روما

جزء ٢٨

الجزء الثاني
الحلقه ٧

عدت فتره على خطوبة روما وجلال والوضع كان كا التالى ... روما دايما خارجه مع جلال عشان بتشرف معاه على تجهيز الفيلا اللى هيعيشو فيها ... مراد طبعه اتغير اوى ودايما مدايق ومتعصب مع كل الناس ... شريف شايل شغل الشركة كلها على دماغه وبيحاول وبكل طريقه انه يبنى حياته من اول وجديد
_____________________
روما قعده فى مكتبها تلفونها يرن تبص على الاسم تلاقيه جلال
روما : الو
جلال : ايه يا حبيبى انا مستنيكى فى العربية تعالى يلا
روما : خلاص ماشى جايه اهو
تقوم روما من على المكتب وتلم حاجاتها وتخرج من المكتب تروح على مكتب مراد تلاقى شريف معاه
روما : ايه ده بتعملو ايه مع بعض ان شاء الله
شريف : هو عزمنى على شاى انا جيت اشرب الشاى
روما : ههههه اوكى انا ماشيه فى اى حاجة متعطله او عايزه امضاء
مراد : لا , بس انتى رايحه فين ؟
روما : جلال تحت رايحين نشوف الفيلا
مراد : مش واخده بالك انك بقيتى مش بتقعدى ساعتين على بعض فى الشركة ودايما خارجه خارجه
روما : نعم ؟!
شريف بسرعه : هو يعنى خايف لا الشغل يتعطل ولا حاجة
روما : مفيش حاجة متعطله والشغل ماشى كويس وانت وهو موجودين اهو تخلصو اى حاجة
مراد : ولو فى ظرف طارق حصل نجيب حضرتك من فين
روما : فى اختراع اسمه موبايل , سلام
تمشى روما خطوه وترجع تبص لـ مراد
روما : الا قولى صح هى العصبيه اللى بيقت فيها الايام دى خلاص خلتك مش عارف انت بتقول ايه
مراد يبص فى ورق قدامه وميردش على روما .. وروما توقف لحظات بعدها تخرج وتقفل الباب وراها وشريف يبص على الاتنين ويسكت
_____________________
جلال قاعد فى العريبة بيبص على الساعه اللى فى ايده يبص ناحية الشركة يلاقى روما جايه عليه
جلال : هو ده اللى جايه اهو
روما : معلش كان فى شوية حاجات بخلصها
جلال : طب يلا بينا مهندس الديكور فى الفيلا من بدرى
تركب روما مع جلال العربيه ويروحوالفيلا ... فيلا كبيره تحت التشطيب تصميمها رائع ... تدخل روما مع جلال يلاقو على جنب واقف المهندس مع عامل من العمال
جلال : ازيك يا باش مهندس
المهندس : اهلا جلال بيه
جلال : معلش على التاخير , انسه روما خطيبتى
المهندس : اهلا وسهلا يا فندم
روما : اهلا بيك
جلال : بص كل الحاجات اللى انت ورتها ليا امبارح دى وريها ليها وهى تختار
المهندس يطلع كتالوج لـ روما
المهندس : بصى يا هانم دى احدث الوان نازله , حضرتك اللون ده هيبقى هايل للصالون ايه رأى حضرتك ؟
روما : حلو
جلال : ايه رأيك يا روما فى اللون ده لـ اوضة النوم
روما : لا متهيألى ده احلى
المنهدس : حضرتك فى ده كمان
تفضل روما وجلال يختارو مع الالوان والصميمات ويشوفو تجيهزات الفيلا بعد كام ساعه مشيو من الفيلا وراحو يقعدو فى كفاتيريا على النيل
جلال : سرحانه فى ايه ؟
روما : ولا حاجة
جلال : لا فى حاجة ولا انتى هتخبى عليا
روما : لا مش كده بس انا بجد مش عارفه مالى , حاسه ان مره واحده الدنيا اتغيرت حواليا بسرعه رهيبه بعد ما كان مفيش فيها اى تغير
جلال : حبيبتى ده عادى انتى زى اى بنت داخله على حياه جديده لازم تكون متلخبطه ومتوتره كده
روما : بس انا مش زى اى بنت يا جلال
جلال : اكيد طبعا مش زى اى بنت انتى ست البنات كلهم
روما : بطل كلامك ده على فكره احنا مش صغيرين على الكلام ده
جلال : نعم نعم نعم ليه عندنا 80 سنه ولا حاجة
روما : لا بس احنا مش فى العشرين يعنى
جلال : والله وهما اللى فى العشرين احسن مننا فى ايه انا هخليكى تعيش حياه احلى الف مره من حياة بنت 17 مع انك متفرقيش عنها فى حاجة على فكره
روما : بطل بقى البكش بتاعك ده
جلال : طب قوليلى بحبك وانا ابطل بكش
روما : بس استهبال يا جلال والنبى
جلال : استهبال طب والله لو ما قولتى بحبك يا جلال لا اوريكى الاستهبال الصح
روما : متقدرش يا جلجل عشان لو انت مجنون انا مجنونه اكتر منك وخلى ده فى دماغك على طول
جلال : اموت فيك يا جامد , انتى عارفه انا حبيتك ليه
روما : ليه
جلال : مش هقولك هههههههههه
روما : انت باين عليكى رايق كعاده , قوم بقى انا عايزه اروح
جلال : خلينا شوية
روما : لا كفايه كده عندى شغل كتير بكره وعايزه انام
جلال : ماشى يا ستى يلا بينا
_____________________
نيللى قعده وحاطه لى لى على رجلها وبتتكلم فى التلفون مع ندى
نيللى : لى لى قولى الو لـ خالتو
لى لى : الو يا خالتو
ندى : يا قلب خالتو انتى ازيك يا لى لى
نيللى : قولى كويسه يا خالتو
لى لى : كويسه يا خالتو
نيللى : انتى عامله ايه
لى لى : انتى عامله ايه
ندى : يا روحى انا كويسه يا سكر عشان سمعت صوتك
نيللى : يلا يا لى لى روحى العبى , ايوه يا ندى
ندى : ايه يا نيللى
نيللى : بردو مش هتيجى تحضرى فرح روما
ندى : والله بجد مش هقدر انزل عندى امتحانات كتير اوى الفتره دى
نيللى : خلاص ماشى
ندى : قوليلى هو العريس شكله ايه ؟
نيللى : شكله قمر ده شياكه واناقه دم خفيف اسلوب حلو فى الكلام
ندى : والله كويس مين يصدق ان روما اخيرا هتتجوز كان نفسى اوى احضر الفرح
نيللى : تعرفى انها ماكنتش عايزه تعمل فرح اصلا بس جلال عريسها اصر انه يعمل فرح كبير لحد دلوقتى دافع فيه مبلغ وقدره
ندى : ليه ؟
نيللى : كل حاجة جايه من بره حتى فستان الفرح هيجى من باريس
ندى : ايه ده انا كنت ناويه ابعتلها الفستان من هنا هدية الفرح
نيللى : مين ده يا ماما ده سافر بنفسه باريس اختار الفستان وقال للمصمم يعملو ورجع تانى حتى روما لسه متعرفش شكل الفستان وهو مخليه مفجأه , ولا الفيلا اللى جابها ليها رفض انهم يعيشو فى الفيلا بتاعته عائلته وعمل ليها فيلا ولا القصر
ندى : يا وله , والله اخيرا روما لقيت اللى يحبها بجد وحب زى بتاع الافلام كمان اوعدنا يا رب
نيللى : ايوه ايوه بدء الحسد ربنا يستر
ندى : ههههههههههههههههه اخس عليكى يا نيللى
نيللى : هههههههههه
_____________________
مراد فى بيته قاعد فى البلكونه سرحان وفى دنيا غير الدنيا ... يدخل عليه ابنه شادى ويطلع على رجله مراد يبصه ويبتسم
مراد : بتعمل ايه , ايه اللى فى ايدك دى ؟
شادى : لعبه بابا
مراد : ههه العب يا حبيبى
مراد يبص على ابنه بصمت وهو بيفكر
مراد فى سره : مش عارف اذا كنت زعلان ولا ندمان زعلان عشان فضلت عليا واحد تانى وانا اللى فضلت احبها طول عمرى ولا ندمان انى اتجوزت مهى غيرت رأيها فى الاخر هتتجوز يمكن لو كنت فضلت مستنى كانت , كانت ايه مهى قالتها ليك عمرها ما حبتك ولا شافتك اكتر من صديق بس ليه جلال احسن منى فى ايه عشان تحبه هو وتفضله عليا انا تعرفنى من سنين وسنين وهو يدوب من كام شهر انا معرفتش اقنعها بالجواز وهو عرف ليه , حبها اكتر منى ده انا كنت بحبها اكتر من نفسى ومع كده دبحدنى بسكين بارده , طب ما انا اتجوزت اشمعنى هى لا ولا كنت فاكر انها مادام موافقتش عليك يبقى مش هتوافق على غيرك , ااااه ماكنتش اعرف ان بعد 3 سنين جواز هكتشف انى لسه بحبك وانى اتجوزت بس عشان اخرجك حبك من قلبى لكن هو رفض يخرج ويسبنى , جرحك صعب اوى عليا والحرج ساعات بيقسى القلب يا روما
_____________________
عدا الوقت بسرعه وجيه يوم عمر ماحد اتخيل انه هيجى يوم فرح روما ... الصبح فى الفيلا ... نيللى قعده مع روما فى الاوضه ومعاها لى لى وروما قعده رايحه جايه وهى متعصبه
نيللى : اهدى يا روما زمانه جاى دلوقتى
روما : يعنى ايه يعنى الساعه دلوقتى 11 والفستان لسه موصلش ولسه هنروح الفندق ولسه هجهز والفرح الساعه 8
نيللى : والله زمانه على وصل وبعدين لسه بدرى
روما : بدرى ايه وزفت ايه انا اصلا ماكنتش عايزه ولا افراح ولا نيله
نيللى : ليه بس يا روما هو انتى محرمه على نفسك الفرحه
تبص روما لـ نيللى وتسكت ... بعد شويه تخبط الخادمه وتدخل شايله علبه فى ايدها
الخادمه : السواق بتاع جلال بيه جاب لحضرتك العلبه دى
نيللى : اكيد ده الفستان
تاخد روما العلبه من الخادمه وتفتحها تلاقى فستان فرح فى منتهى الروعه وفى نفس الوقت هادى ورقيق
نيللى : واو تحفه بجد لا ده جلال طلع ذوقه حلو اوى اوى
تبص روما فى العلبه تلاقى ورقة صغيره تفتحها تلاقى مكتوب فيها " احلى فستان لـ احلى عروسه .. جلال " تبتسم روما بهدوء وتسكت
نيللى : مش يلا بقى نروح الفندق ولا ايه
روما : يلا
تنزل روما هى ونيللى ويروحو الفندق اللى فيه القاعه اللى فيها الفرح يكون جلال حاجز اوضه لـ روما واوضه ليه عشان يلبسو يجهزو فيها ويجى الليل ... جلال فى الاوضه واقف قدام المرايا بيتفرخ على نفسه وبيعدل البدله
جلال : امممم ايوه كده مظبوطه اوووف حلو حلو حلو اهدى يا جلجل اهدى واخيرا الفرح جيه , يا ترى روما خلصت ولا لسه فين الموبايل
يمسك جلال الموبايل ويتصل بـ روما
نيللى : الو
جلال : الو مين معايا ؟!
نيللى : انا نيللى معلش يا جلال اصل روما مش عارفه ترد عليك
جلال : اه طب هى خصلت ولا لسه ؟
نيللى : لسه شويه فاضل حاجات بسيطه نص ساعه كده
جلال : اوكى ماشى
تقفل نيللى مع جلال وتبص لـ روما اللى قعده والكوافير بيخلص ليها المكياج
نيللى : ايه الحلاوه دى يا روما
روما : بجد ؟
نيللى : بجد ايه ده انتى زى القمر
يخلص الكوافير ويخرج ومن الاوضه
نيللى : روما ثوانى بس عامر عايزانى تحت دقيقه ورجعه
تمشى نيللى وتفضل روما بس فى الاوضه تقوم من مكانها وتروح توقف قدام مرايا كبيره فى الاوضه وتبص على نفسها على الفستان الابيض وتسريحة الشعر والمكياج والطرحه البيضه اللى نازله على ضهر فضلت باصه على المرايا وهى بتتأمل نفسها
روما فى سرها : هتتجوزى يا روما لبسه الفستان الابيض اللى يوم من الايام قولتى انك عمرك ما هتلبسه ,, طب خايفه ليه هو انتى خلاص لدرجه دى بقيت متعوده على الخوف مش عايز يخرج من قلبك مش عارفه تفرحى افرحى افرحى ولو مره واحده فى حياتك خلاص مفيش خوف تانى مفيش حزن مفيش كره وانتقام نضفى قلبك من الزكريات اللى فضلتى محبوسه فيها سنين وحبى وعيشى وكفايه كفايه بقى يا روما هيروح منك ايه تانى اكتر من اللى راح اعتبرى نفسك مولوده من جديد وعيشى اللى راح منك عيشى يا روما
_____________________
فى القاعه المعازيم واقفين وموسيقى هاديه شغاله هاله واقفه جنب مراد عامر واقف وماسك لى لى فى ايده وجلال واقف قدام سلم طويل وجنبه واقف شريف ... دقايق والكل يبص ناحية السلم ... روما نازله بهدوء وهى مبتسمه ونيللى ماسكه ليها الفستان جلال يبتسم اول ما يشوفها ... توصل روما لـ اخر السلم يمسك ايدها شريف ويدها لـ جلال ... يقرب جلال من روما ويبوس رأسها ويروحو فى نص القاعه عشان رقصة السلو وتبدء روما ترقص مع جلال
جلال بهمس : احلى عروسه شوفتها فى حياتى
روما تبتسم بهدوء ومتردش
جلال : طب والله العظيم احلى عروسه شوفتها فى حياتى بجد
روما : هههههههههه
جلال : عجبك الفستان ؟
روما : حلو اوى
جلال : حلو عشان انتى لبسه
روما : انا مش متعوده على الكلام ده وكده هاخد عليه
جلال : خدى عليه براحتك عشان عمره ما هيخلص والله العظيم انا بحبك يا روما , من هنا ورايح اللى انتى عايزاه هيكون تحت رجليكى ولو نجمه من السما بس انتى اطلبى واحلمى
روما : انا مش عايزه غير انى اعيش حياه هاديه يا جلال
جلال : هنعيش يا قلب جلال هنعيش مع بعض احلى حياه اوعدك يا روما
يضم جلال روما فى حضنه اوى وهما بيرقصو
جلال بحب : بحبك يا روما
روما : وانا كمان يا جلال ,, بحبك

يتبع ✍️✍️✍️