الخلفاء الراشدين

الحلقة2

اللهم صل وسلم وبارك على سيدنا ونبينا محمد وعلى آله وصحبه أجمعين

خلي الامل بالله موصول:
السلام عليكم بدأنا امبارح سلسلة الخلفاء الراشدين وأولهم سيدنا أبو بكر الصديق زي ما أتفقنا هما خمس دقايق من وقتنا الضايع طول النهار ع السوشيل وهناخد فيهم ثواب كمان يلا نكمل  👇
(2)
يلا صلو على النبى
" أسلم على يد سيدنا أبو بكر خمسة من العشرة المبشرين بالجنة "

تعالوا نقرب لسيدنا أبو بكر أكتر شوية ونعرفه أكتر، ايه هي اسماؤه ؟  الصديق وده أشهر أسم له ، وفى أسم تانى وهو العتيق .. يعني إيه العتيق ؟ أصل النبي ﷺ مرة  قال لأبو بكر: " أنت عتيق الله من النار" فأتسمى أبو بكر بالعتيق .. ومن أسمائه كمان الصاحب، والأتقى .. عشان ربنا ذكره فى القرآن بلفظ " الأتقى" قال تعالى : " وَ سَيُجَنَّبُهَا الأَتْقَى ، الَّذِي يُؤْتِي مَالَهُ يَتَزَكَّى "

الآيات دى نزلت فى سيدنا أبو بكر .. لما الصحابة كانوا بيتعذبوا .. سيدنا بلال وخبّاب وزنيرة .. فأبو بكر كان غني .. وقبل أنتشار الإسلام كانت ثروته أربعين ألف درهم رضي الله عنه وأرضاه، طيب  الفلوس دي كلها راحت فين ؟ أبو بكر أنفقها على الإسلام .. أصله كان لما يلاقى المسلمين اللى كانوا من العبيد بيتعذبوا .. كان  يجيب الفلوس ويروح يشتري العبيد ويحررهم لوجه الله ..

فأبوه (قبل اسلامه) جاله مرة وقال له إيه اللي أنت بتعمله ده يا أبو بكر؟ ليه بتعمل كدة ؟ عايز تشتري عبيد ماشي بس عبيد أشداء يعنى عضلات كدة عشان يدافعوا عنك ويشيلوا حاجات وتشغلهم .. فقال أبو بكر :   والله إنى لا أريد هذا ( سيدنا أبو بكر يريد وجه الله وبس )، فنزلت الآية " وَسَيُجَنَّبُهَا الأتْقَى ( يعنى الأتقى مش حيدخل النار ) ، الَّذِي يُؤْتِي مَالَهُ يَتَزَكَّى ( اللى بيتزكى ليعتق المسلمين ) وَمَا لأَحَدٍ عِنْدَهُ مِنْ نعمة تُجْزَى " ( ويكون مش عايز حاجة من حد لا شكر و لا حتى خدمة)، " إِلا ابْتِغَاءَ وَجْهِ رَبِّهِ الأعلى، وَلَسَوْفَ يَرْضَى " .. حترضى يا أبو بكر يوم القيامة، ربنا حيرضيك بكل خير .. شوفوا أبو بكر قد إيه كان غالي على ربنا عزوجل.

كمان ربنا ذكره فى الآية الكريمة : " ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا " .. "معنا" يعنى مع النبى عليه الصلاة والسلام وأبو بكر الصديق .. عشان كده من أسماؤه الصاحب ..

طيب يوم ما أبو بكر أسلم كام واحد أسلم على ايديه؟  أسلم خمسة ودول من العشر المبشرين بالجنة .. و اسماءهم .. سعد بن أبي وقاص، عثمان بن عفان .. عثمان ما أسلمش على إيدين النبيﷺ .. أسلم على إيدين أبو بكر وراح بايع النبىﷺ وقال الشهادة،
الزبير بن العوام، طلحة بن عبيد الله، عبد الرحمن بن عوف .. ودول من كبار الصحابة .. دول جبال .. شوفتوا أبو بكر عمل إيه للإسلام رضي الله تعالى عنه وأرضاه.

تعالوا نقرب كمان لحياة سيدنا أبو بكر الشخصية.
أبو بكر أتجوز كام مرة ؟ أتجوز أربع مرات .. أول زوجة كان اسمها " قُتَيلَة بنت عبد العزى "، " قُتَيلَة " دي على أغلب أقوال أهل العلم ماتت كافرة وما أسلمتش والله أعلم لأن أهل العلم ماهتموش بقصتها .. بس هي خلفت من سيدنا أبو بكر أتنين .. خلفت السيدة  أسماء بنت أبى بكر وسيدنا عبد الله بن أبى بكر الصحابى الجليل.

" أسماء " هى اللى لقبوها ب"ذات النطاقين"  .. بس أسماء وعبد الله أسلموا ، لكن فضلت " قُتَيلَة " أمهم مشركة على أغلب أقوال العلماء

في قصة جميلة أوى عن بر الوالدين إن أسماء وأخوها عبد الله أسلموا وقُتَيلَة  أمهم كانت مشركة، فمرة جت قُتَيلَة وخبطت على باب أسماء عايزة تزور بنتها ( وعلى فكرة سيدنا أبو بكر كان مطلق قُتَيلَة قبل الإسلام )

فالمهم جاءت قُتَيلَة بعد الإسلام تزور السيدة أسماء في بيتها .. فخبطت الباب فأسماء رفضت تفتح لأمها الباب عشان أمها لسه كافرة .. فالمهم أسماء مفتحتش الباب بس قامت رايحه تسأل النبيﷺ أن أمى بتجيلي البيت ومش بفتح لها فأدخلها ولا لأ ؟ فالنبيﷺ قال لها: " أجل ،صلي أمك ( يعنى متقطعيش صلتك بيها .. ودخليها وأكرميها وبريها وصاحبيها )
تخيلوا !! رغم أن الأم كافرة ..

قال تعالى: " وَإِن جَاهَدَاكَ عَلَىٰ أَن تُشْرِكَ بِي مَا لَيْسَ لَكَ بِهِ عِلْمٌ فَلَا تُطعهما  ۖ وَصَاحِبْهُمَا فِي الدُّنْيَا مَعْرُوفًا ۖ وَاتَّبِعْ سَبِيلَ مَنْ أَنَابَ إِلَيَّ ۚ ثُمَّ إِلَيَّ مَرْجِعُكُمْ فَأُنَبِّئُكُم بِمَا كُنتُمْ تَعْمَلُونَ (١٥) [سورة لقمان]

فأسماء بعد ما النبيﷺ علمها .. ابتدت تبر أمها الكافرة وتحسن إليها

نكمل بكرة إن شاء الله