الخلفاء الراشدين

الحلقة 15

اللهم صل وسلم وبارك على سيدنا ونبينا محمد وعلى آله وصحبه أجمعين

_______________________________________

خلي الامل بالله موصول:
الأحباب  اللي بيستنونا كل يوم عشان نحكي جزء من قصص حياة الخلفاء الراشدين النهاردة الحلقة 15يعني بقالنا نصف شهر مع بعض نكمل بقي يالا بينا  👇
( 15 )
حروب الردة (ج٣) 

زي مقولنا إمبارح جيش المسلمين بقيادة سيدنا خالد بن الوليد فى طريقه لليمامة لمحاربة جيش مسيلمة الكذاب " مدعى النبوة " قائد جيوش المرتدين .. خالد بن الوليد قائد عظيم وبيعشق الفروسية والقتال بس يا جماعة خلوا بالكم المسلمين  مش بيحاربوا حباً فى الحرب .. المسلمين بيحاربوا فى سبيل الله وتبليغ الدعوة لدين الله عزوجل دين التسامح والعدل .. دين بينصف العبيد اللى الملوك مستعبدينهم وإعطاء الناس حق اختيار الدين ..  قال تعالى : لا إكراه فى الدين .. يعنى الدعوة بتتبلغ وبعد كده فمن شاء فليؤمن ومن شاء فليكفر .. وبتحدى أى حد يطلع موقف واحد من السيرة النبوية الشريفة يبان فيها أن النبى عليه الصلاة والسلام حارب عشان يأخذ أرض مش بتاعته .. أو اعتدى .. مستحيل أبداً تلاقى لأن عمرها ما حصلت .. صلوات ربى وسلامه عليك يا رسول الله .. قال تعالى : وما أرسلناك إلا رحمة للعالمين ..

طيب جيش المسلمين ١٢ ألف وجيش  مسيلمة ١٠٠ ألف .. أنت فين دلوقتى يا سيدنا خالد؟ أنا فى منطقة اليمامة .. وجيش مسيلمة جيش العدو برده بيصُفّ جيشه وهيصف ويقسم جيشه على حسب القبائل .. كل قبيلة مع بعضها .. طب ليه؟ عشان يحمس فيهم انتماء القبائل .. طب وأنت يا خالد ؟ أنا هقسم الجيش لكتائب عسكرية .. أصل إحنا مسلمين مالناش دعوة ده من قبيلة إيه وده من قبيلة إيه .. كلنا مسلمين وأنتمائنا للإسلام ..

هيصُفّ سيدنا خالد جيشه  ويبدأ سيدنا خالد يقسم جيشه ميمنة وميسرة ومقدمة وقلب ومؤخرة .. زى جيوش المسلمين دايماً ..
مين فى الميمنة .. زيد بن الخطاب .. مين ده؟ ده أخو سيدنا عمر بن الخطاب .. زيد أسلم من زمان من قبل سيدنا عمر ما يسلم .. فكان زمان زيد  مسلم ومخبى إسلامه زى فاطمة بنت الخطاب كده عشان كانوا خايفين من عمر قبل ما يسلم .. فسيدنا زيد من كبار الصحابة ..

طب مين كمان فى الجيش ؟ الجيش فيه أم عمارة فاكرينها ؟ اللى كانت مع النبىﷺ  فى غزوة أحد وفضلت تدافع عنه لحد ما عظم كتفها اتكسر  .. مين كمان فى الجيش ؟ عبدالله بن عمر .. وأبو دجانة .. فاكرين أبو دجانة ده اللى يوم غزوة أحُد جرى على النبىﷺ لمّا لقى السهام بتتوالى عليه وأخذ النبىﷺ فى حضنه وحوط عليه وأخذ سهام فى ظهره .. المؤرخين قالوا أن كان ظهره زى ظهر القنفذ من كتر السهام .. فعلاً كان بطل من أبطال الإسلام .. طيب مين كان فى ميسرة الجيش ؟ سيدنا حذيفة بن اليمان

نكمل المرة الجاية إن شاء الله