الحلقه ٥
النهارده فرح نيللى ال هيتعمل فى الفيلا , شاهيناز دفعت فى الفرح كتير جدا عشان تعملو فرح الاحلام , والكل مشغول فى التجهيز لليوم العظيم ده
_____________________
ندى قعدة مع نيللى فى الاوضه والكوافير اللبنانى بيحط المكياج لـ نيللى , واصحابهم قعدين معاهم
نيللى : لالا عرض خط الكحل شويه
ندى : مهو حلو اهو يا نيللى
نيللى : اسكتى انتى
الكوافير : هيك احسن مدموزيل ؟
نيللى : اه احسن
ندى : على فكره زى مهو متغيرش
نيللى : انا مش بقولك اسكتى انتى , انتى عايزنى اطلع شكلى وحش , امال انا جايبه كوافير من لبنان ليه
ندى : خلاص انتى حره اعملى ال انتى عايزاه , انا رايحه اشوف فين كاميليا
نيللى : يكون احسن مع السلامه , نو غمق الروج شويه
_____________________
ندى راحت تدور على كاميليا , وهى ماشية شافت روما قعده لوحدها
ندى بخوف : هاى
روما بصتلها : لا يا شيخه , هاى , نعم
ندى : هو انتى هتحضرى الفرح ؟!
روما : عند حضرتك مانع ؟
ندى : لا طبعا , ياريت تحضرى , بس الوقت بيجرى المفروض تقومى تلبسى متهيألى يعنى , والميك اب والشعر وكده بيخد وقت
روما كانت لبسه بنطلون جينز وتى شيرت ولمه شعرها اى كلام ومش حطه اى مكياج
روما : ماانا لبسه اهو
ندى وهى بتبص للبس روما : هتحضرى الفرح كده ؟!!
روما : اه
ندى : طيب شعرك !!
روما : ماله , هو انتى شايفه منكوش
ندى : طيب الميك اب ؟!
روما : انا حلوة وزى القمر , يعنى مش محتاجه ميك اب
فى الوقت ده كانت شاهيناز معديه شافت ندى بتكلم روما
شاهيناز بعصبيه : انتى ايه ال مقعدك مع دى انا مش قلت اياكى تكلميها
ندى : عادى يا ماما , ده انا ده انا يعنى كنت بقولها تقوم تلبس للفرح يعنى بس والله
شاهيناز : وانتى مالك بيها اصلا انتى مالك , مهى كانت هتتنيل تلبس لوحدها من غير محد قولها
روما : لا مهو انا قلت ليها انى خلاص لبست من زمان
شاهيناز بصتلها : نعم يااختى
ندى : هى قالت انها هتحضر الفرح كده
شاهيناز : ايه !! انتى عايزة تطلعى للناس بالمنظر ده وتقولى اخت العروسه انتى عايزة تفضحينا , يابت المجنونه انتى
روما قامت من مكانها بكل عصبيه , وبصوت عالى جدا : الا امى الا امى يا شاهيناز , تيجى عند امى وتوقفى , اقسم بالله ما تجيبى سيرة امى تانى لا اقلبلك فرح بنتك ميتم , وهحضر الفرح وغصب عن عينك بالمنظر ده وباللبس ده وورينى هتعملى ايه
قالت روما الكلام ده ومشيت من قدام شاهيناز ال بتغلى , ونفسها تخفى روما النهارده باى شكل
_____________________
روما طلعت اوضتها ورزعت الباب وراها بكل نرفزه , ووقفت تبص حواليها وبعدين مسكت تلفونها واتصلت بـ مراد
روما : الو , ايوه يا مراد
مراد : ايوه يا بنتى انا بتصل بيكى مش بتردى ليه ؟
روما : كنت سايبه التلفون فى الاوضه , عملت ال قلتلك عليه ؟
مراد : اه عملته هو انتى عايزة الحاجات دى فى ايه ؟
روما : لا ابدا دى هديه لشاهيناز
مراد : استر يارب , ماتخلى اليوم يعدى على خير يا روما
روما : مراد , تعرف تخليك فى حالك ها , زى ما قلتلك اوعى حد يشوفك تدخل من الباب الخلفى هفتحولك انا تجى على اوضة جدى على طول فاهم
مراد : فاهم , هو انا بقيت فاهم حاجة , حاضر يا روما حاضر
روما قفلت مع مراد وابتسمت وبصت لصورة ابوها وقربت منها واتكلمت مع الصورة كأنها بتكلم ابوها
روما : متزعليش منى بقى , انا مش قصدى نيللى خالص مع انها تستاهل هى كمان , انا بس عايزه شاهيناز تلطم النهارده بس , ولا انت ايه رأيك ههههههههههه
_____________________
مراد وصل الفيلا ودخل من الباب الخلفى للجنينة زى ما قلتلو روما من غير ماحد يخد باله ودخل اوضة رشوان
رشوان : بسم الله الرحمن الرحيم , انت جيت امتى يا مراد وايه ال جابك من دلوقتى لسه على الفرح ؟!
مراد : اسف يا رشوان بيه دخلت عليك كده من غير أذن اصل روما قالتلى اوعى حد يشوفك
رشوان : ليه ؟ وايه الشوال ال فى ايدك ده ؟!
مراد فتح الشوال وطلع منه كام برطمان فيهم دود حي , رشوان تنح اول ما شافت المنظر
رشوان : ايه ده ؟! ايه ال انت جايبو ده يا مراد انت حصل حاجة لعقلك
مراد : مش ذنبى والله يا رشوان بيه , دى روما هى ال طلبت منى اجيب الدود ده والله ما اعرف حتى هتعمل بيه ايه
رشوان : روما , مدام روما هى ال قالتلك تعمل كده يبقى فى مصيبه هتحصل النهارده ده لو مكنيش مصايب , تعالا اقعد تعالا
_____________________
جيه الليل المعزيم ابتدو يوصلو طبعا ناس على مستوى عالى جدا جدا لبسهم كلو سوريه وسموكن وشياكه ومستوى رفيع , وشاهيناز طبعا كان مخليه الفرح مش زى اى فرح , الفيلا كانت متغضيه بالنور وكأنها فجأه اتحولت لجوهره لؤلؤ , فرقة اوركسترا كامله للعزف , الاكل من باريس , فرح ولا افراح الملوك
_____________________
ندى واقفه جنب كاميليا وشاهيناز بتسلم على المعزيم ال بيبصو على روما ولبسها ال مش لايق خالص مع مستوى الفرح وشكلو , روما قعدة وحطه رجل على رجل جنب جدها ال محدش افتكر يسلم عليه , ومراد واقف جنبهم , شويه والكل اتجه نظرو نحيت السلم , شريف نازل وماسك ايد نيللى لحد ما وصل لعمر ال اخدت ايد نيللى وبسها بكل رقه
عمر بهمس : مبروك يا حياتى
نيللى : الله يبارك فيك يا قلبى
فى الوقت ده نطت روما من مكانها وطلعت واختفت فى لحظه , شويه ورجعت تانى ووقفت جنب مراد
مراد : انتى روحت فين وجيتى تانى ؟!
روما وهى تولع سيجاره : كنت بفتتح الفرح
عمر اخد ايد نيللى عشان يرقصو رقصة السلو , وقبل ما تبدء الاوركسترا تعزف أتفجأ الكل بأغنية , وشربت حجرين عالشيشه بتشتغل بصوت عالى جدا , كل المعزيم بصو لبعض , ندى وكاميليا بصو لبعض بصدمه , عمر بص لـ نيللى بمنتهى الاستغراب , شاهيناز حطت ايدها على بوقها وبصت لـ روما , ال كانت واقفه بترقص وهى وقفه فى مكانها على الاغنيه و بتغيظ شاهيناز ورشوان ميت من الضحك ومراد واقف بيكتم الضحك بالعفيه , شويه والاغنية وقفت تانى لوحدها
شاهيناز وهى بتحاول تغطى على الموقف : هههههه معلش يا جماعه اكيد حصل غلط او حاجة هههههه
بعدها ابتدت الاوركسترا تعزف وبدء عمر ونيللى يرقصو مع بعض
مراد بصوت واطى : عملتيها ازاى دى ؟!
روما : التكنولوجيا يا ناصح , ظبط وقت التشغلى على اللاب ووصلتو بالسماعات بس
مراد : يخرب بيت دماغك
رشوان : ههههههههههه والله محمود ما خلف غيرك هههههههههه
طبعا الاغانى ال كانت فى الفرح فيه كلها اجنبى او الاوركسترا بتعزف الموسيقى العالميه عشان يمشى مع مستوى المعزيم فطبعا موقف زى ده فضيحه لشاهيناز
_____________________
بعد ساعه كان افتتاح البوفيه ال جاى من باريس بالطياره , لكن اول ما الناس شافت الاكل محدش سمع غير صوت الصراخ
شاهيناز جريت هى وشريف يشوف فيه ايه
شاهيناز : فى ايه يا جماعه مالكم ؟!
_ فى ايه , جيبنا تهزقينا
شاهيناز : ليه بس يا فندم فى ايه ؟!
_ فى دود فى الاكل يا شاهيناز هانم
شاهيناز : ايه !!!
فى الوقت ده روما كانت لسه وقفه مكانها جنب مراد ورشوان وكانو سامعين كل حاجة ورشوان خلاص هيموت من الضحك , مراد كان واقف وماسك كوباية عصير فى ايدو
روما : هات العصير ده
مراد : اتفضلى
روما اخدت كوباية العصير وتطلع فى الجنيه تدور على حامد
روما : حامد
حامد : هاها ايوه يا ست روما ايوه
روما : فين صندوق النور بتاع الفيلا ؟
حامد : ها هناك كده جنب ال ...
روما : بس بس تعالا ورينى مكانه
روما مشيت مع حامد لحد ما وصلو لصندوق النور
حامد : اهو ياست روما
روما : طيب افتحو
حامد فتح الصندوق راحت روما نزلت على ركبتها وبصت على الاسلاك وكل هدوء كبت كوباية العصير على اسلاك النور , النور ضرب فى لحظه والفيلا كلها بقيت ضلمه
_____________________
بعد ساعتين عرفو يصلحو النور بس بعد ما كان المعزيم مشيو بعد ما قالو اوحش كلام لشاهيناز عن الفرح وال حصل فيه الفرح ال كان المفروض يقعد ساعات قعد ساعة وباظ بالكامل , ندى وكاميليا قعدين جنب نيللى ال منهاره من العيط وهى لسه بفستان الفرح , وجنبها قاعد عمر مربع ايده ومكشر وشاهيناز و شريف بيحاولو يهدو الموقف
شاهيناز : يا حبيبى متزعليش الافراح بيحصل فيها كتير
عمر : لا والله , ايه بقى ال بيحصل فى الافراح , اغنية السلو تقلب اغنية شعبى صح وكمان فى فرحى ال هو المفروض فرح راقى يليق بيا وبأهلى , ولا الاكل ال فين دود دوووود انا مش فاهم ازاى , وتختم بالنور يقطع واو بصراحه فرح مفيش بعد كده ممتاز
شاهيناز بأحراج : معلش يا عمر حقك عليا انا اكيد حصل حاجة غلط انا انا هعوضكم عن كل ده اختارو عايزنى تعملو شهر العسل فين وعلى حسابى انا
عمر : بجد وهى الناس هتشوف شهر العسل فين , الناس كان ليها الفرح
شاهيناز : بص اول ما ترجعو من شهر العسل انا هعملكم احلى حفله , هعملهلكم على يخت هنصلح كل ال حصل بجد
عمر بتريقه : هه اه المره دى ايه بقى هيكون فى الاكل تعابين , قومى يا نيللى هانم انا تعبان وعايز انام يلا
عمر خد نيللى وطلعو اوضتهم , وشريف وكاميليا وندى كمان مشيو , وشاهيناز فضلت قعدة لوحدها بصت لاقيت روما طلعه من اوضة رشوان , اول ما روما بصت على شاهيناز فضلت تضحك بصوت عالى
روما : ههههههههههههههههههههههههه مبروك يا شاهى عقبالك ههههههههههههههههه
شاهيناز : يبقى انتى ال عملتيها , مفيش غيرك
روما : الا هو انتى مكنتيش تعرفى ولا ايه هههههههههههههههههههههههه , تدفع فى فرح نص مليون جنيه هى كانت فلوس ابوكى , طب ادينى جبتهولك ارض ارض ومدفعتيش ولا مليم
شاهيناز بغل : هندمك يا روما والله لا اخليكى تندمى
روما : انتى اصلا مخلتيش ليه حاجة اندم عليها ولا حاجة اخاف عليها
يتبع ✍️✍️✍️
