روما

جزء ١٦

الحلقه ١٦

شاهيناز : هه هتعملى ايه هتقتلينى
روما : اقلب بيكى العربيه يعنى زى ماانتى عملتى , تؤ تؤ , عارفه المره دى انتى طلعتى غبيه فكرتى فى حاجة واحده بس لو انا موت انتى هتعملى ايه وتعيشى ازاى , بس نسيتى تفكرى لو عشت هعمل ايه وهعيشك ازاى , انتى فتحتى على نفسك باب جهنم
شاهيناز وهى بتحاول تجمد قدام روما : اعملى حسابك , انا ورايا كتير يا روما مش هتعرفى تعملى معايا حاجة
تقرب روما من شاهيناز اوى لحد ما يبقاش فيه بينهم غير مسافه صغيره جدا , وتبصلها بنظره جامده مافيهاش اى معنى غير انها مرعبه
روما : وانتى كمان تعملى حسابك ان الايام الجايه هيطلع عليكى القديم والجديد وكل ال افقل هيتفتح حاجة واحده تخليها فى دماغك , ان ايامك الجايه سواد
تفضل روما باصه لحظه لـ شاهيناز وتسبها وتمشى , شاهيناز تفضل واقفه فى مكانها بتفكر فى كلام روما , اول مره تحس ان روما مش بتقول كلام كده وخلاص اول مره تحس انها مش عارفه تتكلم وتوقف روما عن حدها اول مره تحس انها فعلا خايفه من روما
_____________________
رشوان قاعد فى اوضته الباب يخبط وتدخل روما
رشوان بفرحه : روما
روما وهى بتحضنه : ازيك يا جدى
رشوان : ازيك انتى يا حبيبتى حصلك ايه يا روما انتى كويسه دلوقتى ؟
روما : انا كويسه الحمد لله , جات سليمه
رشوان : الحمد لله يا بنتى الحمد لله , كده بردو يا روما كل الفتره مش عايزانى اشوفك ولا حتى اسمع صوتك
روما : معلش يا جدى , انا كنت عايزه شوية وقت عشان اعرف امسك نفسى تانى , ماكنتش اعرف ان الموت بيخوف كده الغربية لما حد بيدايق بيدعى ان ربنا يخده , بس لما يجى يقرب من الموت يخاف ويترعب
رشوان : معلش يا روما الحمد لله اديكى اهو خرجتى منها والحمد لله سليمه وكويس انها جات على قد كده , هو مراد وصلك ولا انتى جيتى لوحدك
روما : وصلنى ومشى
رشوان : مراد ده مفيش منه اتنين راجل بمعنى الكلمة , بيعزك اوى على فكره وبيخاف عليكى جدا
روما : عارفه يا جدى , وعارفه كمان ال ورا الكلمتين دول , مش هينفع دلوقتى يا جدى مش هينفع خالص
رشوان : ليه يا روما , انتى مش واخده بالك من نفسك من عمرك من السنين ال بتروح من منك لو مش دلوقتى امال امتى امتى يا روما
روما : انا واخده بالى دلوقتى من حاجة واحده بس ازاى اشرب شاهيناز المر نقطه نقطه , اى حاجة تانى مالهاش لازمه عندى دلوقتى
رشوان : بس يا روما ...........
روما : انا طلعه اغير هدومى
وتمشى روما وتسيب رشوان قبل ما يفتح كلام تانى
_____________________
بعد كام يوم , ندى قعده فى اوضتها باين عليها الحزن والدموع فى عنيها مش عايزه تنزل فاتحه كتاب قدامها ومش باصه عليه قعده سرحانه ومش حاسه بالدنيا لحد ما يرن تلفونها
ندى : الو
أحمد : ازيك
ندى : هو انت ؟ انت لسه ليك عين تتصل بيا يا حيوان انت عارف لو اتصلت تانى انا هوديك فى داهيه
أحمد : بس بس اعصابك يامه , ولمى لسانك شويه يا حلوه انا مش متصل عشان سواد عيونك , كل الحكايه انى هبعتلك حاجة كده عايز رأيك فيها وبعد ما تشوفيها نبقى نتكلم
ويقفل أحمد السكه قبل ما ترد عليه ندى , بعد دقيقه توصل لـ ندى رساله اول ما تفتحها تبرق عنيها ومتعرفش تنطق , تلاقى صور ليها فى اوضع خليعه ومناظر زى الزفت , دقايق تلاقى أحمد بيتصل تانى , من غير تفكير ترد على طول
ندى بصوت عالى : يا ابن الكلب والله العظيم لا اوريك يا واطى
أحمد : لمى لسانك لا اقطعهولك اتلمى ده انتى روحك دلوقتى فى ايدى
ندى : الصور دى متفبركه انا هبلغ فيك واوديك فى ستين داهيه
أحمد : لا يابت تصدقى طلعتى جامده , وماله بس لحد ما تبلغى ويتحقق فى اذا كانت الصور دى متفبركه ولا لا عبال ما كل ده يخلص هتكون فضحتك بقيت بجلاجل وصورك هتلاقيها فى النت وعلى الموبايلات مااحنا فى زمن السرعه مش بعيد تلاقيها منشورة على حبال الغسيل
ندى : انت عايز اييييييييييييييييييييه عايز ايه , عايز فلوس ؟
أحمد : قلتلك يا حلوه هتجيلى لحد عندى , عايزك تجيلى ونبقى بعد كده نتفق على حكاية الفلوس دى
ندى : نجوم السما اقرب ليك
أحمد : وماله بردو انا مش خسران حاجة انتى ال خسرانه كل حاجة فكرى فيها كده وردى عليا بس مش هستنى الرد كتير , امواه باى باى يا مزه
يقفل أحمد فى وش ندى السكه , وتفضل ندى تعيط وتلطم على وشها مش عارفه هتعمل ايه
_____________________
فى الشركة , روما على مكتبها بيدخل عليها شريف
روما : نعم ؟
شريف من غير كلام يحط قدامها ورقة
تمسكها روما وتبص فيها وتبص لـ شريف
روما : ايه دى ؟
شريف : استقالتى , مش انتى ممشيها قانونى , انا كمان همشيها قانونى , انا مستقيل
روما : مع الف سلامه , هتشتغل مع امك مش كده ؟
شريف : يخصك
روما : لا بسأل بس , عشان اقولك مبروك على الشركة والمصنع
شريف : هههه ماشى , سلام
روما : سلام
يمشى شريف , وروما تمسك التلفون وتتصل بحد
روما : الو
المتصل : انا مستنيكى من ساعه انتى فين ؟
روما : خليك مكانك انا جايه دلوقتى
تقفل روما السكه وتقوم تاخد شنطتها وتشيل حاجاتها وتخرج من المكتب
تلاقى مراد فى وشها
مراد : انتى رايحه فين دلوقتى ؟
روما : ورايا مشوار مهم
مراد : مشوار ايه ؟ طيب والعميل ال جاى ؟!
روما : اتكلم معاه انت يا مراد يعنى انت هتغلب , اقولك حدد معاه معاد تانى
مراد : روما هو فى ايه ؟!
روما : مفيش حاجة بقولك ورايا مشوار مهم
مراد : طيب اجى معاكى ؟
روما بعصبيه : يوووه لا يا مراد لا سبنى امشى بقى
يبعد مراد من قدام روما عشان تعدى وهى تمشى وتسيبه بيبص عليها بستغراب من عصبيتها وطريقه كلامها
_____________________
شاهيناز فى صالون الفيلا قدامها صور كتير لقاعات فخمه عشان بتجهز لحفلة الافتتاح بتاعت المصنع تيجى ندى براحه تقعد جنبها
ندى بخوف : ماما
شاهيناز من غير ما تبصلها : ايوه يا ندى
ندى : انا انا كنت عايزاكى فى حاجة
شاهيناز : حاجة ايه ؟!
ندى برتباك : هو انا يعنى عايزه اتكلم معاكى هو اصل انا من فتره كده ............
شاهيناز : بقولك يا ندى ايه رأيك انهى قاعه اشيك , متهيألى دى اشيك وافخم
ندى : ماما انا عايزه اتكلم معاكى
شاهيناز : معلش يا ندى انا دلوقتى مش فاضيه يا روحى , ها شويه ونتكلم روحى اقعدى مع نيللى اهى قعده فاضيه
تبص ندى لـ شاهيناز بنظرة حزن وعتاب وتقوم تروح ل نيللى ال قعده مش طايقه نفسها من عمايل عمر
ندى : نيللى
نيللى : عايزه ايه ؟
ندى : هو انا ممكن اتكلم معاكى شويه ؟
نيللى : تكلمينى فى ايه وايه منظرك ده مال شكلك مضرب بالجزمه كده , بقولك ايه انا مش ناقصه غم كفايه ال انا فيه , كان يوم اسود يوم ما اتجوزته كرهنى فى نفسى , ايه ما تنطقى عايزه ايه ؟
ندى : مش عايزه حاجة
نيللى : احسن بقولك ايه والنبى ابعدى عنى دلوقتى
تمشى ندى من عند نيللى وهى بتعيط وصعبان عليها نفسها , ومش عارفه هتتصرف ازاى فى المصيبه ال هى فيها
_____________________
روما فى العربيه من بعد الحادثه وهى جابت سواق لأنها مش قادره تسوق , قعده بتص على الشوارع والمحلات تعدى من جنب محل ملابس محجبات
روما : استنى , ارجع تانى عند محل المحجبات ده
يرجع السواق وتنزل روما من العربيه وتدخل المحل
روما : مساء الخير
البياعه : مساء النور يا فندم
روما : لو سمحتى عايزه اسدال اسود مقاسى
البياعه تبص للمكياج بتاع روما والجيب القصيره ال لبسها وروما تاخد بالها , وتكمل
روما بأبتسامه : ونقاب لو سمحتى
بعد دقايق تخرج روما من المحل لبسه الاسدال والنقاب وتركب العربيه
السواق : ايه ده انتى مين ؟ وازاى تركبى كده ؟
روما وهى بتكشف وشها : انت اتهبلت انا روما هانم يا غبى اطلع
السواق : اسف يا هانم اسف اسف
تنزل روما النقاب ويطلع السواق بالعربيه , لحد ما يوقف قدام مطعم مش فخم اوى ولا كبير اوى , تنزل روما من العربيه وتدخل المطعم , تطلع الموبايل وتتصل بحد
روما : الو انت فين ؟
المتصل : انتى ال فين انتى اتاخرتى اوى
روما : انا اهو فى المطعم
المتصل : فين ؟
روما : انا واقفه على الباب ولبسه نقاب
دقيقه وتلاقى روما واحد بيقرب عليها ويوقف قدامها
روما : عزام
عزام : الله ينور عليكى
وتروح روما وعزام يقعدو
روما : ال وصلنى ليك قالى ان مفيش حاجة تصعب عليك وانك هتعرف تخدمنى
عزام : ومكدبش , اؤمرك ؟
روما : مصنع لسه متفتحش جديد , عايزاه يبقى كوم تراب
عزام : غالى والطلب رخيص بس ده هيكلف
روما : ليك من جنيه لـ ‭‭‭‭‭‭‭‭100‬‬‬‬‬‬‬‬ ألف جنيه بس ليا شرطين
عزام : وماله اشرطى
روما : قبل ما تعمل اى حاجة تتاكد ان مفيش حد فى المصنع كله
عزام : انتى مش بتقولى لسه ما اتفتحش يعنى هيكون فاضى يمكن بس الامن
روما : بردو تتاكد انه مفيش فيه مخلوق ولا تقرب لحد من بتوع الامن انا عايزه خراب مش موت ودم
عزام : بسيطه , والشرط التانى ؟
روما : افتتاح المصنع يوم الاحد ال جاى ده الساعه 11 الصبح , يوم الاحد الفجر يكون المصنع بيقى على الارض قبل الافتتاح
عزام : بردو بسيطه بس انا عايز دفعه من الحساب
روما وهى بطلع لفه من شنطتها : ده جزء والباقى بعد ما تخلص
عزام : عنوان المصنع ؟
روما : مكتوب فى الورقه دى وزى ما قلتلك لو حد حصله حاجة انا ال هبلغ عليك بنفسى
عزام : عيب يا مدام هو انا تلميذ , بس انا يعنى معرفتش انتى مين ولا اسمك ايه
روما : وانت مالك ومال اسمى
عزام : اعرف حتى انا مين ال بتكلم معاه
روما وهى بتقوم : شاهيناز , اسمى شاهيناز
_____________________
يوم السبت بالليل , شاهيناز فى اوضتها ماسكه فى ايدها فستان سهره شيك بتتفرج عليه يدخل شريف
شاهيناز : ايه يا شريف اطمنت على كل حاجة يا حبيبى
شريف : ايوه اطمنت على كل حاجة
شاهيناز : تمام يا حبيبى , قولى صح مراتك جابت فستان جديد للحفله لحسن دى انا عارفها ممكن تحضر بأى حاجة مهى مهمله
شريف : جابت يا ماما
شاهيناز : ايوه كده انا عايزه بكره كل فى الحفله يقولو ولاد شاهيناز اهم
شريف : اوك انا هروح انام بقى عشان تعبت اوى النهارده وانا عايز اكون مركز بكره فى الحفله
شاهيناز : اوكيه يا حبيبى تصبح على خير
_____________________
يوم الاحد الساعه 5 الصبح , تلفون الفيلا بيرن وتلفون شاهيناز جمبها وهى نايمه بيرن صامت عمال بينور ويطفى تلفون شريف بيرن بردو لحد ما يصحه
شريف بصوت نايم : الوو
_ الحق يا شريف بيه المصنع بيتحرق
شريف بفزع : ايييييييييييييييه

يتبع ✍️✍️✍️