الخلفاء الراشدين

الحلقة 6

اللهم صل وسلم وبارك على سيدنا ونبينا محمد وعلى آله وصحبه أجمعين _______________________________________

خلي الامل بالله موصول:
زي متفقنا ممكن 5دقايق من وقتنا اللي بنضيعة علي الفيس بس دول لله طب بالصلاة علي النبي كدة الناس اللي متبعانا هندخل علي معركة من أعظم المعارك في الإسلام  يالا بينا
( 6)

زي مقولنا إمبارح وبالرغم من أنتصار المسلمين فى معركة البويب إلا أن الفرس لسه ما أستسلموش وكانوا عايزين ينتقموا .. وبدأوا يهددوا المسلمين ويجمعوا جيوش لمحاربتهم  .. فلما وصلت الأخبار لسيدنا عمر .. قرر أنه يخرج لهم بنفسه ويقود جيش المسلمين ..

بس ما ينفعش سيدنا عُمر يطلع .. لأنه هو أمير المؤمنين .. لو جري له حاجة وأتقتل ،المسلمين هيتهزوا جامد فى وقت صعب أوى .. فيجتمع سيدنا عمر بالصحابة ويناقشوا الموضوع .. ها موافقين يا جماعة أن أمير المؤمنين يطلع ؟ لأ مش موافقين ويقولوا له ما ينفعش تطلع يا أمير المؤمنين ..

فياخد سيدنا عمر برأى الشورى وما يخرجش ويبدأ ياخد رأي الصحابة فى مين اللى يمسك القيادة .. فيتفقوا أن سعد بن أبي وقاص هو اللى يمسك قيادة الجيش .. وقالوا عنه : هو الأسدُ فى عرينهِ .. فبسرعة سيدنا عمر يستدعى سعد بن أبى وقّاص .. ( وفعلاً المملكة الفارسية هتتأثر وتنهزم على إيد سعد بن أبى وقّاص ) ..  سيدنا سعد هو خال النبي ﷺ .. كان النبيﷺ بيحبه أوي وكان يقول : سعدٌ خالى فليُرنى أحدكم خاله .. اللهم صل على سيدنا محمد

المهم يبعت سيدنا عمر لسعد وينصحه ويقول له : يا سعد ، سأبعثك لبلاد الفرس .. ولتتقينّ الله يا سعد .. ولا يغرنّك أنك خال رسول الله ،فإن الله عز وجل ليست عنده أنساب ( وركزوا فى الجملة اللى جاية دى مهمة أوى والله لو المسلمين اتعلموها النهاردة ماكانش ده بقى حالنا) وأعلم يا سعد أن الله لا يمحو السئ بالسئ وإنما يمحو السئ بالحسن ( يعنى لما تروحوا تحاربوا يا مسلمين وأنتم وحشين، ربنا مش هيمحو السئ " اللى هو الكفر " بناس وحشة .. لأ .. ربنا هيمحو السئ بالحسن .. فلو أنتم وحشين يا مسلمين ربنا مش هينصركم لأن الله مش هيمحو الكفر والظلم بظلم زيه لكن هيمحوه بعدل ودين وأخلاق ) إن الله لا يمحو السئ بالسئ وإنما يمحو السئ بالحسن .. ويكمل سيدنا عمر كلامه ويقول : فلتتقينّ الله يا سعد وما رأيت رسول الله يلزم فألزم ( اللى شفت النبي ﷺ بيعمله أعمله ) فقال سعد : نعم سأفعل أيها الأمير

ويطلع سيدنا سعد للمعركة .. فيقابله سيدنا عُمر قبل ما يخرج ويقول له أكتب لي يا سعد كل يوم عن عبادة الجيش وحال الجيش وشكل الأرض 

ويبدأ سيدنا عُمر يعمل حاجة اسمها مصلحة البريد .. أول مرة العرب يعرفوا الكلام ده .. طب ليه يا سيدنا عُمر ؟ عشان الجوابات توصل لى بسرعة وفعلا هيتعمل البريد ( عُمر هيأسس دولة وهيعمل حاجة اسمها دواوين .. عشان يدون كل شئ ويحفظ كل شئ رضى الله تعالى عنه وأرضاه )