روما

جزء ٣١

الجزء الثاني
الحلقه ١٠

تانى يوم الصبح ... روما نايمه وجلال قاعد جنبها بيلعب فى شعرها
جلال : روما , روما اصحى بقى
روما وهى نايمه : ايه يا جلال
جلال : قومى كفايه نوم يلا عشان تفطرى
روما تقوم تتعدل وتقعد على السرير
روما : الساعه كام دلوقتى ؟
جلال : 10 ونص
روما وهى بتقوم : ايه , كده تسبنى نايمه كل ده
جلال : قومى براحه , وبعدين اتاخرتى على ايه
روما : على الشركة
جلال : انتى بتهزرى , مش هتروحى الشركة وتقعدى ترتاحى زى ما قال الدكتور
روما : انا كويسه ومش تعبانه عشان ارتاح ده كلام دكاتره
جلال : روما بطلى اهمالك فى صحتك ده مش هتروحى يعنى مش هتروحى
روما : لا لازم اروح عشان اشوف هعمل ايه فى المصيبه اللى حصلت
جلال : يا حبيبتى مهى حصلت خلاص يعنى هتعملى ايه
روما : وانت فاكرنى هعديها ولا ايه يبقى متعرفش مراتك مش انا اللى حد ياخد منى شغل تعبت فيه
جلال : خلى اى حد من الشركة هيتصرف فى الحكايه دى
روما : ماحدش هيعرف لازم انا اتصرف بنفسى وعشان خاطرى بقى خلينى اروح اشوف هعمل ايه
جلال : ماشى يا روما , يلا عشان تفطرى
روما : لا انا متاخره افطر انت
جلال : لا بقولك ايه والله العظيم لو ما فطرتى واكلتى كويس كمان ما انتى رايحه فى حته
روما : جلال بلاش مبالغه انا حامل مش عيانه
جلال : مهو عشان انتى حامل لازم تاخدى بالك من نفسك اكتر من كده ,, يلاااا عشان تفطرى
روما : حاضر يا جلال
_____________________
عامر فى البيت شايل لى لى وبيلعب معاها يلاقى نيللى قعده فى الصاله وباين عليها الزعل
عامر : مالك نيللى ؟!
نيللى : مفيش حاجة يا حبيبى
عامر : مفيش حاجة ازاى ده انتى باين اوى انك زعلانه صح يا لى لى
لى لى : صح يا بابا
عامر : شوفتى
نيللى : ههههههه
عامر : روحى يا لى لى العبى ,, مالك بقى ؟
نيللى : ابدا شريف وروما شدو مع بعض شويه امبارح
عامر : ليه كده
نيللى : مشاكل فى الشغل , شريف كلمنى من شويه وقالى انه زعلان اوى من روما , روما دخلت فيه شمال وهو مالهوش ذنب
عامر : معلش الشغل بيحصل فيه كتير ويمكن روما كانت مدايقه واتعصبت عليه
نيللى : هى كانت مدايقه فعلا بس ,, بس انا مش عايزهم يزعلو من بعض هو احنا كل ما حالنا يتصلح مع بعض تحصل حاجة تبوظ الدنيا بينا تانى
عامر : ولا الدنيا هتبوظ ولا حاجة كله هيتصلح ان شاء الله
نيللى : ان شاء الله
_____________________
روما اول ما وصلت الشركة راحت على مكتب مراد ودخلت على طول
روما : شريف فى مكتبه ؟
مراد : صباح الخير
روما : وهو فين الخير ده , لو شريف فى مكتبه هاته وحصلنى على العربيه هستناكم تحت
مراد : على فين ؟!
روما : على شركة احمد المغازى
مراد وقف : وانتى رايحه لـ احمد المغازى تعملى ايه
روما : هشترى المناقصه ,, حصلنى
تخرج روما من المكتب ومراد يرفع التلفون عشان يقول لـ شريف
مراد : انا قولت روما مش هتعديها ,,, الو ايوه يا شريف
ينزل مراد هو وشريف من الشركة ويركب كل واحد فيهم العربيه بتاعته ويطلعو ورا عربية روما ... ويروحو على شركة احمد المغازى
_____________________
فى مكتب فخم قعد راجل فى الاربعين من عمره على المكتب وقدامه اورق ... بيخبط الباب وبتدخل السكرتيرة
السكرتيرة : احمد بيه , روما هانم رشوان عايزه تقابل حضرتك
احمد بستغراب : روما رشوان !! انتى متاكده انها هي
السكرتيرة : ايوه يا فندم
احمد : طيب خليها تتفضل
لحظات وتدخل روما ووراها مراد وشريف
روما وهى داخله : بردو دى اصول يا احمد يا مغازى
احمد يوقف : طب سلمى الاول
روما : وانت خليت فيها سلام
احمد : طب اقعدى مدايقة كده ليه بس
روما : يعنى انت مش عارف
احمد : يا روما هانم ده سوق والشاطر اللى يعرف يدوره كويس
روما : بس لعب تحت الترابيزه ده مش حلو وانا مش عايزه العبو معاك ,, وكده هندخل فى دوامه احنا الاتنين مش هنعرف نخرج منها
احمد : وعلى ايه , طلباتك
روما : المناقصه
احمد : هتدفعى كام ؟
روما : 10 فى الميه من سعر المناقصه
احمد : هو انتى جايه تهزرى ولا ايه , 30 فى الميه
روما : 15
احمد : 30
روما : 20 يا اما خليها ليك
احمد : 25 واكتب التنازل دلوقتى
روما : موافقه
كل ده مراد وشريف قعدين بيتفرجو من غير اى تعليق ... احمد المغازى كتب تنازل عن المناقصه لـ روما ... وروما كتبت شيك بمبلغ كبير جدا واديته لـ احمد
احمد : مبروك عليكى
روما : الا قولى هو انت عرفت السعر بتاع شركتى ازاى
احمد : بس انا معرفتش اسعار انا المحاسب بتاعى ..............
روما : لو عايزنا نكون حلوين مع بعض من هنا ورايح خلينا نتكلم بصراحه احسن ,, السعر اتسرب ليك وانا عارفه ده كويس فبلاش تلف عليا عشان مش هتعرف
احمد : انا اعرف ان الكل بيتكلم عن ثقتك فى نفسك بس بصراحه اول مره اشوفها بنفسى ,, بس انا مش هينفع اقولك
روما : خايف على الجواسيس اللى زرعتهم فى شركتى
احمد : طب ايه رأيك بقى انى عمرى ما عملت حركه زى دى مع اى حد من المنافسين بتوعى ,, ولو عايزه تعرفى فا السعر والميزانيه اتبعتو ليا على الاميل بتاعى من شخص مجهول وبجد معرفش من مين بس رزق وجيه ليا هقوله لا
روما : لا ازاى ,, سلام
احمد : مع السلامه
تقوم روما وهى عنيها على شريف وتخرج هى وشريف ومراد من شركة احمد المغازى بنفس الصمت اللى دخلو بيه وروحو على شركة روما
_____________________
بعد ما يوصلو تدخل روما المكتب ومعاها شريف ومراد
مراد : انتى ازاى عرفتى انه هيوافق على بيع المناقصه ؟
روما : عشان مش معاه ينفذها وهو اخدها منى عشان ياخد الفلوس من اكتر
شريف : لما احنا ساكتين طول القعده خدينا معاكى ليه , طرطير
روما : لا بودى جارد
مراد : هو انتو هتتخانقو تانى مش كفايه فرجتو علينا الشركة كلها امبارح
شريف : ده باين كده انها لسه شاكه فيه حتى بعد اللى سمعته من المغازى , دى لسه مش مصدقه انى معملتش حاجة
روما : حتى لو معملتش حاجة انت بردو غلط لو كنت واخد بالك من الشغل كويس ماكنش حد اين كان هيقدر يسرب معلومات كانت معاك وفى درج مكتبك لما اديكى معلومات سريه ومتعرفش تحافظ عليها يبقى انت كده نايم وعايز تصحى شويه
شريف : بصى انا هفضل متحمل كلامك واسلوبك لحد اخر وقت عشان بس منرجعش زى زمان تانى وانا ما صدقت ان احنا بقينا اخوات مع انى عارف انك خدينا معاكى عشان تعملى مواجه بينى وبين احمد المغازى عشان تمسكى دليل بس معلش حقك تتاكدى من اللى بيشتغلو عندك ,, تسمحى بقى اروح اكمل شغلى واوعدك بعد كده هبقى اصحى للشغل كويس
روما تبص لـ شريف ومتردش يقوم هو يخرج من المكتب ويقفل الباب وراه
مراد : على فكره انتى غلطى فى حقه اوى يا روما
روما : انا مش فى ده دلوقتى
مراد : امال فى ايه ؟
روما : فى الاميل اللى اتبعت لـ احمد المغازى , يا ترى مين الشخص المجهول ده اللى بعت الاميل بدون اى مقابل مهو يا اما بيحبه اوى وعايز مصلحته للدرجه دى يا اما بيكرهنى انا وعايز يدمرنى وخلاص
مراد : انا من رأي تبطلى تفكرى فى الموضوع ده والحمد لله انها جات على قد كده والحكاية خلصت خلاص
روما تبص لـ مراد وتبتسم بسخريه ومتتكلمش
_____________________
بالليل جلال داخل الاوضه يلاقى روما قعده فى البلكونه
جلال : الجميل قاعد لوحده ليه
روما : انت جيت امتى ؟
جلال : لسه جاى دلوقتى , اخدى الدواء
روما : اه
جلال : احلفى
روما : والله اخده
جلال : طب كويس ,, عملتى ايه فى الشغل ؟
روما : خد المناقصه من احمد المغازى
جلال : بتتكلمى بجد
روما : اه اشترتها منه بـ 25 فى الميه من سعرها الاصلى
جلال : كتير يا روما
روما : مش احسن ما تروح منى وبعدين المناقصه دى هتجيب للشركة ارباح خياليه
جلال : بس ايه ده المناقصه تروح منك امبارح ترجعيها النهارده ده انتى جامده بقى وانا مش عارف
روما : لا يبقى تروح تسأل عليا كويس عشان تعرف انت متجوز مين
جلال : متجوز حبيبتى وقلبى وحياتى طبعا
روما : ههههههههههههه ماشى يلا نتعشا بقى
جلال : يلا يا ستى وتاكلى كويس اه
روما : حاضر يا سيدى حاضر
_____________________
بعد شهرين ... روما قعده مع نيللى فى النادى فجأه تحط ايدها على بطنها
روما : ايه ده ؟
نيللى : ايه
روما : متهيألى انه اتحرك
نيللى : البيبى اتحرك حسيتى بالحركة
روما بفرحه : ايوه , اهو اتحرك تانى ههههههههههه
نيللى : هههههههههه حلو اوى كده انتى هتتجننى رسمى
روما : ليه يعنى
نيللى : لازم يا بنتى ده وانا حامل فى لى لى كنت اقعد مستنيه الحركة بتاعتها وفى الشهر التاسع كنت انام على ضهرى واتفرج على بطنى وهى بتتحرك وعامر كان عامل زى المجنون يقولى شوفى اتحركت ازاى شوفى بتعمل ايه ههههههههههههههه
روما : هههههههههههه لا جلال مجنون اكتر من جوزك هيعمل اكتر من كده ههههههه بس تعرفى حلوه اوى حركته
نيللى : خدى بالك من نفسك بقى , الا اخبار الشغل ايه ؟
روما : كويس اهو داخله صفقه جديده بس متعطله شويه
نيللى : ليه كده ؟
روما : عادى روتين الشغل , اتحرك تانى يا نيللى
نيللى : ههههههههه مش قولتلك هتتجننى

يتبع ✍️✍️✍️