روما

جزء ٢٤

الجزء الثاني
الحلقه ٣


قدام قسم بوليس واقفه عربية روما قعدة فيها هى ونيللى فى انتظار خروج شريف من القسم
نيللى : اتاخر اوى
روما : مش اجراءات الخروج بتخلص
نيللى : هو كان لازم يتحول على القسم الاول يعنى
روما : اه طبعا لازم يطلع من القسم وبعدين انتى قلقانه ليه ما المحامى معاه جوا
نيللى : مين يصدق ان شريف خرج من السجن معقول كان يقعد فيه 10 سنين كمان من عمره
روما : الحمد لله ان فى النقد والاستئناف اتقبل واتحسب الموضوع قتل خطأ والا كان عمره ما هيطلع
نيللى تبص ناحية باب القسم تلاقى واحد خارج بدقن قصيرة تقيلة ووش بان عليه تعب سنين السجن
نيللى بتدقيق : شريف ؟!! شريف يا روما شريف اهو يا روما
تنزل نيللى تجرى على شريف وهو خارج مع المحامى وتنزل وراها روما ... تجرى نيللى وتترمى فى حضن شريف اللى يحضنها بكل قوته
نيللى بعياط : وحشتنى يا شريف وحشتنى اوى حمد لله على سلامتك
شريف بصوت مبحوح : الله يسلمك , انتى كمان وحشتينى اوى يا نيللى
يبص شريف على روما وهى واقفه ورا نيللى
شريف : هتفضلى واقفه كده ولا ايه مش هتسلمى عليا
تبتسم روما وتروح تحضن شريف
روما : حمد لله على السلامه
شريف : الله يسلمك
المحامى : طب عن اذنكم انا بقى
روما : متشكره اوى يا استاذ انا هبقى اعدى على حضرتك
المحامى : تشرفى فى اى وقت , مع السلامه
نيللى : مش يلا احنا كمان نمشى من المكان الكئيب ده
روما : تعالو نقعد فى اى حته
شريف : يا ريت انا عايز اشم شوية هوى
روما : ماشى يلا بينا
يمشو هما التلاته ويركبو عربية روما ويطلعو بيها
_____________________
عامر فى الشغل بتاعه بيدخل عليه المدير بتاعه اول ما عامر يشوفه يقوم يوقف بـ خوف
المدير : عملت ايه يا عامر ؟
عامر : والله يا فندم انا مااعرف حاجة عن الموضوع اللى حصل ده
المدير : انا الكلام ده مينفعش معايا الجهاز ده كان فى المخزن اللى انت مسؤل عنه ولا انت ناسى انك امين المخازن واى حاجة تروح انت اللى مسؤل عنها انا لحد دلوقتى مش عايز ابلغ وبقول انك راجل متجوز وعندك اسرة وحرام مستقبلك يضيع حاجة من اتنين يا الجهاز يظهر يا تدفع تمنه
عامر : ادفع تمنه !! وادفع 20 الف جنيه منين يا فندم
المدير : مش شغلى مش ضاع منك من مخزنك يبقى تتصرف يا اما هبلغ والبوليس والاداره هما اللى يتصرفو معاك
يمشى المدير ويقعد عامر وهو شايل الهم ومش عارف يعمل ايه
_____________________
فى كافتيريا مكشوفه على ترابيزه قاعد شريف وقدامه قعدة نيللى وجنبها روما بتولع سيجارة
شريف : ارحمى نفسك دى تانى سيجارة فى ربع ساعه
روما : تاخد واحده ههههه
نيللى : سيبك منها دى الكلام معاها بيدخل من هنا بيطلع من هنا كل ما اشوفها اقولها بطلى ام السجاير دى وارحمى صحتك ولا بتسمع
شريف : انا مش مصدق ان انتو الاتنين قعدين كده جنب بعض وبتتكلمو وبتهزرو
روما : قصدك احنا التلاته اى حد هيشوفنا مش هيصدق ان احنا قعدين مع بعض القعدة دى
نيللى : مش ناقصنا غير ندى عشان تكمل قعدة الاخوه الاعداء
شريف : لا ما خلاص مفيش اعداء تانى بقى , على كده بتتصلو بـ ندى دايما صح
نيللى : تقريبا كل اسبوعين يا هيه تتصل يا احنا نتصل بيها
شريف : بس انا زعلان منكم كنتو بتيجو تزرونى فى الاول بعد كده بيقى محدش بيسأل فيا ينفع المحامى هو اللى يجى يقولى اخواتك كلفونى اعملك نقد واستئناف وانتى يا ست نيللى اعرف دلوقتى بس انك اتجوزتى
نيللى : شريف انا بعد ما اتجوزت حركتى بقيت غير الاول مسؤلية البيت والبنت تقيلة انا النهارده سايبه بنتى لى لى بالعفيه مع الداده مش بتسبنى ابدا مساكه فيا على طول
شريف : وحضرتك يا ست روما
روما : انا ايه يا بابا , انا جبتلك محامى طلعك من حكم 15 سنه سجن عايز ايه تانى
نيللى : روما تصورى احنا اتصلحنا وبقينا اخوات حبايب , خفى لسانك يا حبيبتى كل حاجة بتتغير حوالينا الا لسانك
روما : اخوات حبايب اه طب افتكرى بقى انى اختك الكبيرة واتلمى
نيللى : تصدق لسه بخاف منها
شريف : هههههه احكيلى بقى على جوزك اتعرفته عليه ازاى
نيللى : ابدا بعد ما انا وندى اشترينا شقة وعشنا فيه مع بعض ندى هانم كانت دايما فى الكلية ودروس الكلية وانا كنت دايما قعدة لوحدى كنت على طول احب اقعد فى البلكونه وهو كان جارى فى الشقه اللى جنبى يطلع فى البلكونه يسلم بأبتسامه اسلم انا كمان بأبتسامه وزى الافلام نظره فأبتسامه فا كلام فا غرام فا جواز فا لى لى هانم اربع سنين مطلعه عينى
شريف : اتغيرت اوى يا نيللى
نيللى : هو انت عايز بعد كل اللى حصل فى حياتى ده ماتغيرش
شريف : ساكته ليه يا روما ؟
روما : زهقت وبعدين ورايا شغل مش يلا بقى
نيللى : ماشى يلا يا شريف معايا على البيت
شريف : بيت ايه ؟
نيللى : بيتى
شريف : لا انا هروح على الفيلا بتاعتنا
نيللى : فيلا ايه ما اتباعت من زمان
شريف : بعتو الفيلا ؟!
نيللى : ايوووه يلا بقى
شريف : طب وجوزك يا نيللى
نيللى : جوزى عارف كل حاجة عن حياتنا من يوم ما اتجوزنا
روما : هو هيروح معاكى يسلم على جوزك وبنتك ويجى على الفيلا بتاعتى , مينفعش يقعد معاكى انتى وجوزك لكن انا قعدة لوحدى يقعد معايا ولو عايز بعد كده يعيش فى مكان لوحده هو حر , ولا ايه يا شريف ؟
شريف : انا شايف كلام روما صح انا هروح اقعد معاها لحد ما ارتب امورى
نيللى : خلاص ماشى بس تعالا معايا الاول سلم على عامر ولى لى
شريف : ماشى , بس عايز اروح مشوار الاول
_____________________
قدام قبر بيوقف شريف يتأمل الاسم اللى مكتوب عليه " المرحومه كاميليا مصطفى الحسينى " يبص على القبر بحزن ينزل على ركبته ويقعد قدامه
شريف : وحشتينى يا كاميليا سنين وانا بتعذب من فراقك مش من السجن يا ترى مسمحانى بس هتسامحينى على ايه ولا ايه على انى ضيعتك منى وانتى عايشه ولا على انى خليت حياتك تنتهى بأيده على فكره انا كنت بحبك والله كنت بحبك اوى بس غلطة عمرى انى معرفتش اباين حبى ليكى بس حبك كان دايما فى قلبى ولسه فاضل سامحينى يا كاميليا يمكن اعرف اسامح نفسى سامحينى
_____________________
بعد كام يوم .. روما فى الشركة تدخل عليها السكرتيره
السكرتيره : روما هانم فى واحد عايز يقابل حضرتك
روما : مين ؟
السكرتيره : بيقول جلال بيه الشيمى
روما : جلال الشيمى ؟!
السكرتيره : ايوه يا فندم
روما : طيب خليه يتفضل
يدخل جلال مبتسم وتقوم روما من مكانها تسلم عليه
روما : اهلا جلال بيه
جلال : اهلا بيكى
روما : اتفضل
جلال : اخبارك ايه ؟
روما : الحمد لله تمام , خير يا ترى ايه سر الزياره دى
جلال : اوووبس هو مينفعش اجى من غير سبب ولا ايه
روما : لالا انا مش قصدى
جلال : قصدك ولا مش قصدك ما انا اتصدمت واللى كان كان
روما : اسفه يا جلال بيه انا بس استغربت
جلال : يا ستى كل الحكايه انى كنت معدى من هنا قولت اسلم على اللى هنا اسأل على اللى هنا اعرف اخبار اللى هنا غلطت ياللى هنا
روما : اممممم لا ولا غلطت ولا حاجة تشرف فى اى وقت الشركة شركتك وتنور بيك
جلال : منوره بالبدر المنور اللى فيها
تبص روما لـ جلال بنظرة استغراب ومتعلقش على كلامه
روما : تحب تشرب ايه يا جلال بيه
جلال : لحظه , ايه جلال بيه جلال بيه بقى بعد ما طلعنا كنا زمايل فى كلية واحده مع بعض وبعد ما اثبت التاريخ انك فرجتى عليا الجامعه كلها ذات يوم جايه تقوليلى جلال بيه
روما : ههههههههه امال عايز اقولك ايه
جلال : يا سلام تقوليلى جلال , جيمى , جلجل
روما بتريقه : طب مش شايف يا جلجل , انك قديم شوية
جلال : وماله هو فى احلى من القديم طب بذمتك فى احلى منه
روما : ههههههه لا
جلال : شوفتى , كده بقى اخد قهوه مظبوطه جدا
روما : حاضر يا سيدى
جلال : مكتبك حلو اوى
روما : اتفضله
جلال : مش هيبقى حلو عليا هو حلو عليكى انتى وبس
روما : يا راجل , هو انت مش وراك شغل ولا ايه
جلال : ازاى بقى انا روحت شركتى اطمنت على شغلى مضيت ورقى عرفت اخبار موظفينى بعد كده انطلقت
روما : امممممممم انطلقت
جلال : طبعا لازم الواحد جنب الشغل ينطلق شوية عشان يعرف يكمل , هو انتى مش بتنطلقى ؟!
روما : لا الحقيقه انا ماليش فى الانطلاق كفايه عليا الشغل
جلال : لالا انا لازم اخدك مره اعرفك عليه
روما : هو مين ؟
جلال : الانطلاق ده انتو هتبقو اصحاب اوووى
روما : ههههههههه
فى الوقت ده يدخل مراد
مراد : روما الور ......
يسكت مراد اول ما يشوف جلال قاعد مع روما
مراد : اسف مخبطش ماكنتش اعرف ان فى حد معاكى
روما : تعالا يا مراد محدش غريب ده جلال بيه
جلال : بردو بيه
روما : سورى قصدى جلجل بيه هههههه
مراد يمد ايده لـ جلال : اهلا وسهلا
جلال وهو بيسلم عليه : ازيك
مراد : الحمد لله , لو سمحتى يا روما عايز الامضاء على الورق ده
روما : هات
تمضى روما على الورق ومراد وجلال قعدين عنيهم على بعض
روما : اتفضل يا سيدى فى حاجة تانى ؟
مراد : لا تمام عن اذنكم , فرصه سعيده يا جلال بيه
جلال : اكيد انا اسعد
يبصو الاتنين لبعض ونظره غريبة ويمشى مراد ويفضل جلال بيتكلم ويهزر مع روما
_____________________
فى بيت نيللى ... لى لى قعدة بتلعب على الارض وعامر قاعد قدامها بيبص عليها ووشه باين عليه الهم والزعل ... تدخل نيللى عليهم تبص على شكل عامر وتستغرب تروح بهدوء تقعد جنب
نيللى : مالك يا عامر ؟!
عامر : لا يا حبيبتى مفيش حاجة
نيللى : مفيش حاجة ازاى انت مش شايف شكلك هتخبى عليا
عامر : اقولك ايه بس حصلتلى مصيبه فى الشغل المخزن اللى انا مسؤل عنه ضاع منه جهاز مهم اوى
نيللى : ايه ازاى ؟!
عامر : والله ما عارف المشكلة دلوقتى يا اما الجهاز يظهر يا اما ادفع تمنه يا اما اتحول للتحقيق
نيللى : خلاص ادفع تمنه
عامر : ده بـ 20 الف جنيه يا نيللى ادفع منين
نيللى : يا سلام فلوسى فى البنك ....
عامر : بس بس ولا كلمة زياده انا على اخر الزمن اخد من فلوسك , جرا ايه يا نيللى مااحنا من يوم ما اتجوزنا اتفقنا ان احنا هنعيش على قد مستوايا مش مستواكى
نيللى : اولا دى حاجة ودى حاجة احنا من يوم ما اتجوزنا واحنا عايشين على قد مرتبك وعمرى ما اتكلمت بس دلوقتى فى ظروف والفلوس قعدة مرميه فى البنك عمرى ما سحبت منها مليم فيها ايه لما تاخد منها عشان تحل المشكله دى
عامر : مش هاخد من فلوسك يا نيللى , انا هتصرف
نيللى : عيب عليك يا عامر هتتصرف هتعمل ايه هتستلف من حد غريب خلاص يا سيدى استلف منى انا وابقى رجعهم اقولك اعتبرهم فلوس لى لى مش فلوسى خد يا سيدى من بنتك مش منى
عامر : تعرف يا نيللى انتى احلى حاجة حصلتلى فى حياتى
نيللى : هههههه تعرف انت بقى انك لو كنت قابلتنى من كام سنه عمرك ما كنت هتقولى كده
عامر : المهم انى شوفتك وقابلتك يا احلى من نيللى الحقيقه
نيللى : هههههههههه هتاخد الفلوس بقى
عامر : ماشى بس بشرط هرجعهلك حتى لو جزء جزء
نيللى : ماشى المهم تكون مرتاح
عامر : كفايه انك معايا ربنا يخليكى ليا
ونيللى : ويخليك ليا
_____________________
روما قعدة فى اوضتها ... شريف يخبط عليها
شريف من بره : روما انتى صاحيه ؟
روما : اه يا شريف ادخل
يدخل شريف ويقعد على كرسى قصاد روما
شريف : شوفت نور اوضتك قولت اكيد لسه صاحيه
روما : مش بنام دلوقتى بنام قرب الفجر كده
شريف : هههه انا بقى مش بنام خالص ليالى السجن مش عايزه تروح من دماغى كل ما اغمض عنيا اسمع النطق بالحكم رغم انه خلاص بس بردو مش عارف اشيل كل اللى حصل من رأسى
روما : مهو كده المواقف اللى بتوجع زى الجروح بالظبط مهما تخف لازم تفضل سايبه أثر
شريف : ياااه على الدنيا مين يصدق ان انا بتكلم وبفضفض معاكى
روما : عمر ما فى حاجة فضلت على حالها ,, المهم انت لازم تخرج من الحاله دى بقى وترجع لحياتك
شريف : ارجع لحياتى تفتكرى هقدر تفتكرى هنسى انى قتلت حتى لو غصب عنى
روما : ما احنا قولنا مفيش حاجة بتفضل على حالها , ايه رأيك ترجع للشغل فى الشركة تانى الشغل هو اكتر حاجة هتفيدك دلوقتى
شريف : انا كمان كنت بفكر فى نفس الموضوع ده
روما : على فكره انت ممكن تشتغل فى الشركة لحد ما تفتح شركة خاصه بيك لو عايز , فلوسك فى البنك بأسمك وتحت تصرفك
شريف : انا هرجع الشغل فى الشركة الاول واشوف بعد كده ان كنت اقدر امسك شركة كامله ولا خلاص مبقتش نافع
روما : ايه اللى انت بتقوله ده لا ان شاء الله هتلاقى فيك امل
شريف : هههههه ماشى يا ستى متشكر
روما : بقولك ايه انت احسن حاجة تقوم تنام دلوقتى عشان تصحى فايق وتروح الشركة من بكره مش لازم تتاخر اكتر من كده
شريف : عندك حق , ماشى تصبحى على خير
روما : وانت من اهل الخير

يتبع ✍️✍️✍️