روما

جزء ١٨

الحلقه ١٨

تروح ندى عشان تقول لـ شاهيناز على المصيبه ال هى فيها , لكن تلاقى شاهيناز متعصبه وتزعق من بعد ما مشى مختار فتعرف انها مش هتقدر تتكلم معاها او تحكلها اى حاجة , فاتخرج فى الجنينة وتقعد لوحدها وتفضل تعيط
ندى : اعمل ايه ياربى اتصرف ازاى يارب ساعدنى يارب يارب اعمل ايه يارب , اموت نفسى واخلص استغفر الله العظيم يارب اتصرف ازاى فى ال انا فيه ده يارب اتصرف ازاى
تفضل ندى بالشكل ده لحد ما بعد شويه تسمع حد بيكح تبص ناحية الصوت تلاقى روما واقفه فى البلكونه وماسكه سيجاره فى ايدها , تفضل ندى باصه على روما شوية وبعدين تمسح دموعها وتقوم
_____________________
روما واقفه فى البلكونه تسمع باب الاوضه بيخبط تروح تفتح , تلاقى ندى قدامها
روما : نعم
ندى : ممكن ادخل ؟
روما : ليه ؟
ندى : سبينى ادخل عشان اقولك مش هاخد من وقتك كتير
تبعد روما عن الباب وتدخل الاوضه وتدخل وراها ندى
روما وهى بتقعد : ما تقعدى انتى عليكى ذنب , افندم عايزه ايه ؟
ندى بتوتر : انا انا انا .......
روما : هو ايه ده , انتى ايه خلصينى
ندى : انا وقعه فى مصيبه كبيره , الله يخليكى بس اسمعينى لحد الاخر
روما : مع انه ميخصنش بس اتفضلى ارغى
ندى : انا انا كنت اتعرفت من فتره على زميل ليا فى الكليه وانا حبيتو اوى وهو كان بيقول انه بيحبينى , والله انا كنت مصدقه عشان كده روحت معاه بيته عشان مأمنه على نفسى بس طلع واحد كداب وواطى واتهجم عليا
روما قعده تبص لندى من غير ما تعلق على اى حاجة , وندى بتكلم كلامها وهى بتعيط بحرقه
ندى : والله ما خليته لمس شعره منى وشتمته وهربت منه ومسحت رقمه من عندى ولغيته من حياتى خالص والله , بس هو دلوقتى عايز ينتقم منى
روما : ازاى ؟
ندى : عايزنى اروحه تانى والا هينشر صور ليا على النت
روما : صور ايه ؟
ندى برتباك : صور صور ليا فى اوضع وحشه
روما : واو
ندى : والله العظيم متفبركه والله العظيم والمصحف , هو كان واخد منى صوره عاديه جدا والله اكيد ركب وشى على الصور دى والله العظيم انا مااتصورت الصور دى والله
روما : خلصتى , جايه ترغى ده كل وتقوليلى كل ده ليه وانا مالى ؟
ندى : انا مش عارفه اعمل ايه , ده قالى لو مروحتش ليه بكره هيفضحنى , الله يخليكى ساعدينى
روما : اعمل ايه ؟! هههههههههههههههه انتى سبتى الدنيا كلها وجايه ليا انا وطالبه المساعده منى انا ههههههههههههه تصدقى ضحكتينى , يلا من هنا يا شاطره دورى على حد غيرى يشوفلك حل
ندى : استنى بس , مفيش حد غيرك يقدر يساعدنى
روما : ليه ماتروحى للهانم امك
ندى : امى مش فاضيه ليا ولا عمرها كانت فاضيه لى اى حد فينا امى لو روحت قولت ليها مش بعيد تقتلنى وتخفينى من وش الدنيا عشان بس ميحصلش ليها فضحيه قدام المجتمع الراقى بسببى , انا وانتى مفيش فرق كبير بينا انتى عمرك ما عشتى مع ام ولا انا عمرى حسيت انى عايشه مع ام , عرفتى ان مفيش غيرك يساعدنى , ساعدينى ده انا اختك
روما بزعيق : انتى مش اختى ولا عمرك هتكونى هو انتى فاكرانى هتأثر بكلام الافلام العربى ده , انتى مش اختى انتى بنت شاهيناز , ويلا اطلعى بره
ندى بنهيار : لالا اسمعينى بس , الله يخليكى يا روما انا عمرى ما عملتلك حاجة , انا عمرى قلتلك حتى كلمة وحشه ؟ ابوس ايدك , طيب بلاش عشان انا اختك , اعتبرينى واحده من واحده الشارع وقعه فى عرضك ابوس ايدك
روما : كفاااااايه , اوووف , عنوان الواد ده فين ؟
ندى بفرحه : الله يخليكى الله يخليكى , هكتبلك عنوانه حالا
_____________________
شاهيناز فى الشركه بتاعها قعده حاطه ايديها الاتنين على دماغها , يدخل عليها شريف
شريف : ماما
شاهيناز : ايه ؟
شريف : انا , انا روحت شركة التأمين , التأمين بتاع المصنع مش , مش هيغطى الخساير ال حصلت , مبلغ التأمين قليل اوى
شاهيناز : هه , عادى وفيها , مهى خلاص خربت , خربتها بنت هدى وجابت اخرها
شريف : انتى لسه بردو بتقولى ان روما ال عملتها
شاهيناز : وهو في غيرها بنت الكلب فضلت ساكته ساكته ساكته وفى الاخر ضربت ضربة معلم , بقالى سنين بخبط فيها واوقعها فى كل مصيبه ومصيبه وتخرج منها , وتيجى هى بضربه واحده واحده تجينى ارض ارض
شريف بستغراب : مصايب ايه ال عملتيها فى روما يا ماما ؟!
شاهيناز بتتكلم وهى مش حاسه بحاجة حواليها ولا حاسه هى بتقول ايه
شاهيناز زى التايهة : اعمل ايه فيها تانى اكتر من ال عملته , خلاص روما ضيعت منى كل حاجة , روما رجعت بعد سنين عشان تكسرنى , بس لا انا بردو هفضل شاهيناز انا هفضل بردو ما مفيش حد يقدر عليا اه اه انا هفضل شاهيناز
_____________________
أحمد قاعد فى بيته يسمع الباب بيخبط جامد اوى , يروح يفتح
أحمد بزعيق : طيب حااضر جاى اهو هى الدنيا طارت
لسه هيفتح الباب يلاقى الباب طار فى وشه ويدخل عليه 3 رجاله شبه البودى جارد كلها عضلات وشكلهم مرعب ووراهم تدخل روما
أحمد : اييييييه , انتو مين ؟!
روما : اخرس يالا , اقفلو الباب ده
أحمد : انتو عايزين ايه ؟
يبص أحمد يلاقى التلات رجاله من غير كلام يمشو لحد عنده ويقفو حواليه
روما : انت رغاى ليه , فين الصور ؟
أحمد : صور ايه , وانتى مين اصلا ؟
روما : وانت مال اهلك انا مين , فين الصور ال فبركتها لندى ؟
أحمد : ندى مين انا معرفش حد بالاسم ده , ومعرفش صور ايه ال بتتكلمى عليها
روما : وحيات امك , ليه فاقد الذاكره , شوف ودينى وما اعبد ان ما طلعت الصور بالذوق باللادب , لا اخلى التلاته دول يقطعوك حتت ويسبوك مرمى زى الكلب , وابقى ورينى هتعمل ايه بقى بالصور وانت ميت , قولت ايه ؟
أحمد بخوف : اا اا خلاص افتكرت
روما : شاطر , روح بقى مع الحلوين دول هات الصور
يروح أحمد الاوضه ويجيب الصور ويخرج يديها لـ روما ال تاخد الصور منه وتقلب فيهم وبعدها تبصلو
روما : دى كل الصور ولا فى منها نسخه تانيه ؟
أحمد : والنعمه دى كل الصور ومفيش ولا نسخه تانيه ولا تالته
روما : كويس , كده كده انا لو عرفت ان فى نسخه تانيه مش هرحمك , بس لازم اسيب ليك تزكار صغير كده عشان متفكرش تعمل كده تانى ولا مع ندى ولا ما غيرها
أحمد : ايه انتو هتعملو ايه ؟
روما : لا متخفش , دول هيعرفوك غلطك بس , مش عايزه عضمه فى جسمه سليمه , تخلصو وتحصلونى على العربيه
أحمد : اه اه ااااه
تنزل روما من عند أحمد وبعد شويه ينزل التلات رجاله بعد ما يكونو كسرو عضم أحمد وسابه مرمى غرقان فى دمه
_____________________
ندى قعدة قلقانه وخايفه عايزه تعرف ايه ال حصل , لحد ما تلاقى روما داخله عليها الاوضه
روما : الصور كلها اهى , تقطعيها تولعى فيها انتى حره والواد ده مش هيقدر يقربلك تانى
ندى بفرحه : بجد يا روما ربنا يخليكى يارب انا مش عارفه اقولك ايه ربنا يخليكى
وقربت ندى من روما تحضنها ويدوب بترفع اديها راحت روما مسكت ايدها ونزلتها
روما : انا وقفت معاكى بس عشان انتى بنت بالبلدى كده عشان انتى وليه وانا وليه , وانا مش ممكن اشوف واحده سمعتها بضيع واسبها بكره يحصلى زيها مهى الدنيا دوراه , وخلاص عملت ال عليا ياريت بقى المسافه ال كانت بينى وبينك ترجع زى ما كانت
وتلف روما عشان تخرج من الاوضه
ندى : روما
روما من غير ما تبصلها : نعم
ندى : على فكره انا محترمه والله مش بنت وحشه , انا طول عمرى عايشه فى بيت كله كره كل ال عايشين فيه بيكرهو بعض , لاقيت اخيرا حد بيقولى بحبك حسيت اخيرا بالحب كنت عايزه اخرج بره دوامة الكره ال انا مش عارفه حتى سببها فا حبيت والله ما عملت حاجة غلط انا بس حبيت
روما لفت وبصت ليها : انتى مش بنت وحشه ولا انا كمان وحشه , انا كان نفسى احبكم فى ناس بتتمنى اخ واحد بس ياخد بحسها فى الدنيا , وانا ليا 3 بس خساره بينى وبينكم الف سد وسد , انا انسانه بحس وبتوجع وساعات بيبقى نفسى اترمى فى حضن حد وعيط واغسل همومى , بس الظلم بيموت كل ده بيخليكى انسانه جافه معندكيش مشاعر , لو كنتى جربتى كنتى فهمتى قصدى , عشان كده اسفه مش هعرف بعد السنين دى كلها اكون اختك
وتخرج روما من عند ندى ال تقعد مكانها حزينه وصعبان عليها الكلام ال سمعته
_____________________
بعد كام يوم , نيللى وعمر واقفين قدام بعض وبيزعقو بعلو صوتهم
عمر : انتى بقيتى حاجة تقرف
نيللى : انا ال بقيت حاجة تقرف , ده انت كرهتنى فى نفسى ده كان اسود يوم ما شوفتك واتجوزتك
عمر : فعلا كان يوم اسود , وكان فضيحه قدام الناس
نيللى : انت كل ما تتكلم تعيرنى , انا تعبت منك تعبت , طلقنى طلقنى انا مش عايزاك
عمر : لا يا شيخه قال يعنى انا ال عايز اعيش معاكى تانى
نيللى : ومستنى ايه طلقنى طلقننننننننننننننى
عمر : وماله يا ماما اطلقك بس مالكيش حاجة عندى
نيللى : يعنى ايه ؟
عمر : يعنى انا مش معايا ادفع مؤخر صداق ولا نفقة
نيللى : ازاى يعنى دى حقى , عايز تاكل حقى ده انا ارفع عليك قضيه واجيب حقى منك بالقانون
عمر : بجد خلاص انا مش مطلق وخلى القانون ينفعك يا ام قانون
نيللى : انت ايه يااخى ايه ليه بتعمل فيها كده , طيب اتجوزتنى ليه من الاول لما انت كرهنى كده
عمر : بصراحه انا اتجوزتك مصلحه
نيللى : ايه !!
عمر : اه مهو مفيش داعى بقى للكدب , عائله غنيه ومستوى عالى وفلوس بالهبل اسيب كل ده , انا كنت ناوى اسحب شوية من اليغمه دى بس الحظ بقى , اولها اختك دى اخدت كل حاجة , وبعدها المصنع اتحرق بيقتو على الحديده يا نانى اعمل بيكى ايه بقى
نيللى بصدمه : كل ده , كل ده كان كدب كل ده عش عشان فى الاخر توصل للفلوووووس
عمر : ياسلام اشمعنى انا ال هطلع ملاك يعنى , امال لو ماكنتوش عيله واطيه بتاكلو فى بعض بتنهشو فى لحم بعض عشان خاطر الفلوس ده الناس كلها بتقول ان امك رمت اختك زمان فى مستشفى المجانين عشان تاخد ورثها , اقوم انا الغريب ال وسطكم ال هطلع طيب وبرئ , انا قولت ال عندى عايزه تطلقى مع السلام فى ستين داهيه بس مالكيش ولا مؤخر ولا نفقه ولا اى حاجة وتكتبيلى تنازل كمان عند محامى حتى الشبكه هخدها , فغير كده مش مطلق وخليكى كده , قولتى ايه
نيللى باصه لـ عمر والدموع نزله من عنيها زى الشلال
نيللى : هههه انت صح انت معاك حق , مهو لو احنا كنا اخوات ومكنش كل واحد فينا بيكره التانى كان كل واحد فينا بقاله ضهر فى الدنيا لو كنا عيله بجد ماكنش حد يجى يكسرنا , طلقنى يا عمر وهتنازل ليك عن كل حاجة

يتبع ✍️✍️✍️