الخلفاء الراشدين

الحلقة5

اللهم صل وسلم وبارك على سيدنا ونبينا محمد وعلى آله وصحبه أجمعين

___________________________________

خلي الامل بالله موصول:
النهاردة حلقة جديدة من سلسلة قصة حياة الخلفاء الراشدين عايزين تعرفوا سيدنا أبو بكر الصديق اكتر يالا بينا 👇
(5)
تعرفوا أن مرة النبيﷺ والصحابة كانوا واقفين فى الحرم فقام أبو بكر ودعا أهل قريش  للإسلام .. فكفار قريش هجموا عليهم وبدأوا يضربوا المسلمين .. والكفار مسكوا سيدنا أبو بكر  وفضلوا يضربوا فيه .. وبعدين جه اللئيم عتبة بن ربيعة" الكافر" وضرب سيدنا أبو بكر .. فيقع أبو بكر على ضهره، ويجلس عتبة بن ربيعة ويكتف سيدنا أبو بكر .. وفضل يحاول يثبت وجه سيدنا أبوبكر وقلع عتبة الحذاء  وفضل يضربه بالحذاء على وجهه الشريف ويبدأ أبو بكر يبعد لكن مش قادر .. ويفضل الكافر الخبيث يضرب سيدنا أبو بكر لحد ما وجهه بقى وارم .. وبقى وجه أبو بكر ما تعرفش تحدد فيه أى ملامح .. ويغمى عليه .. فيفتكروا  أنه مات فيسيبوه .

فتيجي قبيلة أبو بكر وكانت قبيلة كبيرة  فقالت : يا معشر قريش والله لئن مات أبو بكر لنقتلن عتبة بن ربيعة .. رجل لرجل ..

قامت قبيلة أبو بكر شالته لحد بيت أمه .. فلما فتحت الباب لاقت ابنها غارق في دمه فصرخت .. فقالوا : أطعميه وأسقيه لعله يتعافى .. وفضل أبو بكر مغمى عليه فترة طويلة لحد ما صحي الحمد لله وفاق .. وأول ما فتح عينيه .. أول كلمة قالها : ما فُعِلَ برسول الله ؟ فكانت أمه لسه كافرة فقالت له: دعك من محمد .. ( يعنى مش كفايه اللى حصل لك بسببه ) .. فرفض سيدنا أبو بكر انه ياكل وقال لها: اذهبي إلى فاطمة بنت الخطاب  ( أخت عمر بن الخطاب .. أصلها أسلمت قبل سيدنا عمر )

المهم قال لها اسأليها عن أخبار رسول اللهﷺ ..  فخرجت أمه وراحت لفاطمة بنت الخطاب .. فقالت الأم: يا فاطمة يسألك أبو بكر الصديق ما فٌعِلَ برسول الله  .. فقالت: لا أدرى من أبو بكر ومن رسول الله  (خايفة من عمر أخوها يعذبها لو عرف أنها أسلمت ) .. فكررت الأم السؤال وردت فاطمة وأنكرت .. بس فاطمة قلقت فقالت لأم ابو بكر : لو عيزانى آجى أشوفه واحاول أعرف فى ايه .. ف أنا ما عنديش مانع ..  وفعلا أم أبو بكر أخدت فاطمة ورجعت على البيت ..

فلما فاطمة بنت الخطاب شافت اللى حصل فى أبو بكر  فما قدرتش تمسك نفسها فصرخت وقالت: والله إن من فعل بك ذلك لرجل فاسق وإنى لأرجو الله أن ينتقم منه .. ففتح أبو بكر عينيه لما سمع صوتها  فقال لها: يا فاطمة ما فُعِلَ برسول الله ؟ فقالت يا أبو بكر أمك تقف وتسمع .. فقال: لا عليكى هى منى ( يعني مش حتقول لحد حاجه ) .. فقالت: يا أبا بكر إن النبيﷺ بخير .. فقال: والله لا آكل طعاما ولا أشرب شرابا حتى أطمئن على رسول الله ..  ( طيب ده أنت مش عارف تقوم على رجليك يا أبو بكر )

ففاطمه وأم سيدنا أبو بكر أستنوا لحد ما الجو هدى وما بقاش فى ناس كتير وسندوه لحد ما وصلوا لدار الأرقم بن أبى الأرقم وخبطوا على الباب فيفتح لهم بلال بن رباح،
فالنبي ﷺ  يشوف منظر أبو بكر فيرق له رقة شديدة  ويحن عليه .. ويجري على أبو بكر  ويحضن أبو بكر .. بس أبو بكر مش عايز النبي عليه الصلاة والسلام يتأثر ويزعل .. أبو بكر عايز يخلى النبى ﷺ يهدى وما يزعلش فيقول له : يا رسول الله أنا بخير وما بي إلا ما نال الفاسق من وجهى .. ( أنا كويس دى شوية ضربات فى وشى وبس )

نكمل بكرة إن شاء الله

___________________________________

اللهم صل وسلم وبارك على سيدنا ونبينا محمد وعلى آله وصحبه أجمعين