الحلقه ١٥
عدت فتره محصلش فيها حاجات كتير , شاهيناز بتجهز لـ افتتاح المصنع بتاعها بعد ما لاقيت شريك ليها , نيللى وعمر يوم عن يوم يبزيد الخناق بينهم , شريف هيتجنن من تصرفات كاميليا وخروجها الكتير , ندى قربت اكتر واكتر من أحمد وبقيت مش عارفه تبعد عنه , روما لسه قعده عند مراد من وقت باب الزكريات ال اتفتح وهى كلامها قليل مع مراد وهو مش بيحاول يضغط عليها فى الكلام
_____________________
ندى واقفه قدام المرايا بتبص على نفسها محتاره تلبس ايه لحد ما الباب يخبط وتدخل كاميليا
ندى : جيتى فى وقتك , ايه رأيك البس الفستان ده ولا ده
كاميليا : الاتنين حلوين
ندى : يوووه ماانا عارفه البس انهى واحد فيهم
كاميليا : خلاص البسى ده
ندى : انا كنت بقول كده من الاول
كاميليا : بس هو انتى متشيكه ورايحه فين كده ؟
ندى : ها , خارجه انا غادة صحبتى نتمشى ونلف على المحلات
كاميليا : اه , مش واخده بالك انك الايام دى متغيره شويه
ندى : متغيرة ازاى يعنى مين فينا ال متغيرة ؟
كاميليا : يعنى ايه ؟
ندى : انتى مش شايفه نفسك على طول بره البيت وكلامك قليل مع الكل , فى ايه ؟!
كاميليا : ولا حاجة عادى يعنى , انا هروح اقعد فى الجنينه مدام انتى خارجه
وقبل ما تخرج كاميليا نيللى تدخل عليهم
ندى : الف مره نقول خبطى الاول
نيللى : بقولك ايه سبينى فى حالى
كاميليا : مالك يا نيللى ؟
نيللى : مالى , بشد فى شعرى ولا بقطع فى هدومى
ندى : فى ايه يا بنتى انتى ايه قطر ما تتكلمى كويس
كاميليا : عادى يا ندى انا ال غلطانه انى ادخلت , انا ماشيه
نيللى : استنى , سورى يا كاميليا , انا بس مدايقه شويه ومش طايقه نفسى
كاميليا : عادى يا نيللى مفيش حاجة , بس نصيحه كبرى دماغك من اى حاجة مفيش حاجة تستاهل , انا نزله
نيللى : هى مالها كاميليا ؟
ندى : مش عارفه متغيره اوى الايام دى اكيد متخناقه مع شريف
نيللى : خناق خناق , البيت ده بقي للخناق وبس عيشه تقرف
_____________________
شاهيناز فى الشركه بتاعتها ومعاها شريف والشريك الجديد فى المصنع مختار
شريف : كده يبقى كل حاجة تمام كل الماكينات الجديده وصلت وزى ما احنا طلبنا بالظبط
شاهيناز : ايه رأيك يا مختار بيه , كل حاجة ماشيه زى مااحنا عايزين اهو
مختار : تمام يا مدام شاهيناز , نحدد بقى معاد الافتتاح
شريف : متهيألى على اول الشهر هيكون كويس
شاهيناز : فعلا وقت مناسب تكون كل حاجة خلصت
مختار : خلاص على بركة الله , بس لازم نعمل حفله بمناسبة الافتتاح
شاهيناز : اه طبعا يا فندم ودى عايزه كلام , انا هجهز كل حاجة
_____________________
فى كافيه , ندى قعدة مع أحمد وهو قاعد يبصلها بس
ندى : مالك من ساعة ما قعدنا وانت عمال تبصلى
أحمد : اصلك وحشتينى اوى , بردو كده تغيبى عنى كل ده
ندى : معلش يا حبيبى , كان فى ظروف والله , انت كمان وحشتنى موت
أحمد : اوووف انا اتخنقت على فكره
ندى : من ايه ؟!
أحمد : نفسى انا وانتى نقعد فى مكان لوحدنا بعيد عن الناس والدوشه
ندى : طيب تحب نروح كمان تانى ؟
أحمد : اه , بس مكان نقعد فيه لوحدنا
ندى : طب تحب نروح فين ؟
أحمد : اممممم ايه رأيك نروح البيت عندى ؟
ندى : ايه ؟!!
أحمد : ايه يا حبيبتى فى ايه ؟
ندى : ازاى يا أحمد مينفعش
أحمد : ليه يا روحى وفيها ايه , ولا انتى خايفه منى ؟
ندى : يعنى اصل يعنى .......
أحمد : معقول يا ندى معقول انتى خايفه منى انا مش مصدق , ده انا روحى فداكى وانتى تخافى منى , انا ماشى عمرى ما كنت اتصور انك تخافى منى انا , مش هتشوفى وشى تانى يا ندى
ندى بخضه : ايه انت بتقول ايه ليه كل ده ؟ انا مش قصدى يا حبيبى والله انا بس عشان الناس والله عشان خاطرى متزعلش منى
أحمد : ايه الناس هى مالها الناس , احنا هنروح نقعد مع بعض شويه مالها بينا الناس دى حجه يا ندى
ندى : خلاص عشان خاطرى متزعلش وحياتى عندك , خلاص خلاص تعالا نروح اى مكان انت عايزو ال انت عايزو بس بلاش تزعل منى , انا عمرى ما اخاف منك
أحمد : بجد ولا كلام كده وخلاص
ندى : لا طبعا بجد , يلا بينا اى حته تريحك يا حبيبى هتريحنى
أحمد : اوك , يلا بينا بقى
_____________________
مراد نايم فى اوضته , والتلفون عمال يرن جنبه لحد ما يسكت , يقوم مراد بكسل ويبص فى المنبه جنبه يلاقى الساعه قربت 5 العصر يروح قايم ويخرج بره الاوضه
مراد : يا سنيه , سنيه
الخادمه : ايوه يا مراد بيه
مراد : حضرى الغدا لحد ما اخد دوش , وروحى شوفى ست روما لو لسه نايمه خليها تصحها عشان تتغدا
الخادمه : ست روما خرجت من بدرى
مراد كان ماشى رجع تانى
مراد : ايه خرجت , خرجت امتى ؟
الخادمه : يجى من 3 ساعات كده
مراد : 3 ساعات , وانتى ازاى تسبيها تخرج
الخادمه : كنت هعمل ايه يا بيه هى صحيت من النوم لبست وخرجت
مراد : كنتى صحتينى , امشى من وشى امشى
يمسك مراد الموبايل بتاعه ويفضل يرن على روما وهى مش بترد
مراد : يووووه ما تردى , وبعدين فى العمايل دى يا روما ياتره راحت فين
وهو بيحاول يتصل بيها يرن جرس الباب وتروح الخادمه تفتح , بيص مراد يلاقى روما داخله , لبسه فستان اسود فوق الركبه شيك وحطه روج احمر غامق ورسمه عنيها بخط كحل عريض وعامله شعرها كيرلى خفيف
مراد : واو
روما : لا بجد
مراد : ايه الحلاوه دى هو ال بيعمل حادثه بيطلع منها زى القمر ولا ايه
روما : انا طول عمرى قمر , روح غير هدومك عشان توصلنى
مراد : فين ؟
روما : الفيلا , هو انت فاكرنى هفضل عندك العمر كله ولا ايه
مراد : ياااريت
روما : يااادمك , يلا اخلص بسرعه
مراد : ماشى , لا بس قمر قمر يعنى
روما : !!
_____________________
ندى قعده فى بيت أحمد بتبص حواليها على البيت ال بسيط بيت عادى جدا زى بيت اى حد متوسط الحال , بتنزل راسها فى الارض وتقعد ساكته , لحد ما يجى أحمد ماسك فى ايه حاجه سقعه
أحمد : اتفضل يا حبيبتى
ندى بكسوف : ميرسى , مش يلا نمشى بقى يا أحمد
أحمد : هو احنا لحقنا نقعد يا بنتى ايه مالك
ندى : ولا حاجة
أحمد وهو بيقرب منها : بس تعرفى اللون الازرق حلو عليكى اوى
ندى وهى بتبعد : ميرسى يا حبيبى
أحمد وهو بيقرب اكتر : تعرفى انتى كل حاجة حلوه عليكى , انتى اصلا مفيش حاجة فيكى وحشه
ندى : انا بقول يلا بينا بقى عشان مش عايزه اتاخر
أحمد حط ايده على كتف ندى : وفيها ايه لما تتاخرى شويه ادينا قعدين
ندى وهى بتقوم من مكانها : لا كفايه كده
أحمد وهو بيشد ندى جامد : لا هتقعدى
ندى : أحمد سبنى
أحمد : اسيبك ازاى هو انا جابك هنا عشان تقوليلى سبنى
ويحاول أحمد يحضن ندى بالعفيه وهى وهى بتحاول تبعد عنه
ندى بصوت عالى : ااااابعد عنى اوعى سبنى
أحمد : تعالى هنا
ندى : وانا ال كنت فاكرك محترم , طلعت زباله
أحمد يضرب ندى قلم يوقعها على الارض
أحمد : مين ده ال زباله يلى ازبال من الزباله , فوقى لنفسك يا بت ده انتى جايه بمزاجك , هتعملى فيها بت محترمه وبتعرفى العيب ماكنتش تيجى يا روح امك , ماانتى عارفه انتى جايه فين ايه فاكرانى جايبك هنا العبك كوتشينه
ندى تقوم من مكانها والدموع مغرقه وشها
ندى : تصدق انت معاك حق , انا ال عملت فى نفسى كده , بس والله العظيم لو ما سبتنى اخر من هنا لا اصرخ والم عليك الناس واعملك فضيحه
أحمد : غورى فى ستين داهيه , كده كده هترجعيلى تانى فاهمه يا ماما
ندى : ده بعدك
أحمد : هتشوفى , وهتيجى تحت راجلى كمان عشان ارحمك
تبصلو ندى بعيون كلها دموع وتخرج من البيت
_____________________
فى الفيلا , نيللى وعمر بيتخانقو وصوتهم عالى , لدرجة ان شاهيناز سمعتهم
شاهيناز : ايه مالكم فى ايه ؟
عمر : اسألى بنتك
شاهيناز : فى ايه يا نيللى ؟
نيللى : انا خلاص زهقت من العيشه دى
شاهيناز : وطى صوتك وفهمينى براحه
نيللى : البيه كل يوم خروج كل يا سهر حتى لما بيقعد فى البيت بيقعد يا على اللاب يا فى اى حته بعيد عنى , وانا اقول معلش , لكن فى الاخر الاقى رساله على تلفونه من واحده بتقوله اتاخرت ليه يا حبيبى
عمر : قلتلك دى عميله
نيللى : عميله تقولك يا حبيبى
عمر : هى كده يا ستى طريقتها فى الكلام كده
نيللى : طريقة كلام ايه هو انا هبله عشان اصدق الكلام ده
عمر : عنك ما صدقتى
شاهيناز : بس انتو الاتنين كفايه اعملو حساب ليا على الاقل
عمر : يعنى انتى مش شايفه كلامها
شاهيناز : خلاص يا عمر , انا هتكلم معاها
نيللى : هتتكلمى معايا فى ايه , انا خلاص جبت اخرى طهقت
عمر : انتى بردو ال طهقتى
شاهيناز : يوووووووه , ده انتو الاتنين تزهقو بلد , بقولكم ايه انا مش فاضيه لـ كلام العيال بتاعكم ده انا ورايا حاجات اهم اقعدو كده مع بعض واتكلمو براحه شويه بلاش الصوت العالى ده فرجتو علينا الناس
_____________________
تخرج شاهيناز من عندهم وتنزل على السلم وهى بتنادى على الخادمه , تلاقى روما واقفه قدامها
روما : مالك مبرقه كده ليه شوفتى عفريت
شاهيناز : مكنتش متوقعه انك تيجى دلوقتى , قولت انك لسه هتكملى علاجك , اصلى سمعت ان حالتك كانت خطيرة
روما : اه خطيرة جدا , اصل العربية اتفرمت
شاهيناز : بجد يعنى على كده كويس انك خرجت سليمه
روما : كنتى متوقعه ارجعلك متكفنه طبعا مش كده , بس انتى ال غلطانه كنتى اختارتى ليا موته احسن من كده شويه اصل حكاية الحوادث دى بقيت حاجة قديمه اوى
شاهيناز : انا ماليش دخل بالى حصلك , تفتكرى يعنى يوم ما افكر اموتك هقلب بيكى العربيه
روما : امال يوم ما تفكرى تموتينى هتعملى ايه , هتحطيلى سم زى ما عملتى مع ابويا
شاهيناز : انتى مجنونه
روما : مهو بسببك
شاهيناز : انتى عايزة تفتحى القديم ولا خلاص
روما : ومين ال قالك انه اتقفل , هو انتى افتكرتى عشان انا زمان سكت ومشيت انى خوفت منك افتكرتى انى نسيت , انا كنت كده كده راجعه حتى لو جدى ماكنش طلب انى ارجع , مفيش حد على وش الارض بيسب حقه , انا بس كنت مستنيه الوقت المناسب
شاهيناز : انتى ولا تقدرى تعملى ليا حاجة يا روما واكيد انتى فاكره زمان لما حطيتى رأسك وبرأسى حصلك ايه
روما : زمااااااااااااان , احنا فى دلوقتى , دلوقتى انتى ال حطيتى رأسك برأسى
شاهيناز : هه هتعملى ايه هتقتلينى
روما : اقلب بيكى العربيه يعنى زى ماانتى عملتى , تؤ تؤ , عارفه المره دى انتى طلعتى غبيه فكرتى فى حاجة واحده بس لو انا موت انتى هتعملى ايه وتعيشى ازاى , بس نسيتى تفكرى لو عشت هعمل ايه وهعيشك ازاى , انتى فتحتى على نفسك باب جهنم
شاهيناز وهى بتحاول تجمد قدام روما : اعملى حسابك , انا ورايا كتير يا روما مش هتعرفى تعملى معايا حاجة
تقرب روما من شاهيناز اوى لحد ما يبقاش فيه بينهم غير مسافه صغيره جدا , وتبصلها بنظره جامده مافيهاش اى معنى غير انها مرعبه
روما : وانتى كمان تعملى حسابك ان الايام الجايه هيطلع عليكى القديم والجديد وكل ال افقل هيتفتح حاجة واحده تخليها فى دماغك , ان ايامك الجايه سواد
يتبع ✍️✍️✍️
