ بلد .. يعنى أبو بكر  هيبعت ١١ جيش .. على فكرة يا جماعة سيدنا أبو بكر شخصية قوية .. عقد ١١ لواء ل ١١ جيش فى يوم واحد وماحدش يقدر ياخد القرار ده غير سيدنا أبو بكر .. كل الجيوش طلعت .. بس الجيش اللى خارج يحارب جيش مسيلمة حيواجهه مشكلة .. طيب مين قائد الجيش ده ؟ سيدنا عكرمة بن أبى جهل .. عكرمة صحابى من مسلمى فتح مكه وكان نفسه يعمل حاجة للإسلام يكَفِّر بيها عن كل اللى فات .. فاكرين لما عكرمة راح للنبى عليه الصلاة والسلام وقال له : يا رسول الله  كل قتال كنت أقاتله فى الصد عن سبيل الله .. والله لأقاتل أضعافه فى سبيل الله .. وكل ما أنفقته فى الصد عن سبيل الله والله لأنفق أضعافه فى سبيل الله .. طيب كده جميل أوى .. طب ايه اللى هيحصل ؟

سيدنا أبو بكر كان عارف أن جيش مسيلمه كبير فبعت جيش بقيادة سيدنا عكرمة وبعد كده بعت جيش وراه بقيادة واحد اسمه شرحبيل بن حسنه ( ده صحابى ) .. وسيدنا أبو بكر وصى سيدنا عكرمة أنه ما يحاربش جيش مسيلمه إلا بعد ما يوصل له جيش شرحبيل بن حسنه .. لكن سيدنا عكرمة كان متحمس أوى .. ونفسه ينتصر  بسرعة ..

فييجى عكرمة فيلاقى أن جيش مسيلمة هدأ وأستقر .. فعكرمة يحسبها فيلاقى أن ده وقت مناسب للهجوم .. رغم أن أبو بكر قايل له اوعى تهاجم يا عكرمة إلا لما يوصلك جيش شرحبيل .. ( أصل يا جماعه جيش مسيلمه طلع كبير جدا )

المهم سيدنا عكرمة قرر يهجم على جيش مسيلمة وللأسف حتحصل هزيمة ساحقة للمسلمين .. وحينهزم جيش عكرمة .. لدرجة أن جيش مسيلمة حيطلع يجرى وراهم من كتر ما كانت هزيمة ساحقة .. عرفتوا ليه لازم الجيش فى الإسلام يسمع كلمة الخليفة ؟ .. بس سيدنا عكرمة ما يقصدش .. يعنى احنا برده مانزعلش من سيدنا عكرمة .. من حكمة ربنا أن يحصل كده مع سيدنا عكرمة عشان احنا نتعلم أن رغم أن عكرمة كانت نيته خير إلا إنه كان لازم يسمع كلام الخليفة ..

المهم وصلت الأخبار لسيدنا أبو بكر ويغضب غضب شديد .. ويأمر عكرمة أنه يغير طريقه وينضم جيشه لجيوش تانية فى منطقة تانيه .. بس رغم كده إلا أن سيدنا أبو بكر حيبعت رسالة للجيوش اللى هينضم ليها سيدنا عكرمة وهيقول لهم : سيأتيكما 
عكرمة فأسمعوا له فإن له رأيا ( شايفين .. رغم أن عكرمة أخطأ إلا أن سيدنا أبو بكر بيحترم أنه له رأي ووجهة نظر ممكن يكون فيها مصلحة المسلمين ) 

بعد كده وصل جيش شرحبيل بن حسنه للمنطقة الاولانية اللى كان فيها عكرمة .. وسيدنا أبو بكر يبعت رسالة لشرحبيل بن حسنه ويقول له : أنتظر .. لا تحارب جيش مسيلمه حتى أبعث لك مددآ ( ناس أكتر ) بس  للأسف شرحبيل شاف أن الوقت مناسب للهجوم .. بس بردو سيدنا أبو بكر ماأمرش بالهجوم .. طب هيعمل إيه شرحبيل؟

هنعرف المرة الجاية ان شاء الله