الخلفاء الراشدين

الحلقة 10

اللهم صل وسلم وبارك على سيدنا ونبينا محمد وعلى آله وصحبه أجمعين

_________________________________________

خلي الامل بالله موصول:
(10)

شفنا إمبارح جيش أسامة وهو طالع لمواجهة الرومان .. عارفين إيه اللى حصل أول ما الرومان عرفوا أن جيش المسلمين قرب عليهم، استغربوا جدا .. ايه دا الصحابة دول مش  بشر ،يموت نبيهم أمبارح يخرجوا لينا بجيش ؟! .. وقال الرومان : لو لم يكن لهؤلاء المسلمين قوة ، لم يخرجوا لنا بجيش .. يعنى لو ماكانوش اقويا .. كانوا مش حيخرجوا علينا بجيش

وينسحب كل الرومان .. صلى الله على محمد .. والله يا جماعة خروج جيش أسامة ده معجزة ودليل من دلائل نبوة سيدنا محمد عليه الصلاة والسلام لأن حكمة النبىﷺ فى اختيار أسامة وفى طلوع الجيش مذهلة .. كأن النبىﷺ عايش وعارف اللى كان حيحصل ..

طيب بما أن الرومان انسحبوا يبقى مين اللى انتصر؟ أكيد المسلمين .. يا جماعة جيش المسلمين كان طالع بيتسند على بعضه .. جيش المسلمين مش قادر وتعبان من الحزن على وفاة النبىﷺ .. بس ببركة اتباع النبىﷺ أنتصر الجيش ..

عارفين يا جماعه لما تلاقوا حاجه النبىﷺ أمر بيها نفذوها وحاولوا تجاهدوا نفسكم فيها حتى لو مش قادرين تفهموا الحكمة من الأمر ده ..طب ليه ؟ لأن لازم تتأكدوا أن هيكون مع تنفيذكوا للأمر ده بركة وحيكون هو ده الصح حتى لو مش باين لكم الحكمه من الأمر ده .. لأن النبىﷺ عارف مصلحتنا أكتر مننا

فأتباع أمر النبىﷺ أكيد وراه مصلحة ووراه خير .. بس طبعاً لازم يكون أتباع عن فهم الأحاديث النبوية .. مش مجرد حفظ عن جهل .. ازاى ؟ حقول لكم قصة جميلة أوى كان فى مرة شاب متدين وجميل ونفسه يعمل كل شي بيعمله النبىﷺ .. فمرة عزم أصحابه على الأكل وكان الأكل فيه دهن كتير أوى .. فأصحابه جم وكلوا ومشيوا .. ويعدى يومين ويعمل نفس الأكلة فأصحابه تعبوا لأن الأكل متعب أوى وكله دهون فأعتذروا .. فقال لهم: لا والله كلوا كلوا دا النبى عليه الصلاة والسلام كان لا يرد الدهن (يعنى لو حد عزم على النبىﷺ بالدهن كان يقبله على طول .. وطبعاً الولد حيطلع فاهم غلط )

المهم أصحابه غصبوا على نفسهم وقبلوا العزومة وأكلوا .. ويفضل طول القعدة يكرر الكلام أن النبىﷺ كان لا يرد الدهن ويغصب عليهم و هم يا عينى بيغصبوا على نفسهم وياكلوا .. لحد ما واحد فيهم شك وقال مش معقول النبىﷺ كان بياكل دهون بالشكل ده .. فراح سأل شيخ  وحكى له اللى حصل وقال له: يا شيخ كان رسول الله صلى الله عليه وسلم لا يرد الدهن.. ده بجد  يا شيخ ؟فيرد الشيخ  ويضحك ويقول له ايوة ولكن صاحبك فهم الكلام غلط. المقصود بالدهن يعنى العطر مش الدهن اللى فى الأكل ..

من هنا نفهم أننا نتبع أوامر النبى عليه الصلاة والسلام واحنا فاهمين كلامه ورسالته اللى عايز يوصلها لينا حتى لو مش عارفين حكمة النبىﷺ من الأمر ده ..  يعنى مين كان يصدق أن الرومان ينسحبوا !! طبعاً ده فضل اتباع النبىﷺ .. وكمان إصرار سيدنا أبو بكر فى تنفيذ أمر النبىﷺ فى أن جيش أسامة يطلع  . لما أصر أن الجيش  يطلع حتى بعد ما النبى ﷺ مات ..

وفعلا خروج جيش أسامة طلع له حكمه كبيرة لأن فى قبائل عربية كتيييرة أرتدت بعد وفاة النبى ﷺ  وكفرت .. فكان خروج أسامة عامل قوى لردع القبائل دى لو بس فكرت تحارب المسلمين .. وفعلاً جيش أسامة لما خرج لاقى بعض القبائل المرتدة متجمعة وجايه فى طريقه  فشتت شملهم وهربوا لمنطقة أسمها دومة الجندل .. وماراحش وراهم لأن ماكانش عنده أوامر من سيدنا أبو بكر بتتبع المرتدين ..

وهنا نشوف أدب وطاعة قائد جيش المسلمين لخليفة المسلمين رغم صغر سنه .. أسامة كان عنده ١٨ سنه .. وهنا نشوف كمان  جمال حكمة اختيار النبيﷺ لأسامة بن زيد خصوصاً أن القبائل لما شافت جيش أسامة معدى حست بهيبة المسلمين .. وأن فى قوة كبيرة فى المدينة فمحدش فكر أنه يهجم على المسلمين وحسوا أن جيش المسلمين فى ثبات ومش هيتهز بعد وفاة النبي ﷺ ..

نكمل بكرة ان شاء الله

________________________________________
اللهم صل وسلم وبارك على سيدنا ونبينا محمد وعلى آله وصحبه أجمعين