الحلقه ١٢
قدام مستشفى بتوقف عربية اسعاف بينزلو منها روما نايمه على نقاله وينزل مراد وراها وبيخدوها ويجرو بيها لجوا المستشفى بيدخلوها غرفة الطوارئ ومراد يفضل بره
_____________________
مراد قاعد على كرسى بره غرفة الطوارئ هدومه متغرقة من دم روما واعصابه مش عارف يمسكها لحد ما يخرج الدكتور
الدكتور : انت تقربلها ؟
مراد : ايوه
الدكتور : تقربلها ايه ؟
مراد : يا دكتور طمنى عليها حصلها ايه ؟
الدكتور : اسمع يا استاذ هى اصابتها خطيرة جدا وحالتها اخطر , وهتدخل عمليات وانا عايز اى حد من اهلها عشان يمضى على اقرار العملية
مراد : انا انا امضى انا
الدكتور : مهو انا عايز اعرف انت تقربلها ايه
مراد بعصبيه : انا اجبلك اهلها من فين دلوقتى انت سايبها بتموت وتقولى الامضاء ومش الامضاء انا امضيلك على ميت اقرار , ابوس ايدك اتصرف متخليهاش تموت
الدكتور : اهدا يا ابنى كده كده احنا بنجهز العمليات , اتفضل امضى انت
بيمضى مراد على الاقرار وبيمشى الدكتور , بعد دقايق تدخل روما العمليات
_____________________
بعد شوية مراد يطلع التلفون من جيبه وهو ايده بتترعش ويتصل بالفيلا , ترد عليه الخادمه
الخادمه : الو
مراد : انا مراد ادينى رشوان بيه
الخادمه : رشوان بيه استاذ مراد على التلفون
رشوان : ايوه يا مراد
مراد : ايوه يا رشوان بيه , روما عملت حادثه
رشوان بخضه : ايييييه روما ازاى ؟!
مراد : العربية اتقلبت بيها على الطريق
رشوان : اتقلبت اتقلبت , حصلها ايه يا مراد
مراد : لسه محدش مفهمنى حاجة , هى دلوقتى فى العمليات
رشوان : مراد تعالا خدنى يا مراد انا عايز اروحلها
مراد وهو بيحاول يمسك اعصابه : مش هينفع اسيبها خليك مرتاح انت انا هفضل معاك على التلفون , ان شاء الله تقوم بالسلامه
رشوان : طمنى اول بأول يا مراد
_____________________
نيللى كانت سامعه رشوان وهو بيتكلم فى التلفون بس مفهمتيش اوى , راحت دخلت لـ ندى اوضتها
نيللى : ندى
ندى : خييير
نيللى : فى حاجة كده بتحصل فى الفيلا
ندى : حاجة ايه ؟ انتى عايزة تنام ومش مركزه ولا ايه
نيللى : يابنتى ركزى , انا سمعت جدك بيتكلم فى التلفون وهو مخضوض وبيقول حادثه ومش حادثه وروما ومش عارفه ايه كده
ندى : ايه يكون روما حصلها حادثه
نيللى : مش عارفه
_____________________
بعد اكتر من ساعتين بتخرج روما من العمليات اول ما مراد يشوفها خارجه يجرى على الدكتور
مراد : ايه يا دكتور حصل ايه ؟
الدكتور : بص انا هكلمك بصراحه الحاله خطيرة , هى دلوقتى هتدخل العنايه المركزه وربنا معاها
يمشى الدكتور ومراد يطلع التلفون ويتصل تانى بـ رشوان
رشوان : ايوه يا مراد طمنى
مراد : خرجت من العمليات
رشوان : طيب ايه اخبارها
مراد : .................... كويسه ان شاء الله هتكون كويسه
رشوان : روما حصلها ايه يا مراد
مراد : هتكون كويسه يا رشوان بيه , هى دلوقتى فى العناية المركزه وان شاء الله بكره تكون كويسه
رشوان : الدكتور قالك كده ؟
مراد : اه اه هو قالى انها بكره هتكون كويسه
رشوان : خليك معايا على التلفون يا مراد عشان خاطرى يا ابنى
مراد : حاضر حاضر اطمن يا رشوان بيه
يقفل مراد مع رشوان ويقعد مكانه ويحط ايده على دماغه وهو مش عارف ازاى بيطمن رشوان وهو نفسه مش مطمن
_____________________
رشوان قاعد قلقان ونفسه يروح يطمن على روما , يبص على نفسه وهو قاعد على الكرسى المتحرك ويفضل يخبط فيه عشان مش قادر يتحرك
رشوان : كده بردو يا روما تعملى فيا كده ماانتى بتسوقى من زمان ايه ال حصل بس يارب استر يارب يارب دى بنت ابنى وبنتى يارب متحرمنيش منها
يفضل كده شويه وبعدها يسكت ويفكر شويه , وبعد كده يفضل ينادى على شاهيناز بعلو صوته
رشوان : شاهيناااااااااااااز شاهينااااااااااااااااااز
كل ال فى الفيلا ينزل على صوته وعلى رأسهم شاهيناز
شاهيناز : اييييييييه فى ايه انت فاكر نفسك فى الشارع
ندى : مالك يا جدو ؟
نيللى : هو فيه ايه ؟
رشوان : العربية اتقلبت بـ روما
ندى : ايه امتى ؟
شاهيناز : وانا مالى بتقولى انا ايه ؟
رشوان : انتى ده انتى الشر بعينه ده انتى بتمشى يمشى وراكى الخراب
شاهيناز : ندى , نيللى اطلعو بره
بعد ما يطلعو شاهيناز تقرب من رشوان وتربع اديها وتكلمو بمنتهى الهدوء
شاهيناز : عايز ايه ؟ وهات من الاخر
رشوان : عارفه لو الحادثه دى بفعل فاعل مش هيكون فيه غيرك عملها
شاهيناز : عارف الناس لما بتكبر بتخرف وتتهبل
رشوان : والله ما اعرف انك انتى ال وراها .....
شاهيناز : جرا ايه يا خرفان انت ولا عشان انا ساكته ليك
رشوان : بصى بقى , لو كنت سكت زمان ف ده عشان مكانش عندى دليل وعشان كنت مصدوم وفى دنيا غير الدنيا , لكن دلوقتى لا مش هسكت واوعي تفتكرى عشان مشلول ومش عارف اتحرك انى مش هعرف اتصرف معاكى , والله والله وحيات روما لو عرفت انك انتى ال عمليتها لا ادفنك حيه يا شاهيناز
شاهيناز : انت تهدتنى انا هههههههههه ضحكتنى يا راجل مش انا ال يتقالى الكلام ده فوق يا رشوان وبصلى كويس وشوف انت بتكلم مين
رشوان : بكلم شيطان رجيم , وهقولها ليكى تانى الا روما
شاهيناز : وانا ايه مصلحتى عشان اموتها ؟
رشوان : تصدقى اول مره تكونى غبية وسؤالك ده بيقولى انك انتى فعلا ال وراها , مصلحتك ده موتها كلو مصالح ليكى اولها ان ولاد هيورثو منها وتانيها انك هتخلصى من الشوكه ال فى ضهرك , بس والله ما يحصلها حاجة لا اوريكى المشلول ممكن يعمل ايه
تبص شاهيناز لـ رشوان من فوق لتحت وتخرج من الاوضه وتسيبه
_____________________
تطلع شاهيناز من اوضه رشوان تلاقى ندى ونيللى وشريف قعدين فى الصاله
شاهيناز : مالكم قاعدين كده ليه ؟
شريف : جدى كان بيزعق ليه , وكان عايزك فى ايه ؟
شاهيناز : بعدين يا شريف , وانتم عايزين ايه ؟
ندى : ماما هو احنا مش هنروح لـ روما
شاهيناز : نعم يااختى تروحى لمين , وتروحيلها ليه ان شاء الله
ندى : ايه يا ماما دى عملت حادثه , ولازم نطمن عليها بردو دى تبقى اختنا
شاهيناز : قطع لسانك دى مش اختك ولا عمرها هتكون اختك اختك اهى واقفه جنبك , لكن تقولى كلمة اختى دى اقطعلك لسانك , يلا غورى على اوضتك
نيللى : ماما انا متهيألى يعنى ...
شاهيناز بزعيق : متهيألك ايه
نيللى : ولا حاجة انا طلعه اوضتى
بعد ما يطلعو ندى ونيللى
شريف : هو فى ايه يا ماما ؟
شاهيناز : ست روما عملت حادثه بيقولو العربية اتقلبت بيها
شريف : وحالتها خطيرة على كده ؟
شاهيناز : وانت مالك تسأل عليها ليه ولا هتعمل زى اخواتك وتقولى نروح نطمن عليها
شريف : لا انا بس بسأل , طيب هو جدى كان بيزعق ليه ؟
شاهيناز : ده راجل مجنون زى بنت ابنه , قال بيقولى انتى ال ورا الحادثه قال
شريف : اه وهو انتى ليك ايد فى ال حصل بجد يا ماما
شاهيناز برتباك : ايه ايه الكلام الفارغ ده انت اتجننت تكلمك امك كده
شريف : انا مش قصدى انا ........
شاهيناز : امشى يلا من هنا عايزة اقعد لوحدى
يمشى شريف وتفضل شاهيناز تفكر
شاهيناز فى سرها : امتى يجيلى خبرك يا روما انا عارفه ماموتيش على طول ليه يارتها كانت انفجرت بيكى مش اتقلبت , امتى بقى اخلص منك
____________________________
نيللى قعده مع ندى فى اوضتها , كل شويه يبصو لبعض ويسكتو
نيللى : هو انتى بجد عايزها تروحلها ؟
ندى : وليه لا يا جماعه دى اختنا بردو اسمها على اسمنا تعمل حادثه ومانروحش نشوف حتى حصلها ايه
نيللى : بس هو جدك كان بيزعق كده ليه ؟
ندى : يمكن من خضته عليها , انتى مش سامعه وهو بيقول العربيه اتقلبت بيها والظاهر كده حالتها خطيرة
نيللى : تفتكرى هيحصلها ايه ؟
ندى : مش عارفه ربنا يستر ويعدى الليله دى على خير
نيللى : قولى ربنا يعدى الايام الجايه على خير
يتبع ✍️✍️✍️
