الجزء الثاني
الحلقه ١٤
روما : جوزى ؟!
مريم : ايوه
روما : انتى بتقولى ايه يابت الكلب
مريم : بقولك الحقيقه ,, انا خلاص زهقت وتعبت من شيل الهم ده فوق قلبى
روما تبصلها بستغراب وعدم فهم
روما بزعيق : انتى ايه علاقتك بجوزى تعرفيه من فين اصلا انطقى
مريم : انا اعرف عن جوزك اللى انتى عمرك ما كنتى هتعرفيه ,, اوعى تفتكرى ان الثروه والفلوس اللى متغرق بيها دى بتاعت ابوه ابو جلال مات وهو على الحديده فلس قبل ما يموت وماحدش عرف بكده الفلوس اللى جلال بيرمى فيها يمين وشمال دى فلوس الستات اللى نصب عليها جلال بيه رجل الاعمال ماهو الا صياد حريم وكان متجوز قبلك اتنين
روما تحس انها مش قادر توقف وتوقع على الكرسى اللى وراها وهى عنيها على مريم
مريم : ايوه , واحده كانت بنت رجل اعمال مغربى , شهرين وكان واخد كل حاجة منها وطلقها والتانيه كانت سيدة اعمال مش من مصر وبدء معاها الموضوع شراكه وانتهى بالجواز واللى عمله مع الاولى عمله مع التانيه ,, وانتى التالته ده غير اللى كان بيعرفهم طيارى بس المشكله ان ماحدش يعرف عنه حاجة فى مصر غير انه رجل الاعمال الكبير المحترم
روما ساكته وعنيها على مريم
مريم : طبعا مستغرابه وبتسألى نفسك انا اعرف كل الكلام ده من فين ,, انا اعرف كل ده عشان انا زيى زيك انتى والاتنين اللى قبلك بس الفرق ان انتو ولاد ناس لكن انا يدوب كنت عنده سكرتيره غلبانه هبله يضحك عليها بكلمتين حب عشان تتحول فى الاخر عشقته وخادمه عنده تنفذ الخطط بتاعته هو اللى بعتنى لـ مصطفى ايوب عشان اقوله يكون وسطه ليا وترضى تشغلينى فى الشركة عشان انقل ليه كل الاخبار اول بأول ,, هو اللى سرب معلومات المناقصه اخدها من على اللاب توب بتاعك هو اللى بلغ عن الرشوه مع انه كان عارف انها مش هتثبت عليكى لكن كان بيعمل كده عشان يكسرك شافك قويه وناشفه ومش عارف يضحك عليكى بكلام الحب بس فحب يكسر شوكتك عشان انتى اللى تكونى محتاجله انتى اللى تقولي ليه انقذنى وساعدنى جلال لما بيكون عايز يوصل لحاجة بيعمل اى حاجة عشان يوصلها ,, وعلى فكره هو هو ال اللى كان السبب ورا الاجهاض اللى حصلك
روما تبرق عنيها وتبص لـ مريم بصدمه اكتر
مريم : من اول الحمل وهو بيحطلك ادويا فى الاكل مره وفى الشرب مره عشان الجنين ينزل ويضرب عصفوين بحجر واحد , منها حالتك النفسيه هتتدمر وتبقى عجينه طريه فى ايده اكتر عشان يعرف يتحكم فيكى ومنها انه لما يسيبك مايبقاش فى رابط بينكم
روما تفضل ساكته وتبص فى الارض
مريم بدموع : انا عارفه انك نفسك تاكلينى بسنانك دلوقتى , بس انا واحده مربوطه بسلاسل واحد شيطان بيحركنى زى العروسه اللعبه ربطنى بيه زى السيد اللى بيربط الكلب بتاعه بالحبل عشان يفضل معاه على طول , لكن خلاص قرفت منه ومن نفسى ومن اللى بعمله لو عايزه تبلغى عنى بلغى لو عايزه تموتينى حتى موتينى وخلصينى من القرف اللى عيشت نفسى فيه
ترفع روما عنيها وتبص لـ مريم بنظره فاضيه مفيش فيها اى معنى ... وتقوم من على الكرسى بهدوء
مريم بعياط : مدام روما , مدام روما انتى هتعملى معايا ايه مدام روما ردى عليا انتى هتعملى معايا ايه
روما تبص لـ مريم لحظات وتسبها بكل هدوء وتخرج من المكتب ... وتقعد مريم على الكرسى وهى بتعيط بصوت عالى وحرقه
_____________________
هاله قعده فى البيت مع مامتها تلاقى الباب بيخبط تقوم تفتح تلاقى مراد قدامها
مراد : ادخل ولا امشى ؟
هاله : اتفضل
تدخل هاله ويدخل وراها مراد ... شادى اول ما يشوف مراد يجرى عليه يروح مراد يشيله وحضنه
مراد : حبيب بابا وحشتنى , بابا وحشك ؟
شادى : اه
أم هاله : اهلا يا مراد ازيك يابنى
مراد : الحمد لله , روح يا شادى العب جوا
يدخل شادى ومراد يقعد قدام هاله وامها
مراد : مش ناويه ترجعى بيتك يا هاله
هاله : انا مرتاحه هنا
أم هاله : الواحده بترتاح فى بيت جوزها بس يا هاله
هاله : ماما لو سمحتى
مراد : هاله احنا بينا ولد واللى بيحصل ده غلط عليه
هاله : وانت لما تحب غيرى وقلبك يكون معاها ده مش غلط عليه لما انت بتحبها اوى كده اتجوزنى ليه اتجوزت من الاصل ليه ما كنت فضلت تحت رجليها احسن مهى فضلت واحد عليك فى الاخر وبقيت انت فى الاخر ولا حاجة بالنسبه ليها غير خادم الست
مراد بزعيق : لمى لسانك هو انا عشان ساكت ليكى
هاله تبص لـ مراد بصدمه وخوف
أم هاله : معلش معلش يابنى هى مش قصدها
مراد بحزم : بصى يا هاله الغلط مش عليكى الغلط عليا انا عشان قولتلك عن حياتى قبل الجواز اغبى راجل فى الدنيا اللى يحكى لـ مراته عن حياته وعن ماضيه انا لو كنت خبت زى باقى الرجاله كان بيقى احسن شوفتى انتى وصلتى الحكايه لـ ايه ,, كنت بحبها وكنت عايز اتجوزها وخلاص انا اتجوزت وخلفت وهى اتجوزت والحكايه خلصت واللى بينى وبينها الشغل والصدقه اللى لازم احافظ عليها على الاقل ارد جميل ابوها وجدها عليا وعلى اهلى ,, حاجة من اتنين يا هاله يا اما ترجعى البيت ونعيش مع بعض فى سلام ونقفل باب الماضى يا اما كل واحد فينا يروح لحال سبيله وحقوقك كلها محفوظه وابنك هيفضل معاكى وده اخر كلام عندى بيتك عندك عايزه ترجعى اهلا وسهلا عايزه ورقتك توصلك بردو اهلا وسهلا , سلام
يقوم مراد على طول ويمشى وهاله تفضل فى مكانها وامها جنبها بتبصلها بغيظ ونرفزه
أم هاله : ارتاحتى دلوقتى
هاله تبص لـ امها ومتردش وتفضل ساكته
_____________________
روما توصل الفيلا ... تدخل اوضة النوم وتقفل الباب وراها وتوقف فى نص الاوضه وهى بتبص حواليها لحد ما عنيها تيجى على صوره فرحها هى وجلال تروح توقف قدامها وتفضل باصه عليها
_ لو قولتلك انى بحبك من اول يوم شوفتك فيه هكون كداب لأنى بحبك من اول لحظه عنيا شافتك فيها
_ تتجوزينى ؟
_ انا هخليكى تعيش حياه احلى الف مره من حياة بنت 17 مع انك متفرقيش عنها فى حاجة على فكره
_ لا ده انتى شكلك هتحبى البيه اللى جاى ده اكتر منى
_ مهو عشان انتى حامل لازم تاخدى بالك من نفسك اكتر من كده
_ بحبك يا روما
تشيل روما الصوره من مكانها وتروح ترميها على الارض وتفضل تضرب فيها برجليها بغل وحرقه توقف فى مكانها لحظات وهى بتنهج وتروح واخده شنطها وتخرج من الاوضه
_____________________
جلال فى العربية يرن الموبايل بتاعه يبص على التلفون وينفخ بزهق ويرد
جلال : عايزه ايه ؟
مريم : انت فين ؟ انا بتصل بيك من امبارح
جلال : وانتى مال اهلك
مريم : انا عايزاك فى حاجة مهمه تعالا دلوقتى فى مصبيه حصلت
جلال : وحياة امك , ماشى يا ام المصايب انا راجع مصر كمان كام ساعه لما اجى ابقى اشوفك حلى عن سمايه بقى
مريم : تجيلى على طول يا جلال
جلال : انتى هتتأمرى عليا يابت ,, هبقى اشوف هجيلك النهارده ولا بكره انا عندى حاجات مهمه
مريم : واللى انا عايزاك فيه مهم اكتر
جلال : عايزاك عايزاك , عايزه ايه ؟
مريم : مش هعرف اقولك فى التلفون
جلال : ولما انتى مش هتعرفى تقولى فى التلفون بتكلمينى ليه دلوقتى
مريم : جلال تعالى اول ما توصل
جلال : ملعون ابو ده رغى , طيب طيب هتنيل اجى اقفلى ام السكة بقى وبطلى رغى
يقفل جلال السكة ويرميه الموبايل على الكرسى اللى جنبه بعصبيه
_____________________
نيللى قعده فى البيت على الكنبه وعامر قاعد جنبها يسمعو الباب بيخبط يقوم عامر يفتح يلاقى شريف
عامر : اهلا يا شريف ازيك اخبارك ايه يا راجل
شريف : الحمد لله ازيك انت يا عامر
عامر : تمام اتفضل ادخل
يدخل شريف نيللى لما تشوف تقوم تحضنه وتسلم عليه
نيللى : ازيك يا ندل كل ده ماتجيش تسأل عليا
شريف : معلش يا نيللى ,, بقولك ايه روما ماجتش عندك ؟
نيللى بستغراب : روما لا ليه ؟
شريف : ولا اتصلت بيكى ؟
نيللى : لا فى ايه قلقتنى
شريف : لا مفيش حاجة بس اصل ماجتش الشركة النهارده وتلفونها مقفول واتصلت على تلفون الفيلا الخادمه قالت انها نزلت بالليل متاخر ومرجعتش لحد دلوقتى
نيللى بخوف : انت بتهزر يعنى هتكون راحت فين
شريف : والله ما اعرف انا امبارح كنت معاها فى الشركة وقالتلى انها هتقفل اوراق وتمشى النهارده ولا جات الشركة ولا بترد على التلفونات
نيللى : طب وجلال فين ؟
شريف : جلال مسافر والمفروض انه يجى النهارده بالليل
نيللى : دى الساعه لسه واحده الضهر فين احنا وفين الليل
عامر : يا جماعه اهدو يمكن خرجت تشم شوية هوى والوقت سرقها
شريف : بتشم الهوى يوم كامل , انا هروح الشركة يمكن تكون وصلت ولحد بالليل لو فضل الحال كده هبلغ البوليس ,, سلام
نيللى : ابقى طمنى يا شريف , يارب استر يارب
يتبع ✍️✍️✍️
