روما

جزء ١٣

الحلقه ١٣

بعد اسبوع , روما لسه مافقتش وحالتها مفيش فيها اى تحسن ولسه فى العناية المركزة , مراد مش بيسيب المستشفى لحظة , رشوان بيتصل بـ مراد كل 10 دقايق عشان يعرف الاخبار , شاهيناز مستنيه يوصلها خبر موت روما فى اى وقت , ندى عايزة تروح لـ روما بس خايفه من شاهيناز
_____________________
فى الفيلا الكل قاعدين على السفره , تقريبا مش بياكلو قد ما كل واحد فيهم بيبص لـ التانى شريف بيبص لـ كاميليا وكاميليا كل ما تبصلو تلف وشها الناحيه التانية , نيللى بتبص لـ عمر وهو بياكل ومش باصص عليها اصلا , ندى كل شوية تبص لشاهيناز زى ماتكون عايزة تتكلم وخايفه
شاهيناز : هو فى ايه مالكم ؟
شريف : ابدا ولا حاجة
نيللى : هيكون فيه ايه يعنى
كاميليا : صح يا طنط هو انتو بردو مش هتروحو لـ روما المستشفى
شاهيناز : دى شئ متخصكيش يا كاميليا دى حاجة تخصنا احنا
كاميليا : متشكره
شاهيناز : العفو
ندى : ماما بصراحه احنا فعلا لازم ......
شاهيناز : انا قلت قبل كده لا
نيللى : وفيها ايه يعنى لو نروح نعرف اخبارها ده بيقولو انها بين الحياه والموت
شاهيناز : الله الله انتى كمان يا ست نيللى عايزة تروحلها
نيللى : .........................
شاهيناز : ايه فجأه حبتوها ولا ايه , انا قلت قبل كده دى مش اختكم تموت تتحرق تغور فى ستين داهيه حاجة متخصش حد فيكم فاهمين
وتقوم شاهيناز من على السفره وهى متعصبه
شريف : هى مش قالت قبل كده يا ندى مفيش مرواح المستشفى , انتى عايزة مشاكل وخلاص
ندى : يا ناس ياهووه , تبقى اختنا بتموت ومنروحش نطمن عليها الناس تقول علينا ايه
شريف : ندى , احنا نسينا موضوع الاخوه ده من زمان اشمعنى هنفتكره دلوقتى
كاميليا : يااااه والله انا خايفه فى يوم من الايام تحصلى حاجة متسألش فيا , اذا كان بتعمل كده مع اختك , انا قايمه
تقوم كاميليا وشريف وندى يبصو لبعض بزعل وكل واحد يلف وشه الناحيه التانية
عمر بكل هدوء : هى مالها روما دى ؟
نيللى : حمد لله على السلامه انت لسه جاى ولا ايه , عملت حادثه , العربيه اتقلبت بيها , بتموت فى المستشفى , عرفت
عمر : بجد , ماقلتيش يعنى
نيللى : هه , معلش ماجتش مناسبة
____________________
رشوان فى اوضته بيكلم مراد فى التلفون
رشوان : اسبوع , اسبوع يا مراد زى مهى
مراد : ان شاء الله تبقى كويسة يا رشوان بيه
رشوان : طيب نسفرها بره , بره مصر خالص نوديها أمريكا
مراد : قولت للدكتور كده وقالى مينفعش
رشوان : ليه , احنا هنسفرها بطياره خاصه
مراد : يا رشوان بيه , بره مش هيقدرو يعملو اكتر من ال اتعمل , وده كلام الدكتور , هى ان شاء الله هتبقى كويسه ان شاء الله
رشوان : يارب يارب
_____________________
فى العناية المركزه , روما نايمه على السرير , وجهاز نبضات القلب بيرسم نبض ضعيف , روما مش حاسه بحاجة لكن مخها شغل ومشاهد عماله تعدى قدام عنيها زى متكون بتحلم , مشهد لـ ابوها داخل الفيلا وايده فى ايد شاهيناز , مشهد لـ شاهيناز بتزعق مع ابوها , مشهد لـ صور امها وهى بتتشال من على الحيطان , مشهد لـ عزا وناس لبس اسود , مشهد ليها وهى فى اوضة قعده ضمه رجلها عليها وخايفه بتتفتح الاوضه وبيدخل منها اتنين رجاله , بيشدوها بقوة ويمشوها معاهم بالعفيه , ويربطوها من اديها ورجلها فى سرير , مع اخر مشهد بتبدء ضربات القلب تزيد وجهاز القلب يعمل صوت عالى , ويبدء جسم روما كلو يتنفض بقوة
_____________________
مراد كان فى الكافتيريا بتاعت المستشفى , وهو راجع يعدى من جنبه الدكتور والممرضين بيجرو على العناية من غير تفكير يجرى وراهم , يدخل مراد ورا الدكتور يلاقى الممرضين بيحاولو يسبتو روما على السرير
الدكتور : امسكوها كويس , فين الحقنه ؟
يبص الدكتور يلاقى مراد اقف ورا ومخضوض
الدكتور : انت ايه ال جابك هنا اطلع بره
مراد : روما مالها ؟
الدكتور : بقولك اطلع بره
وهو بيتكلم جهاز القلب يعمل صوت عالى والنبض يوقف
الدكتور بصوت عالى : جهاز الصدمات بسرعه
مراد : روماااا
الدكتور : طلعو بره
يمسك الدكتور جهاز الصدمات ويدى لـ قلب روما الصدمه الاولى التانيه التالته , قبل الرابعه النبض يرجع يبص الدكتور على الجهاز القلب ويبص على روما ال تبدء تفتح عنيها ببطئ
الدكتور : روما روما روما سمعانى ؟
روما تهز راسها براحه اوى بـ اه
الدكتور وهو بيحرك ايده قدام وش روما : طيب شايفه ايدى ؟
روما تهز راسها تانى بـ اه
الدكتور : لا انا عايز اسمع صوتك حاولى تتكلمى , شايفه ايدى ؟
روما بصوت طالع بالعفيه : ايوه
الدكتور : اووف حمد لله على السلامه قلقتينا عليكى
روما تبص للدكتور بضعف وتغمض عنيها
_____________________
مراد واقف بره العنايه هيموت من القلق , لحد ما يخرج الدكتور
مراد : روما حصلها ايه ؟
الدكتور : الحمد لله النبض اتحسن وفاقت
مراد بفرحه : بجد بتتكلم بجد
الدكتور : طبعا بتكلم بجد , وكمان هتخرج من العنايه وتروح اوضة عاديه , حمد لله على سلامتها مره تانيه
مراد ياخد نفسه بعد القلق ال شافه ويطلع التلفون ويتصل بـ رشوان
رشوان : ايوه يا مراد
مراد : ايوه يا رشوان بيه , الحمد لله روما بيقت كويسه وهتخرج من العنايه
رشوان : الحمد لله احمدك يارب واشكر فضلك , طيب هو ينفع اكلمها ؟
مراد : مش دلوقتى يا رشوان بيه , اول ما تقدر تتكلم هخليك تكلمها على طول
رشوان : ماشى يا مراد
_____________________
رشوان قاعد فى صالون الفيلا بيضحك بفرحه ويحمد ربنا , شاهيناز جايه من الجنينه تشوفه , تقرب منه وتبصلو من فوق لتحت
شاهيناز : ايه ده , ايه الفرحه ال نازله عليك دى , ايه المعجزه حصلت وهتقوم من على الكرسى وهتمشى ولا ايه ؟
رشوان : ههههههههههه لا حاجة احلى بكتير , روما فاقت وبقيت كويسه واحسن منك وان شاء الله قريب اوى رجعالك
شاهيناز بعد ما كنت مبتسمة تكشر وتسكت
رشوان : مالك ايه الزعل ال نزل عليكى ده عرفتى انك هتتشلى زيى ولا ايه ؟ هههههههههههههههههههههههههههه
شاهيناز تسيب رشوان وتطلع على اوضتها , وتفضل تلف حوالين نفسها بنرفزه وفى الاخر تمسك فازه وترميها فى الحيطه تتكسر ميت حته
شاهيناز بغيظ : ايييه هو انا مش هعرف اخلص منك ابدا انتى ايييييه
_____________________
فى المستشفى , روما بتفتح عنيها براحه , تبص على الشباك على جنبها تلاقى الدنيا لليل تبص الناحيه التانيه تلاقى مراد قاعد جنبها على كرسى ومربع ايده ونايم
روما بصوت واطى وتعب : مراد , مراد
مراد : هممم , ها روما , حمد لله على السلامه
روما : عايزه اشرب
مراد : حاضر
يطلع مراد ميه من التلاجه الصغيرة ال فى الاوضه , ويعدل روما براحه عشان تشرب
مراد : حاسه بأيه دلوقتى يا روما ؟
روما : جسمى كلو وجعنى
مراد : معلش الحمد لله انها جات على قد كده
روما : انا من امتى هنا ؟
مراد : من اكتر من اسبوع
روما : جدى عرف ؟
مراد : ده كان هيتجنن وكان عايز يجيلك بأى شكل
روما : طبعا مفيش حد من العيله الكريمه جيه
مراد : ................
روما : بتنزل رأسك فى الارض ليه , عادى
مراد : روما يعنى هما .........
روما : هما اكيد مش فاضين , كانو بيجهز اللبس الاسود والعزا والصوان , احنا عليتنا دى اغرب عيله ممكن تشوفها فى حياتك
_____________________
بعد كام يوم فى المستشفى
الدكتور : لا كده تمام الحمد لله النبض تمام والضغط تمام
روما : انا هخرج امتى ؟
الدكتور : زهقتى مننا طبعا , على العموم ممكن تخرجى بكره بس متعمليش مجهود وترتاحى راحه كامله
روما : حاضر
الدكتور : طيب فى ضابط بره عايز يتكلم معاكى شويه بخصوص الحادثه يعنى
روما : ماشى
يخرج الدكتور ويدخل ضابط بوليس وعسكرى
الضابط : صباح الخير
روما : صباح النور
الضابط : اولا حمد لله على السلامة
روما : الله يسلامك , شكرا
الضابط : أنسة روما حضرتك ليكى اعداء ؟
روما : ازاى يعنى ؟
الضابط : اعداء , حد بيكرهك حد ليه مصلحه فى موتك ؟
روما : انا عندى شركة كبيرة وكل شركة ليها منافسين
الضابط : توصل المنافسه لحد القتل ؟
روما : معرفش
الضابط : الفوامل بتاعت العربيه بتاعتك كانت مفكوكه , والأوتوماتيك بتاع العربيه كان مفصول ومش شغال , يعنى الحادثه مدبرة
روما : ................
الضابط : تفتكرى مين حاول يقتلك ؟
روما : ..... معرفش
الضابط : شاكه فى حد ؟
روما : لا
الضابط : انتى متاكده ؟
روما : ايوه
الضابط : طيب على العموم احنا هنحقق فى الموضوع ونبلغك بأى جديد , حمد لله على السلامه مره تانيه
يمشى الضابط وتقوم روما من على السرير وتتسند على الحيطه وتدخل الحمام
_____________________
روما واقفه قدام مراية الحمام بتبص على وشها الاصفر وعيونها التعبانه والاسود الغامق ال تحت عنيها والجرح ال فى رأسها وايدها ال ملفوفه بالشاش , تفضل باصه على نفسها شوية وبعدين تخرج تلاقى مراد قاعد فى الاوضه
مراد : مبروك يا ستى الدكتور بيقول انك ممكن تخرجى بكره
روما وهى بتقعد براحه : مهو قالى
مراد : على طول كبسانى كده
روما : انت مين قاعد معاك فى بيتك ؟
مراد : يعنى هيكون مين , الخادمه والجنينى
روما : اعمل حسابك هاجى اقعد عندك لحد ما اخف
مراد : تنورى يا روما ده بيتك لو عايزه انا ممكن اقعد فى فندق وانتى اقعدى فى البيت براحتك
روما : لالا خليك انا بس مش عايزه اروح الفيلا بالمنظر ده , وكمان عايزه حد يخدمنى انا مش قادره اتحرك
مراد : الخادمه تحت امرك , هتفضل صاحيه لليل نهار تاخد بالها منك ولو عايزه اجبلك طقم خادم
روما : طيب انت يا مراد طيب اوى , طيبه متنفعش فى زمانا ده

يتبع ✍️✍️✍️