الخلفاء الراشدين

الحلقة 9

اللهم صل وسلم وبارك على سيدنا ونبينا محمد وعلى آله وصحبه أجمعين

________________________________________

خلي الامل بالله موصول:
زي مقولنا قبل كده الناس اللي البوستات الديني تقيله علي قلبها ملناش دعوة بيهم
اوووعوووا تكونوا منهم
ولو منهم 😔 فابعد عنهم دا دينك وضروري تعرف عنه كل حاجه...اتفقنا ؟؟
يالا بينا 😍👇
إمبارح بدأت خلافة سيدنا أبو بكر الصديق طب اية أول حاجة هيعملها ده اللي هنعرفوا مع بعض النهاردة يالا بينا  👇
( 9 )
سيدنا أبو بكر كان أشد الناس إتباعاً لرسول الله ﷺ وأشد الناس حباً لرسول الله .. أيه أول قرار هتاخده بعد الخلافة يا سيدنا أبو بكر ؟ أول قرار هو أنه يبعت جيش أسامة .. هو أيه موضوع الجيش ده ؟ النبيﷺ قبل ما يموت كان مجهز جيش بقيادة أسامة بن زيد وكان هيبعته لمواجهة الرومان .. فمرض النبىﷺ فوقف الجيش وماطلعش .. وبعد كده مات النبيﷺ وكان النبىﷺ قبل ما يموت قرر أن أسامة بن زيد هو قائد الجيش .. فبعد وفاة النبىﷺ .. أبو بكر اخد قرار بأن جيش أسامة لازم يخرج .. (طيب بس ده بالمنطق كده قرار مش فى وقته أبداً .. لأن أهل المدينة تعبانين والجيش نفسه كمان نفسيته فى الأرض لأنه فقد نبى آخر الزمان )

فالجيش تعبان جداً ومنكسرين جداً والرومان حيبقى سهل أنهم ينتصروا .. كمان سيدنا أبو بكر هيبعت الجيش كله بره المدينة .. و ده خطر جدا  لأن ممكن  حد ييجي يهجم على المدينة ويستولى عليها .. فبكده جيش المسلمين من الأفضل أنه ميخرجش لحرب خصوصاً أن أغلب القبائل العربية أرتدت .. يعنى أول ما النبىﷺ مات، بلاد كتير كفرت بعد إسلامها .. طب حيحصل إيه ؟

الصحابة هيبدأوا يعملوا مع سيدنا أبو بكر محاولات لمنع خروج الجيش .. فيروح مجموعه من الصحابة  لسيدنا أبو بكر .. ويقولوا : يا خليفة رسول الله لا نرى أن يخرج جيش أسامة .. فقال: ولماذا ؟ فقالوا: كيف يخرج الجيش ويترك المدينة بلا جيش .. وأرتدت العرب ( البلاد كلها ارتدت ماعدا مكة والطائف والمدينة .. تخيلوااا !! ) فرد أبو بكر وقال: بل سيخرج  جيش أسامة .. ووالله لا أحلّ عقدة عقدها رسول الله صلَّى الله عليه وسلَّم  ( يعنى مادام  النبى نوى وأمر أن الجيش يطلع يبقى يطلع )

شايفين قمة الإتباع فى الصديق رضى الله عنه .. فالصحابه مشيوا .. وحيبعتوا سيدنا عمر بن الخطاب لسيدنا أبو بكر  لأنه قريب منه وصاحبه .. فيروح عمر ويقول له: يا خليفة رسول الله .. يقول لك الصحابة أن لا يخرج  جيش أسامة ..( أصل الناس تعبانة والرومان أقويا ) فيقول أبو بكر: لا والذى نفسى بيده ليخرج جيش أسامه .. ولو لم يبقى غيرى لأخرجته ..
فعمر يهزه كلام سيدنا أبو بكر ويرجع للصحابة ويقول لهم أن سيدنا  أبو بكر مصمم .. طب وبعدين ؟
فالصحابة يفكروا فى حل تانى وهو أن الجيش يطلع ولكن نحط قائد تانى غير أسامة  لأن أسامة عنده ١٨ سنة وصغير على قيادة جيش .. فيروحوا لسيدنا عمر عشان يقول الكلام ده لسيدنا أبو بكر .. فسيدنا عمر ينقل الكلام لسيدنا أبو بكر .. فينفعل أبو بكر جداً ويقول: ثكلتك أمك  يا ابن الخطاب أيجعل  رسول الله أسامة قائداً للجيش ثم أبدله أنا .. لا والله لن أُغيره أبداً .. ( ده النبىﷺ  اللى اختاره يبقى أكيد اختياره وراه حكمة ومصلحة للمسلمين ) .. فيخرج سيدنا عمر ويبلغهم بالكلام ..

خلاص حيطلع الجيش فيروح سيدنا أبو بكر لأسامة ويتحرك الجيش .. أبو بكر حيروح يوصّل الجيش لحد باب المدينة .. ويمشى أبو بكر على رجليه ويركب أسامة على الفرس والجيش ورا أسامة،  فأسامة يقول: ما يصحش يا خليفة رسول الله أنت اركب وأنا أمشى .. فقال أبو بكر : ولماذا لا أغبر قدماى فى سبيل الله لبرهة من الوقت ! ( كمان النبى عليه الصلاة والسلام زمان لما كان باعت معاذ بن جبل بجيش بمكان معين .. فقام النبىﷺ خلى معاذ يركب على فرس .. ومشى النبىﷺ
على رجليه جنب فرس معاذ .. وقعد يوصى معاذ الوصايا الحربية الإنسانية و معاذ يقول له : يا رسول الله أنت اركب و أنا أمشى .. فالنبىﷺ رفض وفضل ماشى على رجليه لحد ما وصلوا لباب المدينه فسيدنا أبو بكر الصديق حيعمل نفس الحاجة ويركب أسامة على الفرس ويفضل هو ماشى جنبه ) ويبدأ يوصيه الوصايا اللى اتعلمها من النبىﷺ.. يقول : يا أسامة لا تقتلوا طفلاً .. لا تقتلوا امرأة .. لا تقتلوا شيخا .. لا تحرقوا زرعاً .. لا تقطعوا نخلاً .. ستجدون رهباناً فى الصوامع تفرغوا للعبادة دعوهم لما هم فيه .. ( جيش المسلمين عنده أخلاق حربية ما تعرفهاش البشرية لحد دلوقتى صلى الله على محمد صل الله عليه وسلم )

المهم يفضل جيش أسامة ماشى، وخلاص وصلوا عند باب المدينة .. فسيدنا أبو بكر يقول : يا أسامة أتأذن لى فى عمر .. ( أبو بكر محتاج عمر معاه فى المدينة ) .. فيوافق أسامة ويقول : نعم يا خليفة رسول الله وسيدنا عمر يقول: الأمر لك يا خليفة رسول الله .. ويرجع سيدنا عمر مع سيدنا أبو بكر .. وينطلق جيش أسامة ويقربوا يوصلوا للرومان .. والرومان كانت مستعدة ومجهزة نفسها .. عارفين إيه اللى حصل أول ما الرومان عرفت أن جيش المسلمين قرب عليهم ؟

هنعرف بكرة إن شاء

________________________________________

اللهم صل وسلم وبارك على سيدنا ونبينا محمد وعلى آله وصحبه أجمعين