الخلفاء الراشدين

الحلقة 16

اللهم صل وسلم وبارك على سيدنا ونبينا محمد وعلى آله وصحبه أجمعين

___________-_----_____________________

خلي الامل بالله موصول:
النهاردة طولنا الحلقة شوية زي ما أنتم طلبتوا إمبارح
مستعدين 🤔
يالا بينا 🤗
( 16 )
يلا صلو على النبى
حروب الردة (ج٤)

نكمل كلامنا عن معركة اليمامه .. مين فى ميسرة جيش خالد بن الوليد ؟ حذيفه بن اليمان .. حذيفه بن اليمان ماكنش صحابى عادى .. هو وأبوه اليمان هاجروا للمدينه وعاشوا فيها قبل ما النبيﷺ يهاجر أصلا .. ولما سمعوا عن النبى محمد عليه الصلاة والسلام حبوه جدا وحبوا الإسلام .. ومبقوش قادرين يستحملوا بعدهم عن النبي صلى الله عليه وسلم .. فقرروا يهاجروا من المدينه لمكه ودى كانت أول مره تحصل .. أصل كله بيهاجر من مكه للمدينه .. أما حذيفه وأبوه هاجروا من المدينه لمكة .. وساعتها كان النبيﷺ قرب ميعاد هجرته من مكه للمدينه .. فالنبيﷺ شافهم وفرح بيهم اوى .. ولما النبيﷺ هاجر للمدينه هاجروا معاه .. فالنبيﷺ قال: يا حذيفه إن شئت تكون من المهاجرين وإن شئت تكون من الانصار .. فقال حذيفه: أكون من الانصار يا رسول الله .. فمن يومها وحذيفه من الأنصار .. ( أصل الأنصار دول اهل المدينه .. أما المهاجرين دول اللى هاجروا من مكه
.. فحذيفه كان فى المدينه وهاجر لمكه وبعد كده هاجر للمدينه .. فكده حذيفه بقى يختار براحته أنه يكون مهاجرى أو أنصارى )

طيب مين كمان فى جيش خالد بن الوليد ؟ عبد الرحمن بن أبى بكر ومعاويه بن أبى سفيان .. وكمان واحد اسمه وحشى بن حرب .. فاكرينه ؟ ده اللى قتل سيدنا حمزه رضى الله عنه .. بس أسلم بعد كده .. وكان سيدنا وحشى طالع معركة اليمامه عشان حاجه واحده بس وهى قتل مسيلمه .. وحشى لما عرف أن فى واحد اسمه مسيلمه بيقول انا نبى بعد محمد .. فنوى سيدنا وحشي أنه يقتل مسيلمه بنفسه وبنفس السلاح اللى قبل ما يسلم قتل بيه سيدنا حمزه .. فأخد وحشى الحربه (السلاح بتاعه) وطلع للمعركة وكان كل هدفه قتل مسيلمه الكذاب ..

طيب أحنا النهارده ايه ؟ النهارده فجر المعركه .. احنا بنحارب من بعد الفجر .. من أول ما النهار يطلع لحد المغرب .. وتبدأ المعركة وكان قتال شديد وعنيف .. ومحدش كان متخيل أن مسيلمه بهذا الدهاء العسكرى ..
( مش عيب أننا نعترف أن جيش العدو كان قوى .. بالعكس ده بيدل أن أنتصارات المسلمين كانت بمجهود وقوة غير طبيعيه )

المهم جيش مسيلمه كان قوى جدا وعامل خطط ذكيه .. وكان القتال شديد جدا لدرجه أن هتحصل انكساره للمسلمين فى نص المعركة .. أصل كانت ايه خطة سيدنا خالد ؟ كانت خطة سيدنا خالد أننا نهاجم .. وخطة مسيلمه كانت الدفاع وبعدين هجوم مضاد .. فعلا خطه مسيلمه محكمه جدا .. فالمسلمين بدأوا المعركه بالهجوم وبعد كده جيش مسيلمه عمل كمين وفجأه جيش مسيلمه هجم على جيش المسلمين .. وده أتسبب فى الخلخله اللى حصلت فى جيش المسلمين وأتسبب فى أن حصلت انكساره .. وبدأ جيش سيدنا خالد ينكسر ودى كارثه لأن جيش المسلمين ١٢ ألف ومسيلمه ١٠٠ ألف وبدأ جيش مسيلمه يتقدم لدرجه أنه وصل لمعسكر المسلمين والأسوأ من كده هو أنهم وصلوا لحد خيمة سيدنا خالد ..